ހުޅުދެލީގެ ކުނީގެ މައްސަލައަށް ހައްލެއް ގެނެސް ސްކޫލްގެ ޖާގަ ބޮޑު ކޮށްދޭނަން: ޑރ މުޢިއްޒު

ޑރ މުޙައްމަދު މުޢިއްޒުގެ ވެރިކަމެއްގައި ދ ހުޅުދެއްޔަށް ދިމާވެފައިވާ ކުނީގެ މައްސަލައަށް ހައްލެއް ގެނެސްދެއްވަވާނެ ކަމަށް މުޢިއްޒު ވިދާޅުވެއްޖެއެވެ.

މުޢިއްޒު މިހެން ވިދާޅުވީ ރިޔާސީ އިންތިޚާބުގެ ކެމްޕޭނަށް ދ އަތޮޅުގެ ބައެއް ރަށްރަށަށް ޕީޕީއެމް ޕީއެންސީގެ ބައެއް ލިޑަރުން ކުރައްވަމުން ގެންދަވާ ކެމްޕޭނު ދަތުރުފުޅުގައި ހުޅުދެއްޔަށް ވަޑައިގެން އެރަށު ރައްޔިތުންނާއި ބައްދަލުކުރައްވައި ވާހަކަފުޅުދައްކަވަމުންނެވެ.

ހުޅުދެލީ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން ޑރ މުޢިއްޒު ވިދާޅުވީ ރަށްރަށަން ދިމާވާ ބޮޑު މައްސަލައެއް ކަމަށްވާ ކުނި މެނޭޖްކުރުމަށް ސަރުކާރުން ސަމާލުކަން ނުދޭކަމަށެވެ.

އޭނާ ވިދާޅުވީ ކުނި މެނޭޖްކުރުމަކީ އަސާސީ ގޮތެއްގައި ސަރުކާރުން ކައުންސިލް މެދުވެރިކޮށް ކޮށްދޭން ޖެހޭ ކަމެއްކަމަށާއި އެ މައްސަލަ ރަނގަޅަށް ނުކުރެވުނީމާ ރަށުތެރޭގައި އެކި ކަހަލަ ބަލި މަޑުކަން ފެތުރުން ފަދަ ގިނަ ކަންކަން ދިމާވާކަމަށެވެ.

މީގެ އިތުރުން ޑރ. މުއިއްޒު ވިދާޅުވީ އޭނާގެ ވެރިކަމެއްގައި ރަނގަޅު ފެންވަރެއްގައި ކުނި މެނޭޖް ކުރެވޭނެ ނިޒާމް ރާއްޖޭގެ ހުރިހާ ރަށެއްގައި ޤާއިމްކޮށްދެވޭނެ ރަނގަޅު ޕްރޮގްރާމެއް ރާވައިގެން ކުރިއަށް ގެންދަވާނެކަމަށެވެ.

މީގެ އިތުރަށް މުޢިއްޒު ވިދާޅުވީ ހުޅުދެލީ ސްކޫލުގެ ޖާގަ ކުޑަކަން އެ ރަށު ރައްޔިތުން ފާހަގަކުރަމުން އަންނަކަމަށާއި އޭނާގެ ވެރިކަމެއްގައި ސްކޫލުގައި ކްލާސްރޫމް އިތުރުކުރުމުގެ ކަންކަން ކުރިއަށް ގެންގޮސްދެއްވާނެކަމަށެވެ.

މީގެ އިތުރުން ކުޅިވަރުކުރުމަށް ވަސީލަތްތައް ޤައިމްކުރުމަށް ކުރަން ޖެހޭ މަސައްކަތްތައް ކޮށްދެއްވާނެކަމަށާއި ހުޅުދެލީގައި އޭޓީއެމްއެއް ޤާއިމްކުރުމަށްވެސް އޭނާ ވައުދުވެވަޑައިގެންފައިވެއެވެ.

މުޢިއްޒު ވިދާޅުވީ ހުޅުދެއްޔަކީ ވަރަށް ހީވާގި މަސައްކަތްތެރި ރައްޔިތުންތަކެއް ދިރިއުޅޭ ރަށެއްކަމަށާއި އެރަށަކީ މަސްވެރިކަމުގެ މަސައްކަތްވެސް ކުރާ ރަށެއް ކަމަށެވެ.

އެހެންވީމާ މަސްވެރިންނަށް ބޭނުންވާ ގިނަ ކަންކަން ހުންނާނެކަމަށާއި އެރަށުން ތެޔޮ އަދި އައިސް ލިބޭނެ ނިޒާމް ގާއިމްވެގެން ދިއުމަކީ މަސްވެރިންނަށް ލިބޭނެ ވަރަށް ބޮޑު ލުޔެއްކަމަށް ޑރ. މުޢިއްޒު ވިދާޅުވިއެވެ.

މުޢިއްޒު ވިދާޅުވީ އެފަދަ ނިޒާމެއް ޤާއިމްކުރުމަކީ އެ އެ ޚިދުމަތް ހޯދަން އެރަށަން އަންނަ ފަރާތްތަކަށް ލިބޭނެ ވަރަށް ބޮޑު ލުޔަކަށް ވާނެކަމަށާއި އޭނާއަށް ވެރިކަން ލިބިއްޖެ ނަމަ އެފަދަ ނިޒާމެއް ޤާއިމްކޮށްދެއްވާނެކަމަށެވެ.

މީގެ އިތުރުން ވެސް ހުޅުދެއްޔަށް ކޮށްދެއްވާނެ އިތުރު ކަންތައްތަކެއް މުޢިއްޒުވަނީ ވިދާޅުވެފައެވެ.