އިންތިޚާބުގައި ރައީސް ޞާލިޙަށް މާލެއިން ލިބޭނީ ތިންވަނަ: ރައީސް ނަޝީދު
ކުރިއަށް އޮތް ރިޔާސީ އިންތިޚާބުގައި ރައީސް އިބްރާހިމް މުޙައްމަދު ޞާލިޙަށް މާލެ އިން ލިބިވަޑައިގަންނަވާނީ ތިންވަނަ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް ކުޅުދުއްފުށި ސިޓީގައި ބޭއްވުނު ދަ ޑިމޮކްރެޓްސްގެ ޖަލްސާގައި ވާހަކަފުޅު ދައްކަވަމުންނެވެ.
ރައީސް ނަޝީދު ވިދާޅުވީ ޑިމޮކްރެޓްސްގެ ކެންޑިޑޭޓް އިލްޔާސް ލަބީބަށް މާލޭން 35 ޕަސެންޓާއި 40 ޕަސެންޓާއި ދެމެދުގެ އަދަދެއްގެ ވޯޓް ލިބިވަޑައިގަންނަވާނެ ކަމަށެވެ.
ރައީސް ނަޝީދު އިތުރަށް ވިދާޅުވީ އެމްޑީޕީއަށް މާލޭން ބޮޑު ވޯޓެއް މިހާރު ނެގިދާނެ ކަމަށް ޤަބޫލު ނުކުރައްވާ ކަމަށެވެ. ނަޝީދު ވިދާޅުވީ އެމަނިކުފާނު މާލެ ދަންނަ ކަމަށާއި އަދި މާލޭ މީހުން ހަދާނެ ގޮތް ކޮންމެވެސް ވަރަކަށް ވަޒަން ކުރެއްވޭ ކަމަށެވެ.
"ރައީސް ޞާލިޙް މާލޭގައި ތިންވަނަ ގޮސްފިއްޔާ ވެސް ރަނގަޅު، އަޅުގަނޑަށް ފެންނަ ތަނުގައި ޕީޕީއެމާއި ޑިމޮކްރެޓުން ތިބޭނީ އެކަކާ ދޭކުގައި" ނަޝީދު ވިދާޅުވި އެވެ.
ސެޕްޓެމްބަރ 9އެއްގައި ރިޔާސީ އިންތިޚާބު ބޭއްވުމަށް ހަމަޖެހިފައިވާއިރު އިންތިޚާބުގައި ވާދަކުރައްވާ ހުރިހާ ކެންޑިޑޭޓުންވެސް ދަނީ ފޯރިޔާއި ޖޯޝުގައި ކެމްޕޭނު ކުރައްވަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
