ރިޔާސީ އިންތިޚާބު ކާމިޔާބުކުރަން ރައީސް ޞާލިހަށް ޗެލެންޖެއް ނެތް: ތަރުޖަމާނު
ކުރިއަށް އޮތް ރިޔާސީ އިންތިޚާބު ކާމިޔާބުކުރަން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް އެއްވެސް ޗެލެންޖެއް ނުވަތަ ހުރަހެއް ނެތްކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.
ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީން ވަކިން ނިކުތުމަށް އިއުލާނު ކުރުމާއި ގުޅިގެން ރައީސް ޞާލިހު އަމަލުކުރައްވާނެ ގޮތަކާއި ގުޅިގެން ބޮޑެތި ސުވާލުތަކެއް އުފެދިފައިވާ މި ދަނޑިވަޅުގައި ނޫސްވެރިއަކު ވަނީ މިއަދު ރައީސް އޮފީހުން ބޭއްވި ޕްރެސް ކޮންފަރެންސްގައި އެކަމާއި ގުޅޭގޮތުން ސުވާލުކޮށްފަ އެވެ.
ކޯލިޝަނަކާއެކު ރިޔާސީ އިންތިޚާބު ކާމިޔާބު ކުރައްވާނެ ކަމުގެ ފުރިހަމަ ޔަގީންކަށް ރައީސް ޞާލިހު ދެއްވާފައިވަނިކޮށް ކޯލިޝަންގެ އެންމެ މުހިންމު ހިއްސާދާރުކަމަށްވާ ޖުމްހޫރީ ޕާޓީން ވަކިން އިންތިޚާބަށް ނުކުތުމަށް ނިންމުމަކީ ރިޔާސީ އިންތިޚާބު ކާމިޔާބު ކުރުމަށް ކިހާވަރެއްގެ ޗެލެންޖަކަށް ވާނެތޯ ނޫސްވެރިއަކު ވަނީ ސުވާލުކޮށްފަ އެވެ.
އޭގެ އިތުރުން ޖޭޕީން ވަކި ކެންޑިޑޭޓެއް ނެރޭހިސާބުން ދެން ސަރުކާރުން އަމަލުކުރާނެ ގޮތަކީ ކޮބައިތޯ ވެސް ނޫސްވެރިޔާ ސުވާލު ކުރިއެވެ.
އެ ސުވާލުތަކަށް ޖަވާބުދެއްވަމުން ރައީސް އޮފީހުގެ ތަރުޖަމާނު ވިދާޅުވީ މިހާރު ވެސް ރައީސް ޞާލިހުގެ ފަހަތްޕުޅުގައި އަދާލަތާއި އެމްޑީއޭ އޮތް ކަމަށެވެ.
އެ ދެޕާޓީ އެކަނި އޮތަސް، ރައީސް ޞާލިހު އިންތިޚާބު ކާމިޔާބު ކުރައްވާނެ ކަމަށާއި، ޖުމްހޫރީ ޕާޓީގެ އެ ނިންމުމަކީ އިންތިޚާބު ކާމިޔާބުކުރުމަށް ރައީސް ޞާލިހަށް ޗެލެންޖެއް ކުރިމަތިވާނެ ކަމެއް ނޫންކަމަށް މިއުވާނު ވިދާޅުވި އެވެ.
"ރައީސްއަށް ޗެލެންޖެއް ނޫން އޭކީ. ރައީސްއަށް މިހާރު އޮތް ކޯލިޝަނާއެކު އަދި ރައީސްއާއެކު ކުރިއަށް ވަޑައިގަންނަވަން ދެން ތިއްބެވި ބޭފުޅުންނާއެކު މި އިންތިޚާބު ކާމިޔާބު ކުރެވޭނެކަމުގެ ޔަގީންކަން އެބޮތް"
ރައީސް އޮފީހުގެ ތަރުޖަމާނު މިއުވާން މުހައްމަދު
ޖުމްހޫރީ ޕާޓީން ރިޔާސީ ރޭހަށް ނިކުތުމަށް އިއުލާނު ކުރުމާއި ގުޅިގެން އެ ޕާޓީގެ ސްލޮޓުގައި ސަރުކާރުގެ އެކި މަޤާމުތަކުގައި ތިއްބެވި ބޭފުޅުން އިސްތިއުފާދެއްވުމަށް އެމްޑީޕީގައި ތިއްބެވި ރައީސް ޞާލިހު ފަޅީގެ މެމްބަރުން ވަނީ ގޮވާލާފަ އެވެ.
ޖޭޕީން ވަކި ކެންޑިޑޭޓެއް ނެރޭ ހިސާބުން ޖޭޕީގެ ސްލޮޓުތަކުގައި ތިއްބެވި ފަރާތްތައް ވަޒީފާއިން ވަކިކުރާނެތޯ ނޫސްވެރިއާ ކުރި ސުވާލަށް ރައީސް އޮފީހުގެ ތަރުޖަމާނު ސީދާ ޖަވާބެއް ދެއްވާފައެއް ނުވެއެވެ.
އެހެން ނަމަވެސް، ވިދާޅުވީ ރައީސް ޞާލިހާއި ވާދަކުރަން ރިޔާސީ ކެންޑިޑޭޓެއް ވަކިން ނެރޭނަމަ، އެފަދަ ފަރާތްތަކާއެކު ސަރުކާރު ހިންގުމަށް އަދި ރައީސް ޞާލިހުގެ ސިޔާސަތުތައް ހިންގުމަށް ދަތިވާނެ ކަމަށެވެ. އަދި އެފަދަ ހާލަތެއްގައި ދެން އަމަލުކުރާނެ ގޮތަކާއި ގުޅިގެން ރައީސް ޞާލިހު ޖޭޕީއާއި މަޝްވަރާ ކުރައްވާ ގޮތެއް ނިންމަވާނެކަމަށް މިއުވާން ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
