ބްރިޖު މަސައްކަތުގެ ފެންވަރު ދަށްވެގެން އިންޖިނިއަރުން ކަންބޮޑުވެގެން އުޅޭ އަޑެއް ނާހަން: އަސްލަމް
ތިލަމާލެ ބްރިޖުގެ މަސައްކަތް ހަވާލުކޮށްފައިވާ އިންޑިއާގެ އެފްކޮންސް ކުންފުނިން އެ މަސައްކަތް ކުރަމުންދަނީ ފެންވަރުދަށްކޮށް ކަމަށް އެއްވެސް އިންޖިނިއަރެއް ވިދާޅުވާ އަޑު މިހާތަނަށް އައްސަވާފައި ނުވާކަމަށް ޕްލޭނިން މިނިސްޓަރު އަސްލަމް ވިދާޅުވެއްޖެ އެވެ.
އަސްލަމް މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާއަށް ހަޒިރުކޮށް ސުވާލުކުރުމުގެ ތެރެއިން މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ކުރެއްވި ސުވާލަކަށް ޖަވާބުދެއްވަމުން ނެވެ.
ސައީދު ވިދާޅުވީ އެފްކޮންސް ކުންފުނިން ބްރިޖު އަޅަމުން ދަނީ ފެންވަރު ދަށްކޮށްކަން ފާހަގަކޮށް ރާއްޖޭގެ ވަރަށް ގިނަ އިނޖިނިއަރުން ކަންބޮޑުވުން ފާޅުކުރަމުންދާ ކަމަށެވެ. އަދި ބައިނަލްއަގުވާމީ ބައެއް ފަރާތްތަކުންވެސް އެ ކަންބޮޑުވުން ފާޅުކުރަމުންދާ ކަމަށެވެ.
އެހެންކަމުން އެ މަސައްކަތް ބައިނަލްއަގުވާމީ މުޖުތަމައު ގަބޫލުކުރާ ގާބިލު ކުންފުންޏަކާ ހަވާލުކުރުމުގެ ވިސްނުން ސަރުކާރުން ގެންގުޅޭތޯ ސައީދު އެއްސެވިއެވެ.
ސައީދުގެ އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ މަޖިލީހުގައި އެފަދަ ވާހަކައެއް ދައްކަވަން ވާނީ އެކަން ސާބިތުކުރެވޭވަރުގެ ހެއްކާއެއްކޮށް ކަމަށެވެ.
އެފްކޯންސްއިން ބްރިޖުއަޅަނީ ފެންވަރު ދަށްކޮށްކަން ފާހަގަކޮށް މިހާތަނަށް އެއްވެސް އިންޖިނިއަރަކު އެ ޝަރުވާ ޕްލޭނިން މިނިސްޓްރީއަށް ކޮށްފައި ނުވާކަން މިނިސްޓަރު ފާހަގަކުރެއްވި އެވެ. އަދި ބޭރުގެ ފަރާތެއް ވެސް އެފަދަ ކަންބޮޑުވުމެއް ފާޅުކޮށްފައިވާކަން އެނގިވަޑައިނުގަންނަވާ ކަމަށެވެ.
"އެފްކޯނުން ކުރާ މަސައްކަތުގެ ކޮލެޓީގައި މައްސަލައެއް އުޅޭކަމަށް ދިވެހިރާއްޖޭގެ އެބަ ބުނާކަމަށް ވިދާޅުވާ ވިދާޅުވުން ސަބްސޭންޝިއޭޓުކޮށްފަ ނޫނިއްޔާ އަޅުގަނޑު ޤަބޫލެއް ނުކުރަން މިތަނުގައި (މަޖިލީހުގައި) އެ ވާހަކަ ދެއްކޭނެ ކަމަކަށް. އަޅުގަނޑެއް އަދި މިހާތާކަށް، އެއްވެސް އިންޖިނިއަރަކު އައިސް އަޅުގަނޑާ ކަންސާނެއްގޮތަށް ރެއިސް ކުރިތަނެއް އެ އަޑެއް ނާހަން. އަދި ރާއްޖެއިން ބޭރު ބަޔަކު އެފަދަ ވާހަކައެއް ދެއްކި އަޑެއްވެސް ނާހަން"
ޕްލޭނިން މިނިސްޓަރު އަސްލަމް
ތިލަމާލެ ބްރިޖު އެޅުމަކީ ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހުގެ ރިޔާސީ ވައުދުފުޅެކެވެ. އެހެން ނަމަވެސް މި ފަސް އަހަރުތެރޭ ބްރިޖު އަޅާ ނިންމާ ނުލެވޭނެކަމަށް އެމަނިކުފާނު ވަނީ ވިދާޅުވެފައެވެ.
އޭގެ އިތުރުން ޝާޕޫރު މިސްޓްރީގެ ޝާޕޫރުޖީ ޕަލޯންޖީ (އެސްޕީ) ގްރޫޕަށް މާލީ ތާށިކަން ކުރިމަތިވެ އެ ކުންފުނީގެ ދަށުން ހިންގާ އެފްކޮންސް އިންސްފްރާސްޓްރަކްޗާ ވިއްކާލަން ވަނީ ނިންމާފަ އެވެ.
މި ނިންމުމާއެކު އެ ކުންފުންނިން ބްރިޖުގެ މަސައްކަތް ނިންމާނެކަމާމެދު ރައްޔިތުންގެ މަޖިލީހުގެ ބައެއް މެމްބަރުން ދަނީ ސުވާލު އުފައްދަވަމުން ނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
