ޝަހީމް އިމްރާނަށް: ތިއުޅެނީ ޖެއްސުންކުރަންތަ، މާ އުނދަގޫ ބޮޑުވަންޏާ ގެއަށް ވަޑައިގަންނަވަންވީނު؟
މަގާމުގެ މަސްއޫލިއްޔަތު އަދާނުކުރައްވާކަމަށް ތުހުމަތު ކުރައްވައި، ހޯމް މިނިސްޓަރު އިމްރާން އަބްދުﷲ މަގާމުން އިސްތިއުފާ ދެއްވުމަށް ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ހުސެއިން ޝަހީމް (އަނދުން ހުސެއިން) ގޮވައިލައްވައިފިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، އެއާޕޯޓަކުން ރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސް އާއި ފީ ނެގުމާއި ބެހޭ ގާނޫނަށް އިސްލާހު ގެނައުމުގެ ބިލަށް ބަހުސްކުރައްވަމުން ހުސައިން ޝަމީމު ވަނީ، ހޯމް މިނިސްޓަރަށް ނުދެނީ ކޮން ބާރެއްތޯއާއި ދިން ބާރުތަކުގެ ތެރެއިން ހައްޔަރުކުރެވުނީ ކޮން ބައެއްތޯ ސުވާލު އުފައްދަވައިފައެވެ.
"ކޮންބާރެއްހޭ ނުދެވެނީ ކޯޗެއްހޭ އިތުރަށް ފާސްކޮށް ދޭންވީ. ޓެރަރިޒަމްގެ ގޮތުގައި، ޓެރަރިސްޓުންގެ ގޮތުގައި 30، 40، 50 މީހުން އެބަތިއްބޭ އެބަ ވިދާޅުވޭޭ. ކާކުހޭ ހައްޔަރު ކުރީ. ކިހިނެއްހޭ ވެގެން މިއުޅެނީ. ޖެއްސުން ކުރަންތަ؟ މާ އުނދަގޫ ބޮޑުވަންޏާ ގެއަށް ވަޑައިގަންނަވަންވީނު،" ހުސައިން ޝަމީމު ވިދާޅުވިއެވެ.
ހުސައިން ވިދާޅުވީ، ކުރީގެ ސަރުކާރުގެ ވަގުން ހިފާ ހައްޔަރުކުރާނެ ކަމަށް ރައްޔިތުންނަށް އޭނާ ވައުދުވެފައިވާނެ ކަމަށެވެ. އެކަމާ ރައްޔިތުން މިއަދު އޭނާ އާއި ސުވާލުކުރަމުންދާއިރު، އެކަންކަން ނުކުރެވިފައި ހުރުމުން ރައްޔިތުންނަށް ޖަވާބުދާރީ ނުވެވިފައި ހުންނެވި ކަމަށް ވިދާޅުވިއެވެ.
ހުސައިން ވިދާޅުވީ، ދައުލަތުގެ ފައިސާ އަށް ޚިޔާނާތްތެރިވި މީހުންނާއި މެދު ފިޔަވަޅު އަޅަން ބޭނުންވާ ބާރުވެރިކަން ތަންފީޒީ އިދާރާތަަކަށް ދީފައިވާ ކަމަށާއި، އެފަދަ ތުހުމަތުތައް ކުރެވޭ މީހުންގެ މައްސަލަ ނުބެލޭ ސަބަބު ސާފުކުރަން އެ އިދާރާތައް މަޖިލީހަށް ހާޒިރުކޮށްް ސުވާލުކުރަން ޖެހޭ ކަމަށެވެ.
''އޭ ކިހިނެތް ވެފާހޭ ތިތިބެނީ. ކޮބާހޭ ދިން ބާރު. ކޮބާހޭ ރައްޔިތުންގެ ފައިސާ ހެސްކިޔަފަ ކައިފަ، މިއަދުވެސް ކެނޑިޑޭޓުންނަށް ވެގެން ތަންތަނަށް ކުރިމަތިލަނީ. ހެސްކިޔާފަ ކެމްޕެއިން ކުރަނީ،'' ހުސައިން ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
