އޮގަސްޓު މަހަށްފަހު އިންޓަނެޓްގެ އަގު ބޮޑުތަނުން ހެޔޮވާނެ: ރައީސް ޞާލިހު
2018 ވަނަ އަހަރު ވެރިކަމަށް ވަޑައިގަންނަވަން ކެންޕެއިން ކުރެއްވި އިރު ވެވަޑައިގެންނެވި ވައުދާއި އެއްގޮތަށް، އިންޓަނެޓް ގެ ޚިދުމަތުގެ އަގު ހެޔޮ ކުރެވިފައިވާ ކަމަށާ، އަދި ކުރިއަށް އޮތް އޮގަސްޓު މަހަށްފަހު ބޮޑުތަނުން އަގު ހެޔޮވެގެންދާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.
ރިޔާސީ ކެންޕެއިނަށް ވ. ރަކީދޫ އަށް ވަޑައިގެން ދެއްކެވި ވާހަކަފުޅުގައި ރައީސް ޞާލިހު ވިދާޅުވީ، ޒަމާނީ ޓެކްނޮލޮޖީއާއި އެއްވަރަށް ދިވެހިއްރާއްޖެވެސް ފައިހަމަ ކުރަން ޖެހޭ ކަމަށެވެ. އަދި އެކަމަށްޓަކައި އިންޓަރނެޓަކީ މުހިންމު ވަސީލަތެއް ކަމަށްވާއިރު، އިންޓަނެޓްގެ އަގުހެޔޮ ކުރުމަށް ވައުދުވެވަޑައިގެންނެވީވެސް އެ ސަބަބަށްޓަކައި ކަމަށް ވިދާޅުވިއެވެ.
ސަރުކާރުގެ ޚިދުމަތްތައް އަޅުގަނޑުމެން މިގެންދަނީ ޑިޖިޓަލައިޒް ކުރަމުން. ފަސޭހައިން އެމީހަކު ތިބި ތަނަކުން ޚިދުމަތް ލިބޭނެ ގޮތެއް ހޯދުން. އެގޮތުން އަޅުގަނޑުމެންގެ 2018 ވަނަ އަހަރު ވީ ވައުދާއި އެއްގޮތަށް، އިންޓަނެޓް ގެ ޚިދުމަތް އަގުހެޔޮ މިހާރު ވާނީ ކުރެވިފައި.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މިއާއެކު ރައީސް ޞާލިހް ވިދާޅުވީ އިންޓަނެޓްގެ ދުވެލި ހަލުވިކޮށް އަދި އިތުރަށް އަގުހެޔޮ ކުރެވޭނެ ގޮތްތައް ފަހި ކުރަމުންދާ ކަމަށާ، އެގޮތުން ފްރާންސްގެ މާސޭ އިން ސިންގަޕޫރަށް އެ އަޅާ ސަބްސީ ކޭބަލް ރާއްޖެއަށް އެންގަން ކުރެވުމުން ހިދުމަތުގެ އަގު ބޮޑުތަނުން ހެޔޮ ވެގެންދާނެ ކަމުގެ ޔަގީންކަން ރައީސް ވަނީ ދެއްވާފައެވެ.
"އިރާދަކުރެއްވިއްޔާ އޮގަސްޓް މަހުގެ މެެދުތެރޭގައި ފްރާންސްގެ މާސޭ އިން ސިންގަޕޫރަށް އެ އަޅާ ސަބްސީ ކޭބަލް ރާއްޖެއަށް އެންގަން ކުރެވިގެންދާނެ. ނަތީޖާއަކަށް ވެގެންދާނީ މިހާރު އަޅުގަނޑުމެންނަށް ލިބޭ އިންޓަނެޓްގެ ހިދުމަތް އަގުހެޔޮވެ ހަލުއިވެގެން ދިއުން،"
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ރައީސް ޞާލިހު އިތުރަށް ވިދާޅުވީ ސަރުކާރުގެ ކުރަން އުޅޭ ކަމަކީ ހިދުމަތުގެ ތެރެއަށް ވަނުން ނޫން ކަމަށެވެ. އެހެނެއް ކަމަކު އެކަން ކުރަން ބޭނުންވާ މީހުންނަށް ފުރުސަތު ހުޅުވާލަން ކަމަށް އެމަނިކުފާނު ވިދާޅުވިއެވެ.
"ސަރުކާރުން ކުރަން މި އުޅޭ ކަަމަކީ ކޮންމެހެން އިންޓަނެޓްގެ ހިދުމަތް ރައްޔިތުންނަށް ރީ-ޓެއިލް ހިދުމަތުގެ ތެރެއަކަށް ވަންނާކަށް ނޫން. މޮބައިލް ހިދުމަތް ދޭކަށް ނޫން. މިހާރުވެސް ހިދުމަތް އެ ދޭ ފަރާތްތަކާއި އަލުން އޭގެ ތެރެއަށް ވަންނަން ބޭނުންވާ ފަރާތްތަކަށް ފުރުސަތު ހުޅުވާލުން،"
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
ސަރުކާރުގެ އިންޓަނެޓު އަގު ހެޔޮ ކުރުމުގެ ސިޔާސަތުގެ ދަށުން އިންޓަނެޓުގެ އަގަށް ގެނައި ބަދަލާއެކު ޕެކޭޖުތަކުގެ އަގު ހެޔޮ ވެފައި ވީ ނަމަވެސް، އަގު ހެޔޮ ކުރެވުނު ގޮތާއި މެދު ގިނަ ބައެއްގެ ފާޑުކިޔުންތައް ސަރުކާރަށް ވަނީ އަމާޒުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
