ރަސްމާލެ މަޝްރޫޢުއާމެދު ނަޝީދުގެ އޮތީ ދެ މައްސަލައެއް، އެދިވަޑައިގަތީ ގާނޫނީ އޮނިގަނޑު ފާސްކުރަން
ލިޔުންތެރިޔާ
އަހުމަދު ހަމީދު އާދަމް
ރަސްމާލެ މަޝްރޫޢުއާމެދު އޮތީ ދެ މައްސަލައެއް ކަމަށާ އެ މަޝްރޫއުއަށް ބޭނުންވާ ގާނޫނީ އޮނިގަނޑު ފާސްކުރަން ޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު މިހެން ވިދާޅުވީ އެކްސްގައި ކުރެއްވި ޕޯސްޓެއްގަ އެވެ. އެމަނިކުފާނުގެ ޕޯސްޓްގައި ވިދާޅުވީ އުސޫލެއްގެ ގޮތުން ރެސިޑެންސީ ޕްރަގްރާމްއަކަށް ރާއްޖެ ހުޅުވާލުމަކީ ރަނގަޅު ކަމެއް ކަމަށެވެ. ނަމަވެސް މި ސަރުކާރުން އީގަލް ހިލްސްއާއެކު ވެފައިވާ އެއްބަސްވުން އަދި އާންމު ނުކުރައްވާ ކަމަށާ މިހާތަނަށް އިވިފައިވާ ވާހަކަތަކުން އޮތީ ދެ މައްސަލައެއް ކަމުގައި ނަޝީދު ވިދާޅުވި އެވެ.
އެއީ އެ މަޝްރޫއުއަށް އެޑްވާސް ފައިސާަ ލިބިފައި ނެތުމާއި މާލެ ސަރަހައްދުގައި އެ މަޝްރޫއު ހިންގުން ކަމަށެވެ.
"އަޅުގަނޑަށް ފެންނަ ގޮތުގައި ސަރުކާރަށް އެންމެ ރަނގަޅު ގޮތަކަށްވާނީ ކޮންޓްރެކްޓް އަވަހަށް މަޖިލީހަށް ފޮނުވުން. މި ސަރުކާރުގެ އަގުލަބިއްޔަތުން މި މަޝްރޫއުއަށް ބޭނުންވާ ގާނޫނީ އޮނިގަނޑު ފާސްކުރުން," ނަޝީދު ވިދާޅުވި އެވެ.
ނަޝީދު މިހެން ވިދާޅުވިއިރު ބަންޑާރަ ނާއިބު އަހްމަދު އުޝާމް ވަނީ އެ މަޝްރޫއު ހިނގާނީ މިހާރު އެކުލަވައިލަމުން އަންނަ ރިއަލް އެސްޓޭޓް ގާނޫނުގެ ދަށުން ކަމަށް ވިދާޅުވެފަ އެވެ.
މިހާތަނަށް ސޮއިކޮށްފައިވަނީ ހަމައެކަނި ލެޓާ އޮފް އިންޓެންޓް އެބަހީ ކޮމާޝަލް ޓާމްސް އެގްރީމެންޓެއްގައި ކަމަށާއި މަޝްރޫޢު ފެށުމުގެ ކުރިން އެ ޓާމްސްތަކުގެ މައްޗަށް ބިނާކޮށް އިތުރު މަޝްވަރާކުރެވި ޑެފިނިޓިވް އެގްރީމެންޓްތަކެއްގައި ސޮއިކުރަން ޖެހޭނެ ކަމަށާއި އެކަމާ ގުޅުން ހުރި ގާނޫނުތައް ރައްޔިތުންގެ މަޖިލީހުން ފާސްކުރަން ޖެހޭނެ ކަމަށް ވެސް ވިދާޅުވި އެވެ.
މި މަޝްރޫޢު ކުރިއަށް ގެންދިޔުމުގައި ގާނޫނުއަސާސީއާއި ގާނޫނުތަކާ ހިލާފު އެއްވެސް ކަމެއް ސަރުކާރުން ނުކުރާނެ ކަމަށް ވެސް ބަންޑާރަނައިބު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
