30 ސެޕްޓެމްބަރުގެ ވޯޓު ޤައުމީކަމަށް ހައްދަވާ، މުއިއްޒަށް ވޯޓުދެއްވާ: ނާޒިމް

30 ސެޕްޓެމްބަރުވާ ދުވަހު ލާ މިއަހަރުގެ ރިޔާސީ އިންތިޚާބުގެ ދެވަނަ ބުރުގެ ވޯޓަކީ ޤައުމީ ކަމަށް ހައްދަވާ ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒަށް ވޯޓުދެއްވުމަށް މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް މުހައްމަދު ނާޒިމް އެދިވަޑައިގެންފި އެވެ.

ނާޒިމް މިފަދައިން ވިދާޅުވެފައި ވަނީ ހއ މާރަންދޫގައި ބޭއްވި ޑރ މުއިއްޒުގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.

ރިޔާސީ އިންތިޚާބުގެ ދެވަނަ ބުރުގައި ޑރ މުއިއްޒުގެ ފަހަތްޕުޅަށް އަރާވަޑައިގަތީ ޤައުމީ ވިސްނުމުގައި، މިހާރު ގައުމު އޮތް ހާލަތުން ސަލާމަތްކުރުމުގެ މަޤްސަދުގައިކަން ފާހަގަކުރައްވާ ނާޒިމް ވިދާޅުވީ މި މަަސައްކަތުގައި ހުރިހާ ދިވެހި ރައްޔިތުން ވެސް ގުޅިވަޑައިގަންނަވަން ޖެހިވަޑައިގަންނަވާ ކަމަށެވެ.

މި ސަރުކާރުގެ ފަސް އަހަރަށް ބަލާއިރު ރައްޔިތުންގެ ފުދުންތެރިކަން އިތުރުކުރުމަށް ހަގީގީ މާނައިގައި އެއްވެސް ކަމެއް ކޮށްދެވިފައި ނުވާކަމަށް ނާޒިމު ވިދާޅުވި އެވެ. އެގޮތުން ބޯހިޔާވަހިކަން ފޯރުކޮށްދިނުމަށާއި، އިޤްތިޞާދު ހަރުދަނާކުރުމަށް ވެސް އެކަށިގެންވާ މަސައްކަތްތަކެއް ކުރެވިފައި ނުވާކަން އޭނާ ފާހަގަކުރެއްވި އެވެ.

އެއާއެކު ނާޒިމް ވިދާޅުވީ 30 ސެޕްޓެމްބަރުގައި ރައްޔިތުން ވޯޓުލާން ނިކުންނައިރު، މި ކަންކަމާއި ދޭތެރޭގައި ވަރަށް ފުންކޮށް ވިސްނާވަޑައިގަތުމަށް އެދިވަޑައިގަންނަވާ ކަމަށެވެ. އަދި އެ ދުވަހު ލާ ވޯޓަކީ ޤައުމީކަމަށް ހައްދަވާ މިހާލަތު ބަދަލުކުރުމުގެ ފުރުސަތު ޑރ މުއިއްޒަށް ދެއްވުމަށް ނާޒިމް ވަނީ އިލްތިމާސްކުރައްވާފަ އެވެ.

"އަޅުގަނޑަށް އެބަ ފެނޭ އަޅުގަނޑުމެންގެ ކެންޑިޑޭޓު ހުވާކުރައްވާތަން. އެކަމަކު މިކަން އަޅުގަނޑުމެންނަށް ވާން އަންނަނީ ތިޔަ ލޮބުވެތި ރައްޔިތުން ނިކުމެވަޑައިގެން ޤައުމީ ކަމެއްގެ ގޮތުގައި މިކަން ކުރައްވައިގެން"

އެމްއެންޕީގެ ރައީސް ނާޒިމް

ނާޒިމް ވިދާޅުވީ ޑރ މުއިއްޒާއި އެކު ވަރަށް ގާތުން މަސައްކަތްޕުޅު ކުރެވިފައިވާ ކަމަށެވެ. ޑރ މުއިއްޒާއި ނާޒިމަކީ ރައީސް ޔާމިނުގެ ސަރުކާރުގައި ކެބިނެޓުގައި ވެސް މަސައްކަތްޕުޅު ކުރެއްވި ދެ ބޭފުޅުންނެވެ.

އެ ދުވަސްވަރު އެކުގައި ކުރެވުނު ބައެއް މަސައްކަތްތަކަށް އަލިއަޅުވާލައްވާ ނާޒިމް ވިދާޅުވީ ޑރ މުއިއްޒަކީ ކެބިނެޓުގެ ވަޒީރެއްގެ ގޮތުގައި މަސައްކަތްޕުޅު ކުރެއްވިއިރު ވެސް، ނަތީޖާ ނެރެދެއްވާ ހަވާލު ކުރެވޭ މަސައްކަތްތައް ވަގުތަށް ނިންމަވާ ބޭފުޅެއްކަން ފާހަގަކުރެވިފައިވާ ކަމަށެވެ.

އެހެންކަމުން، ގައުމު މިހާރު މިއޮތް ހާލަތުން ބަދަލުކޮށް، ގައުމުގެ މިސްރާބު ރަނގަޅުކުރުމުގެ މަސައްކަތް ޑރ މުއިއްޒު ކުރައްވާ، އެ ވިދާޅުވާ ހެޔޮ ނަތީޖާތައް އެމަނިކުފާނު ނެރެދެއްވާނެކަމުގެ ފުރިހަމަ ޔަގީންކަން އޮތް ކަމަށް ނާޒިމް ވަނީ ވިދާޅުވެފަ އެވެ.