ރައީސް ޞާލިހު، އަލީ ވަހީދަށް މަޢާފެއް ނުކުރައްވާ: މިއުވާން
ރައީސް އިބްރާހިމް މުހައްމަދު ޞާލިހު މި މަހުގެ ކުރީކޮޅު އިނގިރޭސިވިލާތަށް ކުރެއްވި ދަތުރުފުޅުގެ ތެރޭގައި ކުރީގެ ޓޫރިޒަމް މިނިސްޓަރު އަލީ ވަހީދާ ބައްދަލު ކުރައްވާ އޭނާއަށް ތުހުމަތު އޮތް މައްސަލަތަކުގައި މާފު ދެއްވާފައިވާ ކަމަށް ދެކެވޭ ވާހަކަތައް ސަރުކާރުން ދޮގު ކޮށްފި އެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު، އިނގިރޭސިވިލާތުގެ ރަސްގެފާނު ޗާލްސް ކޮލިލުމުގެ ރަސްމިއްޔާތަށް އިނގިރޭސިވިލާތަށް ވަޑައިގެން ކުރީގެ ޓުއަރިޒަމް މިނިސްޓަރު އަލީ ވަޙީދާ ބައްދަލުކުރައްވައި، އޭނާގެ މައްޗަށް ކުރެވޭ ގިނަ އަދަދެއްގެ އަންހެނުންނަށް ޖިންސީ ގޯނާކުރި މައްސަލައާ ގުޅިގެން ފިޔަވަޅެއް ސަރުކާރުން ދެން ނާޅާނެކަމުގެ ޔަގީންކަން ދެއްވާފައިވާ ކަމަށް "ދިޔަރެސް" ނޫހުން ވަނީ ރިޕޯޓް ކޮށްފައެވެ.
ނަމަވެސް އެ ޚަބަރުގެ ސްކްރީން ޝޮޓެއް ހިއްސާކުރައްވައި ރައީސް އޮފީހުގެ ތަރުޖަމާނު މިއުވާން މުހައްމަދު ކުރެއްްވި ޓުވީޓެއްގައި ވަނީ އެއީ ކަނޑައެޅިގެން ދޮގެއް ކަމަށް ވިދާޅުވެފައެވެ.
އަލީ ވަހީދުގެ މައްޗަށް ތުހުމަތުކުރެވެނީ ޓުއަރިޒަމް މިނިސްޓަރުގެ މަޤާމުގައި ހުންނަވައިގެން އެ މިނިސްޓްރީގެ ގިނަ އަދަދެއްގެ އަންހެން މުވައްޒަފުންނަށް ޖިންސީ ގޯނާކުރެއްވި ކަމަށެވެ. އެ ތުހުމަތު ތަކަށް އަލީ ވަހީދު އިންކާރު ކުރެ އެވެ.
އެ މައްސަލާގައި އަލީ ވަހީދުގެ މައްޗަށް ދައުވާކޮށްފައިވަނިކޮށް އެއާޕޯޓުގެ ވީއައިޕީ ލޯންޖު ބޭނުންކުރައްވައިގެން އަލީ ވަހީދުވަނީ ރާއްޖެ ދޫކުރައްވައި އިނގިރޭސިވިލާތަށް ވަޑައިގެންފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
