ރާއްޖެއަށް ކޮންމެ ގޮތެއް ވިޔަސް ވަރިހަމަ ކަމަށް ނިންމުމަކީ ގައުމަށް ޣައްދާރުވުން: ރައީސް

ރައްޔިތުންނަށާއި މި ލޮބުވެތި ދިވެހި ރާއްޖެއަށް ކޮންމެ ގޮތެއްވިޔަސް ވަރިހަމަ ކަމަށް ނިންމުމަކީ ދިވެހި ދައުލަތަށާއި މި ލޮބުވެތި ދިވެހި އާއިލާއަށް ކަނޑައެޅިގެން ޣައްދާރުވުން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ މިރޭ ބޭއްވި ހުރަވީ ދުވަހުގެ ހާއްސަ ޖަލްސާގައި ވާހަކަފުޅު ދައްކަވަމުންނެވެ.

"ގާނޫނި ސަރުކާރަކަށް ލޮޅުން އަރުވާލަން އަދި ވަކިން ހާއްސަކޮށް ތިމާމެންގެ އާރާއި ބާރު ދައްކާލަން ބޭނުންވީމާ ރައްޔިތުންނަށާއި މި ލޮބުވެތި ދިވެހި ރާއްޖެއަށް ކޮންމެ ގޮތެއްވިޔަސް ވަރިހަމަ ކަމަށް ނިންމުމަކީ ދިވެހި ދައުލަތަށާއި މި ލޮބުވެތި ދިވެހި އާއިލާއަށް ކަނޑައެޅިގެން ޣައްދާރުވުން. ގައުމަށް ދެރަ ލިބޭނެހެން ކަންކަން ރާވާ ހިންގާ ގާައުމަށް ޣައްދާރުވާ މީހުންނަކީ ފިނޑި ނިކަމެތި ބައެއް."

ރައީސް ޑރ.މުއިއްޒު ވިދާޅުވިއެވެ.

މީގެ އިތުރުންވެސް އެމަނިކުފާނު ވިދާޅުވީ ހުރަވީ ދުވަހުގެ ތާރީހުގެ އަދިރިފަރާތަކީ ދިވެހި ރާއްޖެ ދެމި އޮތްހާ ދުވަހަކު ދިވެހި ދަރިން އެއިން ފިލާވަޅު ނަގަން ޖެހޭ ކަމެއްކަމަށެވެ.

ރައީސް އިތުރަށް ފާހަގަކުރެއްވީ އަމިއްލަ ޤައުމަށް ޚިޔާނާތްތެރިވި ބަޔަކު އެހެން ބަޔަކަށް، ޤައުމަކަށް ތެދުވެރިވާނެތޯ ސުވާލު އުފައްދަމުން ހޮޅިން ޝަމްސުއްދީނާއި މުޙްޔުއްދީން ކަނޑުފައްތައި މެރިކަމެވެ.

"ޝަމްސުއްދީނާއި މުޙްޔުއްދީނަކީ ދިވެހި ދައުލަތުގެ މަތި ފަނޑީގައި ތިއްބެވި ދެ ބޭފުޅުން. ވެރިކަމުގެ ދަހިވެތިކަމުގައި ބޭރުގެ ބާރެއްގެ އެހީ އެ ދެ ބޭފުޅުން ހޯއްދެވި. އަދި ކަނޑައެޅިގެން ދޮގު ވާހަކަތައް އެއްފަހަރަށްވުރެ ގިނަ ފަހަރު ސިޓީބިޓީގެ ޒަރީއާއިން ހޮޅިންނަށް ލިޔުއްވި. ނަތީޖާއަކަށްވީ ހޮޅީންގެ ލަޝްކަރު މާލެ އަރައި މާލެ ސުންނާފަތިކޮށްލުން،"

ރައީސް ޑރ މުހައްމަދު މުޢިއްޒު ވިދާޅުވިއެވެ.

ކުރިން ހޯމް މިނިސްޓްރީން އިންތިޒާމް ކުރަމުން އައި ހުރަވީ ދުވަހުގެ ހަރަކަތްތައް މި އަހަރު އިންތިޒާމްކޮށްފައިވަނީ ޤައުމިއްޔަތު ދިރުވުމަށް އަލައް އުފައްދާފައިވާ ދިވެހިބަހާއި ޘަޤާފަތާއި ތަރިކަ އާއި ބެހޭ ވުޒާރާގެ ފަރާތުންނެވެ.

މިއަހަރުގެ ހުރަވީ ދުވަހުގެ ޖަލްސާވެގެން ގޮސްފައިވަނީ 5 އަހަރަށްފަހު ގައުމުގެ ރައީސް ބައިވެރިވެވަޑައިގެން ކުލަގަދަ ގޮތެއްގައި ފާހަގަ ކުރާ ފުރަތަމަ ހުރަވީ ދުވަހުގެ ޖަލްސާކަން ފާހަގަކޮށްލަންޖެހެއެވެ.

ހުރަވީ ދުވަހަކީ އިންޑިއާގެ މަލާބާރުން ނުވަތަ ހޮޅިން މާލެއަށް އަރައި މާލޭގެ މައްޗަށް ވެރިވެގެން ތިބި ތިބުން ދޮންބަންޑާރައިން ނިމުމަކަށް ގެންނެވި ދުވަސްގޮތުގައި ފާހަގަކުރާ ދުވަހެވެ.