އޯޑިއޯގެ މައްސަލައިގައި އަލީ ވަހީދަށް ފިޔަވަޅު އަޅަން ގޮވާލައިފި

ސަރުކާރުގެ ވަޒީރުންނަށް ނިސްބަތް ކުރައްވައި ޓޫރިޒަމް މިނިސްޓަރު އަލީ ވަހީދު ކަމަށްބުނާ މީހަކު ބޭއަދަބީ ބަހުން ދައްކަވާފައިވާ އޯޑިއޯތަކެއްގެ މައްސަލައިގައި، އަލީ ވަހީދަށް ފިޔަވަޅު އަޅަން ޖުމްހޫރީ ޕާޓީގެ ކައުންސިލު މެންބަރުން ގޮވާލައިފިއެވެ.

އަލީ ވަހީދަކީ ޖުމްހޫރީ ޕާޓީގެ ސްލޮޓެއްގައި ވަޒީރުކަމުގައި ހުންނެވި ބޭފުޅެކެވެ.

ސަރުކާރުގެ ވަޒީރުންނަށާއި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ހަގު އަނބިކަނބަލުން އަދި ޓްރާންސްޕޯޓު މިނިސްޓަރު އައިޝަތު ނަހުލާއަށް ގުޅުއްވައި އަލީ ވަހީދު ކަމަށް ބެލެވޭ މީހަކު ވަނީ ވަރަށް ދަށުދަރަޖައިގެ ބަހުން ވާހަކަދައްކަވައިފައެވެ.

ޖޭޕީގެ ކައުންސިލު މެންބަރުންގެ ވަޓްސްއެޕް ގްރޫޕުގައި ބައެއް މެންބަރުން ވަނީ މިނިސްޓަރު ނަހުލާއާ ގުޅޭ ގޮތުން ދެއްކެވި ދަށު ދަރަޖައިގެ ވާހަކަތަކަށް އޭނާ އަށް ފިޔަވަޅު އަޅަން ގޮވައިލާފައެވެ.

އަލީ ވަހީދުގެ އަޚުލާގާއި ދަށު ދަރަޖައިގެ އަމަލުތައް އޯޑިއޯއާ އެކު އާއްމުވެއްޖެ ކަމަށް ވިދާޅުވެ، މެންބަރުން ވަނީ އަލީ ވަހީދު ޕާޓީން ވަކިކުރުމަށް ޕާޓީގެ ލީޑަރު ގާސިމް އިބްރާހީމަށް ގޮވައިލައްވައިފައެވެ.

އަދި އެފަދަ އަޚުލާގެއް ނެތް މީހުން ވަގުތުން ޕާޓީން ބޭރުކުރަން ޖެހޭ ކަމަށް ވިދާޅުވެ މެންބަރުން ވަނީ އަލީ ވަހީދާ މެދު ވަރަށް ބޮޑަށް ނުރުހުންފާޅުކުރައްވައިފައެވެ.

މިނިސްޓަރު ނަހުލާއަށް ފުރައްސާރަކޮށް، އަލީ ވަހީދު ކަމަށް ބުނާ މީހަކު ވާހަކަ ދައްކަވާފައިވަނީ ނަހުލާއާ އެވެ. ފޯނުން ދެއްކެވި ވާހަކައިގައި ނަހުލާ ވަނީ މިއަދު އިރުއެރީ ކޮން ކޮޅަކުންތޯ ސުވާލު ކުރައްވައިފައެވެ. ޖަވާބުގައި އަލީ ވަހީދު ވަނީ މިއަދު އިނީ ހަމަ އިރުމައްޗާ ދިމާލަށް އެންޓަނާއަކަށް ދިދަ ނަގައިގެން ކަމަށް ވިދާޅުވެފައެވެ.

މިނިސްތަރު ނަހުލާގެ އިތުރުން ހެލްތް މިނިސްޓަރު އަބްދުﷲ އަމީނާއި އެޑިޔުކޭޝަން މިނިސްޓަރު ޑރ. އައިޝަތު އަލީއާއި މަޖިލީހުގެ ރައީސް މުހައްމަދު ނަޝީދަށް ނިސްބަތްކުރައްވާ ހަޑިހުތުރު ބަހުން އަލީ ވަހީދު ކަމަށް ބުނާ އެމީހާ ވަނީ ވާހަކަދައްކަވައިފައެވެ.

އޭގެއިތުރުން އަށް ލައްކަ ރުފިޔާގެ ދަރަނިން ސަލާމަތްވުމަށް ސަރުކާރުގެ ތެރެއިން ކޮރަޕްޝަންގެ އަމަލެއް ހިންގުމާއި ގުޅޭގޮތުންވެސް ލީކުވި އޯޑިއޯއެއްގައި މަޝްވަރާ ކުރައްވާފައި ވެއެވެ.