އެފްކޮންސް މުވަޒަފު މަރުވުން: ގުޅީފަޅުގައި އެފްކޮންސް ތަކެއްޗާއި ވެރިންނަށް ހަމަލާދީ ހާލަތު ގޯސްވެއްޖެ

ތިލަމާލެ ބްރިޖްގެ މަސައްކަތް ކުރަމުން އަންނަ އެފްކޮންސްގެ މުވަޒަފަކަށް އިހުމާލުވެ މަރުވުމާއި ގުޅިގެން އެފްކޮންސް މުވަޒަފުން ނިކުމެ ގުޅީފަޅުގައި ހަމަ ނުޖެހުން ހިނގައި ތަކެއްޗައް ގެއްލުންދޭންފަށައިފިއެވެ.

އެގޮތުން މި މަޝްރޫއުގެ މަސައްކަތުގައި އުޅުއްވާ ޕްލޭނިންގ މިނިސްޓްރީ އޮފިޝަލަކު 'ވޮއިސް' އަށް މައުލޫމާތު ދެއްވަމުން ވިދާޅުވީ އެ މީހާ ވަރަށް ބޮޑަށް ހުން އައިސްގެން ފަރުވާއަށް އެދުންތާ 10 ދުވަސް ވެފައިވާ ކަމަށެވެ.

އެހެންނަމަވެސް ފަރުވާއަށް އެދުމުންވެސް ފަރުވާ ނުލިބުމުން ހިފައްޓަމުން އައިސްފައިވަނީ ޕެނަޑޯލް ގުޅަ ކައިގެން ކަމަށެވެ.

މިހާލަތުގައި އުޅެމުން އައިސް މުވައްޒަފު މީހާ ނިޔާވެފައިވަނީ އިއްޔެގެ ވަގުތެއްގައި މަސައްކަތައް ނެރެފައި ހުއްޓައެވެ.

މި ހާދިސާގެ ސަބަބުން މަސައްކަތުގެ ސައިޓްގައި ހިތްހަމަ ނުޖެހިގެން މުވައްޒަފުން ދަނީ މުޒާހަރާކޮށް ތަކެއްޗާއި, އެފްކޮންސްގެ އިސްވެރިންނަށް ހަމަލާދެމުންނެވެ.

އެގޮތުން އެފްކޮންސްގެ ސައިޓް މެނޭޖަރަށް ވަރަށް ބޮޑަށް އަނިޔާކޮށް ބޯފަޅާލާފައިވާކަމަށް މައުލޫމާތުލިބިއެވެ.

މީގެ އިތުރުން އެފްކޮންސްގެ ހެލްތް ޕޯސްޓް ހަދާފައިވާ ކޮންޓެއިނަރ ވަނީ ތޮށިންބޭރަށް މޫދަށް ވައްޓާލާފައެވެ.

ބްރިޖް މަސައްކަތަށް އެފްކޮންސްގެ 1،000 އެއްހާ މުވައްޒަފުން ރާއްޖޭގައި އެބަ ތިއްބެވެ. އެއީ:

ގުޅީފަޅުގައި: 800 މުވައްޒަފުން

ހުޅުމާލެ-މާލެ: 200 މުވައްޒަފުން

މީގެ ކުރިން އައްޑޫގެ ސިޓީގެ މަގުތައް ތަރައްގީ ކުރުމުގައި މަސައްކަތްކުރި އެފްކޮންސް މުވައްޒަފުންނަށް މުސާރައާއި ކާނާއާއި ބޭސް ފަރުވާ ނުދިނުމުގެ މައްސަލަވެސް ފެންމަތި ވިއެވެ.

އަދި މިކަމުގެ ސަބަބުން މުވައްޒަފުން އިހްތިޖާޖު ކުރުމުން މި މުވައްޒަފުންނަށް އަނިޔާ ކުރާނެ ކަމަށް ބުނެ އިންޒާރު ދިނުމުން ފުލުހުންނާއި ހަމައަށް މުވައްޒަފުން ވަނީ މައްސަލަ ގެންގޮސްފައެވެ.

އެފޮކޮންސްގެ އިތުރުންވެސް ރާއްޖޭގެ އެތައް ތަރައްގީގެ މަޝްރޫއުތައް ހަވާލު ކޮށްފައިވާ އިންޑިއާ ކުންފުނިތަކުން މުވައްޒަފުންނަށް މުސާރަ ނުދިނުމާއި ކާން ނުދިނުމާއި ބޭސް ފަރުވާ ނުލިބުމުގެ މައްސަލަތައް ދަނީ އިތުރު ވަމުންނެވެ.

އެގޮތުން އިންޑިއާގެ ޖޭއެމްސީ ކުންފުނީގެ މުވައްޒަފުންވެސް ވަނީ މިކަމުގެ ސަބަބުން މާލޭގައި ހުންނަ އިންޑިއަން ހައި ކޮމިޝަން ކުރިމަތީގައި އިހްތިޖާޖު ކޮށްފައެވެ.

އެފްކޮންސްގެ ހަމަ ނުޖެހުން ބޮޑުވެފައިވާއިރު, މިހާތަނަށް ފުލުހުންގެ އިދާރާގެ ރަސްމީ ބަހެއް ލިބިފައެއްނުވެއެވެ.