އިންޑަސްޓްރިއަލް ރިލޭޝަންސް ބިލަށް ދިވެހި ނަމެއް ކިޔަން އިސްލާހެއް!
ސަރުކާރުގެ ފަރާތުން މަރަދޫ ދާއިރާގެ މެމްބަރު އިބްރާހިމް ޝަރީފް ހުށައަޅުއްވާފައިވާ އިންޑަސްޓްރިއަލް ރިލޭޝަންސްގެ ބިލަށް ދިވެހި ނަމެއް ކިޔުމަށް އިސްލާހެއް ހުށައަޅައިފި އެވެ.
2023 ވަނަ އަހަރުގެ މަޖިލީހުގެ ތިންވަނަ ދައުރުގެ 11 ވަނަ ޖަލްސާގައި "އިންޑަސްޓްރިއަލް ރިލޭޝަންސް" ބިލަށް ވަނީ ފުޅާދާއިރާއެއްގައި ބަހުސްކޮށްފަ އެވެ.
އެ ބިލަށް ބަހުސްކުރައްވަމުން މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރު ވަނީ ބިލުގެ ނަމަށް އިންޑަސްޓްރިއަލް ރިލޭޝަންސް ކިޔުމުގެ ބަދަލުގައި ދިވެހި ނަމެއް ކިޔުމަށް ހުށައަޅާފަ އެވެ. އާމިރު ވިދާޅުވީ އެ ބިލަށް ދިވެހިބަހުން ވެސް ރީތި ނަމެއް ދެވިދާނެ ކަމަށެވެ.
އެގޮތުން ބިލަށް އިންޑަސްޓްރިއަލް ރިލޭޝަންސް ބިލުގެ ނަމުގައި މަސައްކަތްތެރިންގެ ޖަމުއިއްޔާ އުފެއްދުމުގެ ބިލަށް ނަން ބަދަލުކުރުމަށް އާމިރު ހުށައެޅުއްވި އެވެ.
"މިއަދު އިންޑަސްޓްރިއަލް ރިލޭޝަންސް ބިލެއް ހުށައެޅިގެންދާއިރު، އަޅުގަނޑު ހިތަށް މި އަރަނީ މިއަށް އިނގިރޭސި ނަމެއް ކިޔުމުގެ ބަދަލުގައި ދެވަނަ ނަންބަރުގައި ބުނާ މަސައްކަތްތެރިންގެ ޖަމުއިއްޔާ އުފެއްދުމާއި ބެހޭ ބިލު ނުކިޔުނީ ކީއްވެބާއޭ. އެހެންވީމަ އިސްލާހެއްގެ ގޮތުގައި މި މަރުހަލާގައި އެކަން އަޅުގަނޑު ހުށައަޅަން"
ކުޑަހުވަދޫ ދާއިރާގެ މެމްބަރު އާމިރު
އިންޑަސްތެރިއަލް ރިލޭޝަންސް ބިލަށް ބަހުސްކުރި ގިނަ މެމްބަރުން ވަނީ އެ ބިލުގައި ހުރި ކަންކަމަށް ތާއީދުކޮށްފަ އެވެ. މަސައްކަތްތެރިންގެ ހައްގުތަކާއި ވަޒީފާ ދޭ ފަރާތްތަކުގެ ހައްގުތައް ކަށަވަރުކުރުމަށް، އެފަދަ ބިލެއް އޮތުން މުހިންމު ކަމަށާއި، އަދި އެ ބިލުގެ މަސައްކަތް އަވަސްކުރުމަކީ މުހިންމު ކަމެއް ކަމަށް މެމްބަރުން ވަނީ ފާހަގަކުރައްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
