ރައީސް އޮފީހުގައި ޑެސްކެއް ބަހައްޓައިގެން ވޯޓުން ވައްކަންކުރަން ރާވާން ފަށައިފި: ސައީދު

ރައީސް އޮފީސްތެރެއިން ރިޔާސީ އިންތިޚާބުގެ ދެވަނަ ބުރާއި ދިމާކޮށް "ބޮޑު ވައްކަމެއް" ކުރުމަށް ރާވަމުންދާކަމަށް އިދިކޮޅު ޕީއެންސީގެ ނައިބު ރައީސް އަދި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ތުހުމަތުކުރައްވައިފި އެވެ.

މާލޭގެ އާޓިފިޝަލް ބީޗުގައި ބޭއްވި "މަވެސް ޕީޕީއެމް" ޖަލްސާގައި ވާހަކަދައްކަވަމުން ފައްޓަވަމުން ސައީދު އެންމެ ފުރަތަމަ ވެސް ވިދާޅުވީ ރައީސް އޮފީސް ތެރޭގައި ޑެސްކެއް ބަހައްޓަވައިގެން ބޮޑު ވައްކަމެއް ކުރުމަށް މިހާރު ރާވަމުންދާ ކަމަށެވެ.

އެ ތުހުމަތުތަކުގެ އިތުރު ތަފްސީލު ދެއްވަމުން ސައީދު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒަށް ވޯޓުދެއްވަން ތިއްބެވި 8000 މީހުން ދެނެގަނެ، އެމީހުން ރަޖިސްޓްރީވެފައި އޮތް ތަން ނޫން އެހެން ތަނަކަށް ބަދަލުކުރުމުގެ މަސައްކަތް ރައީސް އޮފީހުގައި އެކަމަށް ޚާއްސަކޮށް ބަހައްޓާފައިވާ ޑެސްކުން ކުރަން ފަށާފައިވާ ކަމަށެވެ.

އެގޮތަށް އެކަން ކުރުމުގެ މަޤްސަދަކީ ޑރ މުއިއްޒަށް ވޯޓުދެއްވުމަށް ނިންމައިގެން ތިއްބެވި ފަރާތްތަކަށް އެ ފުރުސަތު ގެއްލުވާލާ، އޮޅުވާލުމެއްގެ ތެރެއިން އިންތިޚާބު "ވަގަށް ނެގުން" ކަމަށް ސައީދު ވިދާޅުވި އެވެ.

"ރައީސް އޮފީހުގައި ކުޑަ ޑެސްކެއް ބަހައްޓައިގެން ވައްކަމެއް ކުރަން އެބަ ރާވާ. މި ވައްކަން ކުރަން އެމީހުން ގަސްތުކުރާ ގޮތަކީ. 8 ވަރަކަށް ހާސް ޕީޕީއެމްގެ މީހުން، ޑރ މުއިއްޒަށް ވޯޓު ދެއްވާނެ ކަމަށް ކަށަވަރުވާ މީހުން ރާއްޖޭގެ އެކި ކަންކޮޅުތަކަށް ރީ ރެޖިސްޓާ ކުރަމުން ދަނީ. އެއީ އެމީހުން ކުރާ ކަމަކީ"

ޕީއެންސީގެ ނައިބު ރައީސް ސައީދު

ސައީދު ވިދާޅުވީ މީ ޕީޕީއެމް-ޕީއެންސީ ކޯލިޝަނަށް ވޯޓުލާން ނިންމައިގެން ތިބި ރައްޔިތުން ވަރަށް ބޮޑަށް ފާރަވެރިވާން ޖެހޭ ކަމެއް ކަމަށެވެ. އަދި އެކަމަށް ފާރަވެރިވެ ދުރާލާ ރަޖިސްޓާ ވެފައިވާ ތަން ބަލައި ކަށަވަރުކުރަމުން ގެންދިއުމަށް ސައީދު ވަނީ ޕީޕީއެމް-ޕީއެންސީގެ އާންމު މެމްބަރުންނާއި ޑރ މުއިއްޒަށް ތާއީދުކުރައްވާ އެންމެހާ ފަރާތްތަކަށް ގޮވާލައްވާފަ އެވެ.

އެއާއެކު ސައީދު ވިދާޅުވީ ރިޔާސީ އިންތިޚާބުގެ ފުރަތަމަ ބުރުގެ ނަތީޖާއިން ރައްޔިތުން ހަގީގަތުގައި ގޮތް ނިންމާފައިވާ ކަމަށެވެ. އަދި ރައީސް އިބްރާހިމް މުހައްމަދު ޞާލިހަށް ދެވަނަ ދައުރެއް ދޭން ބޭނުން ނުވާކަމަށް ވޯޓުގެ ނަތީޖާއިން ބުނެދީފައިވާ ކަމަށެވެ.

އެހެންކަމުން، ރައީސް ޞާލިހު ދެން އެންމެ ރަނގަޅުވާނީ ރީތިގޮތުގައި ވެރިކަން ނިންމަވާލެއްވުމަށް ފަހު ވަޑައިގަތުންކަމަށް ސައީދު ވަނީ ވިދާޅުވެފަ އެވެ. އަދި ދެވަނަ ބުރުގެ ވޯޓު ގަޑުބަޑުކުރުމަށް މަސައްކަތްޕުޅު ކުރެއްވި ނަމަވެސް، އެ ފުރުސަތު ނުދެއްވާނެކަމަށް ސައީދު ވިދާޅުވި އެވެ.