ހަފްތާ 14ގެ 161 ވައުދު: ފުށިދިއްގަރުފަޅު ހިއްކުމުގެ ޢަމަލީ މަސައްކަތް ފަށަނީ

އިންތިޚާބީ ރައީސް ޑރ މުހައްމަދު މުޢިއްޒުގެ ސަރުކާރުގެ ފުރަތަމަ 14 ހަފްތާގެ ތެރޭގައި އެމަނިކުފާނުގެ އެންމެ މުހިންމު ބޯހިޔާވަހިކަމުގެ އެއް މަޝްރޫޢު ކަމަށްވާ ކ.ފުށިދިއްގަރުފަޅު ހިއްކުމުގެ ޢަމަލީ މަސައްކަތް ފަށާނެކަން ހާމަކޮށްފިއެވެ.

ޑރ މުޢިއްޒުގެ ފުރަތަމަ 14 ހަފްތާގެ ވަޢުދުތައް ރޭ ހާމަކޮށްފައިވާއިރު، ކެންޕެއިން ތެރެއިންވެސް އެމަނިކުފާނު ވިދާޅުވިފަދައިން އައު ސަރުކާރުގައި އެންމެ އިސްކަންދޭނެ އެއް ކަމަކަށް ހިމަނާފައިވަނީ ބޯހިޔާވަހިކަން ކަށަވަރު ކުރުމެވެ.

އެގޮތުން ބޯހިޔާވަހި ކަމުގެ މައްސަލައަށް ހައްލު ހޯދުމަށް ޓަކައި މުއިއްޒުގެ 14 ހަފްތާގެ 161 ވައުދުގައި ރަށް ރަށުގައި ބޯހިޔާ ވަހިކަމަށް ދޫކޮށްފައިވާ ފްލެޓާއި ރޯހައުސް ތަކަށް މަހުން މަހަށް ދައްކަން ޖެހޭ އަދަދު ކުޑަ ކޮށްދިނުމާއި، ބޯހިޔާ ވަހި ކަމަށް "ގެދޮރުވެރިކަމުގެ ޓްރަސްޓް ފަންޑް" އެއް ގާއިމް ކުރުމުގެ މަސައްކަތް ކުރުން ހިމަނާފައިވެއެވެ.

އަދި ބޯހިޔާވަހިކަމަށް އެޕްލިކޭޝަން ހުށައެޅުމާއިއެކު ރައްޔިތުންނަށް އެޕްލިކޭޝަންގެ ދަރަޖަ އެނގޭ ވަގުތުން ދަރަޖަ ފެންނަ ފަދަ ޕޯޓަލް އެއް ގާއިމް ކުރުންވެސް ވަނީ ހިމަނާފައެވެ.

މީގެ އިތުރުންވެސް ސިނަ މާލެ އާއި މާލެ ހިޔާ ފްލެޓް ތަކުގައި ދިރިއުޅޭ ފަރާތް ތަކަށް ޚާއްސަ ބޯހިޔާވަހިކަމުގެ މަޝްރޫއެއް އަކާއި، ބޯހިޔާވަހިކަމަށް ހާއްސަކޮށް ހިއްކަން ކަނޑައަޅާފައިވާ ފުށި ދިއްގަރު ފަޅު ހިއްކުމުގެ އަމަލީ މަސައްކަތްތައްވެސް އެ 14 ހަފްތާތެރޭގައި ފަށާނެ ކަމަށް މުއިއްޒުގެ ވައުދު ފޮތުގައި ވެއެވެ.

މުޢިއްޒުގެ ބޯހިޔާވަހިކަމުގެ މެނިފެސްޓޯ އިޢުލާނު ކުރުމަށް ބޭއްވި ޖަލްސާގައި އެމަނިކުފާނު ވަނީ ފުށިދިއްގަރުފަޅުން 1،200 ހެކްޓަރުގެ ބޮޑު ސަރަހައްދެއް ހިއްކާނެ ކަމަށް ވިދާޅުވެފައެވެ. އަދި އެތަނުގައި 65،000 ގޯތި ނުވަތަ ފްލެޓް ދޭނެ ކަމަށް އެމަނިކުފާނު އިޢުލާނުކުރެެއްވިއެވެ.