ބިދޭސީއެއްގެ ނަމުގައި އެވަރެޖްކޮށް 5،000 ސިމް ނަގާފައި އެބަހުރި!
ބިދޭސީއެއްގެ ނަމުގައި އެވަރެޖްކޮށް ރާއްޖޭގައި 5،000 ސިމް ކާޑު ނަގާފައި އެބަހުރި ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.
ހޯމް މިނިސްޓްރީއާއި ފުލުހުން އަދި ކަރެކްޝަނަލް ސާރވިސް ގުޅިގެން، ހޯމް ސެކްޓަރގެ މަސައްކަތްތަކާއި ގުޅޭގޮތުން މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި، ވާހަކަ ދައްކަވަމުން ސީޕީ ހަމީދު ވިދާޅުވީ، ސްކޭމް ކޯލުތަކާއި ފްރޯޑާއި ގުޅޭ ގިނަ ކުށްތައް ކުރަމުންދަނީ ފޯނު މެދުވެރިކޮށް ނުވަތަ އޮންލައިންކޮށް ކަމަށެވެ. އަދި އެފަދަ ކުށްތައް ހުއްޓުވުމަށް ގިނަ މަސައްކަތްތަކެއް ކުރެވި ގިނަ މައުލޫމާތު ތަކެއް ހޯދިފައިވާ ކަމަށްވެސް އޭނޭ ވިދާޅުވިއެވެ.
އެގޮތުން، ތަހުގީގު ކުރުމުގެ ތެރެއިން އެނގުނު ގޮތުގައި ރާއްޖޭގައި ގަނެފައިވާ ސިމްކާޑުތަކުގެ ތެރެއިން އެންމެ ގިނަ ކާޑު ގަނެފައިވަނީ ބިދޭސީންގެ ނަމުގައި ކަމަށެވެ. އަދި ކޮންމެ ބިދޭސީއަކަށް އެވަރެޖްކޮށް5،000 ސިމް ނަގާފައިވާ ކަމަށާއި އެއީ ކުރިން ރާއްޖޭގައި އުޅެފައިވާ ބިދޭސީން ކަންވެސް އޭނާ ފާހަގަކުރެއްވިއެވެ.
"ދިވެހިރާއްޖޭގައި އެންމެ ގިނަ އަދަދަކަށް ސިމްކާޑު ބަަލައިގެންފައި ނުވަތަ ގަނެފައި ތިބި ފަރާތްތަކަށް ބަލާއިރުގައި އެންމެ ޓޮޕް 5 ގައި ތިބީ ބިދޭސީން. ދިވެހިރާއްޖޭގައި ނޫޅޭ ބިދޭސީން. ކޮންމެ މީހަކަށް އެވްރެޖްކޮށް 5،000 ސިމް ކާޑު،"
ކޮމިޝަނަރ އޮފް ޕޮލިސް މުހައްމަދު ހަމީދު
މިއާއެކު ސީޕީ ހަމީދު ވަނީ، އެފަދަ ސްކޭމް ކޯލިތައް ހުއްޓުވުމަށް ކުރެވުނު މަސައްކަތް ތަކުން ފިޔަވަޅު އެޅިފައިވާ ފަރާތްތަކާއި އެނޫންވެސް އެކަމާއި ގުޅޭ ތަފާސްހިސާބުތައް ހިއްސާ ކުރައްވާފައެވެ.
އެގޮތުން މިދިޔަ ހަތަރު އަހަރު ކުރެވުނު މަސައްކަތުގެ ތެރެއިން ސްކޭމް ކޯލްތައް ހުއްޓުވަން 3،130 ފިޔަވަޅު އަޅާފައިވާއިރު، 2،796 ސިމް ކާޑުތައް ފުލުހުން މެދުވެރިވެގެން ހިދުމަތް ކަނޑާލި ކަމަށާ، 817 މޮބައިލް ފޯނެއް ރާއްޖޭގެ އެއްވެސް ޓެލެކޮމިއުނިކޭޝަން ޕްރޮވައިޑާއެއްގެ ތެރޭގައި ބޭނުން ނުކުރެވޭ ގޮތަށް ބްލޮކް ކުރުމުގެ އިތުރުން އަށް އައިޕީ އެޑްރެސް ބްލޮކް ކުރި ކަމަށް އޭނާ ވިދާޅުވި އެވެ.
"އަޅުގަނޑުމެންނަށް އެނގޭ ވަރަކުން މިދަނީ މި ކަންކަމަށް ފިޔަވަޅު އަޅަމުން. ޖަލުތެރެއަށް ވައްދައިގެން ބޭނުންކުރާ ފޯނުތައް މި ގެންދަނީ ބްލޮކް ކުރަން މަސައްކަތް ކުރަމުން. އެކަމާ ގުޅިގެން ކޮމިއުނިކޭޝަން އޮތޯރިޓީ އޮފް މޯލްޑިވްސް އާއި އަދި ޓެލެކޮމިއުނިކޭޝަން ސާވިސަސް ޕްރޮވައިޑަރުންނާ ގުޅިގެން މަސައްކަތްތަކެއް ކުރަމުން. އަދިވެސް އޭގައި އެ ބަހުރި ގޮންޖެހުންތަކެއް،"
ކޮމިޝަނަރ އޮފް ޕޮލިސް މުހައްމަދު ހަމީދު
ހަމީދު އިތުރަށް ވިދާޅުވީ، ދިވެހިންގެ ޒާތީ މައުލޫމާތުތައް ރައްކާތެރި ނުކުރެވުމަކީ އަވަހަށް މައްސަލަ ހައްލު ކުރަން އޮތް ހުރަހެއް ކަމަށާ، އެހެންވެ، މުވާސަލާތީ ހިދުމަތް ދޭ މީހުންނާއެކު މަސައްކަތްތަކެއް ކުރަމުން އަންނަ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
