އުއްތަމަ ފަނޑިޔާރުގެ މަޤާމަށް ޕީޖީ ޝަމީމު ގެނައުމަށް ސިއްރު މަޝްވަރާތަކެއް ކޮށްފި!
އުއްތަމަ ފަނޑިޔާރުގެ މަޤާމަށް ޕްރޮސެކިއުޓާ ޖެނެރަލްގެ މަޤާމުގައި ހުންނެވި ހުސެއިން ޝަމީމު އައްޔަން ކުރުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ސިއްރު މަޝްވަރާތަކެއް ކުރައްވާފައިވާކަމަށް ތުހުމަތުކޮށްފި އެވެ.
އެ ތުހުމަތު ކުރައްވާފައިވަނީ ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލް ކުރެއްވި ޓްވީޓެއްގަ އެވެ.
މުޙައްމަދު އިސްމާއިލް ވިދާޅުވީ އުއްތަމަ ފަނޑިޔާރުގެ މަޤާމުން އަލްއުސްތާޛު މުއުތަސިމް އަދުނާމު ވަކިކުރުމަށްފަހު އެ މަޤާމަށް މިހާރު ޕީޖީގެ މަޤާމުގައި ހުންނެވި ހުސައިން ޝަމީމު ގެނައުމަށް ރައީސް ޞާލިހު ސިއްރު މަޝްވަރާތަކެއް ކުރައްވާފައިވާ ކަމަށެވެ.
އަދި ޕީޖީގެ މަޤާމަށް ގެނައުމަށް މަޝްވަރާކޮށްފައިވަނީ ސުޕްރިމް ކޯޓުގެ ފަނޑިޔާރު ހުސްނުއްސުޢޫދުގެ ކޮއްކޮ ޝަހުދީ އަންވަރުކަމަށް އެ ޓްވީޓުގައި ފާހަގަކޮށްފައި ވެއެވެ.
އެކަން ހާމަކުރައްވާ މުޙައްމަދު އިސްމާއިލް ވިދާޅުވީ އެއީ ސައްތައިން ސައްތަ ޔަޤީން ޚަބަރެއް ކަމަށެވެ.
އުއްތަމަ ފަނޑިޔާރު މަޤާމުން ވަކިކޮށް ހުސްނުއްސުޢޫދުގެ ކޮއްކޮ ޝަހުދީ އަންވަރު ޕީޖީ ކަމުގެ މަޤާމަށް ގެނެސް އުއްތަމަ ފަނޑިޔާރަކަށް އެމްޑީއެންގެ ( މިހާރުގެ ޕީޖީ) ޝަމީމު ހަމަޖައްސަން ރައީސް ސިއްރު މަޝްވަރާ ތަކެއް ކުރައްވައިފި. މިއީ ސައްތައިން ސައްތަ ޔަޤީން ޚަބަރެއް"
ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލް
ޝަމީމު އުއްތަމަ ފަނޑިޔާރުގެ މަޤާމަށް ގެނައުމަށް ސިއްރު މަޝްވަރާތަކެއް ކުރަން ފަށާފައިވާކަމުގެ ތުހުމަތު ކުރައްވާފައިވަނީ ރައީސް ޞާލިހުގެ އޯޑަރަށް އެމްއެމްޕީއާރުސީގެ ޚިޔާނާތާއި ގުޅިގެން ދައުވާ އުފުލާފައިވާ މި ސަރުކާރުގެ ޔޫތު މިނިސްޓަރު އަހުމަދު މަހުލޫފުގެ މައްސަލަ އަނބުތާ ގެނައުމަށް ނިންމާފައިވާ ދަނޑިވަޅެއްގަ އެވެ.
އެ މައްސަލަ އަނބުރާ ގެނައުމަށް ކްރިމިނަލް ކޯޓަށް ސިޓީ ފޮނުމަށް ޕީޖީ ޝަމީމު ދައުލަތުގެ ވަކީލުންނަށް އަންގާފައިވަނީ ރައީސް ޞާލިހު ވިދާޅުވެގެންކަމަށް ޕީޖީގެ ޕްރޮސެކިއުޓަރުންނާއި ހަވާލާދީ ރާއްޖޭގެ ބައެއް އޮންލައިން ނޫސްތަކުގައި ރިޕޯޓުކޮށްފައި ވެއެވެ.
އެކަން ޕީޖީ ޝަމީމު ދޮގުކުރައްވާފައެއް ނުވެއެވެ. އޭގެ އިތުރުން މަހުލުފުގެ މައްސަލަ އަނބުރާ ގެނައުމާއި މެދު ދެކޮޅު ހެދުމުގެ ސަބަބުން އެ މައްސަލަ ބަލާ ޕީޖީގެ ޕްރޮސެކިއުޓަރުންގެ ޓީމަށްވެސް ވަނީ ބަދަލުތަކެއް ގެނެސްފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
