ރައީސް ޞާލިޙް ރަކީދޫ ބަނދަރު ހުޅުވައިދެއްވައިފި

ރައީސް އިބްރާހިމް މުޙައްމަދު ޞާލިޙް ވ ރަކީދޫ ބަނދަރު ހުޅުވައިދެއްވައިފިއެވެ.

ރައީސް ރަކީދޫ ބަނދަރު ހުޅުވައިދެއްވައިފައިވަނީ މ. އަތޮޅަށާއި ވ. އަތޮޅަށް އެމަނިކުފާނު ކުރައްވަމުން ގެންދަވާ ކެމްޕޭނު ދަތުރުފުޅުގެ ތެރެއިންނެވެ.

ވ. ރަކީދޫ ބަނދަރު ހެދުމާއި، ގޮނޑުދޮށް ޙިމާޔަތް ކުރުމުގެ މަޝްރޫޢު ކުރިޔަށް ގެންގޮސްފައި ވަނީ، އެމްޓީސީސީއާ ޙަވާލުކުރައްވައިގެންނެވެ.

ރަކީދޫ ބަނދަރު ހެދުމުގެ މަޝްރޫޢުގެ ދަށުން، 164 މީޓަރުގެ ސަރަޙައްދުގެ އެއްގަމުތޮށިލައި، 492 އަކަމީޓަރު ސަރަޙައްދުގައި ވަނީ ޕޭވްމެންޓް އަޅާފައި ކަމަށް ސަރުކާރުން ބުނެފައިވެއެވެ. އަދި ނެރުފުންކުރުމާއި ނެރު ބައްތިޖެހުމާއި އޮޑިދޯނިފަހަރު އެހެލާ ސަރަހައްދެއް ހެދުމުގެ މަސައްކަތްވެސް މިމަޝްރޫޢުގެ ދަށުން ވަނީ ކުރިޔަށް ގެންގޮސްފައި ކަމަށް ސަރުކާރުން ވަނީ ހާމަކޮށްފައެވެ.

ބަނދަރު ހުޅުވައިދެއްވުމުގެ އިތުރުން ރައީސް ޞާލިޙް ވަނީ ރަކީދޫ ގޮނޑުދޮށް ޙިމާޔަތްކުރުމުގެ މަޝްރޫޢުގެ ނިމުން ފާހަގަކޮށްދެއްވާފައެވެ. ގޮނޑުދޮށް ޙިމާޔަތްކުރުމުގެ މަޝްރޫޢުގެ ދަށުން 200 މީޓަރު ސަރަޙައްދުގައި ވަނީ ބޭރުތޮށިލާފައި ކަމަށްވެސް ސަރުކާރުން ވަނީ ބުނެފައެވެ.

ވ. އަތޮޅަށް ރައީސް މިއަދު މިކުރައްވާ ދަތުރުފުޅުގައި ވ. ރަކީދޫ، ކެޔޮދޫ، ފެލިދޫ، ތިނަދޫ އަދި ފުލިދޫއަށް ވަޑައިގަތުމަށް ވަނީ ހަމަޖެހިފަ އެވެ.