ގައުމުގެ ހާލަތު މި އޮތީ ޓެސްޓުކުރަން ވެރިކަން ދޭވަރަށް ވުރެ ގޯސްކޮށް: އަބްދުއްރަހީމް

ދިވެހިރާއްޖޭގެ ހާލަތު މިއަދު މިއޮތީ ޓެސްޓުކުރަން ވެރިކަމަށް މީހަކު ގެންނަ ވަރަށްވުރެ މާ ދެރަ ހާލަތެއްގައި ކަމަށް އިދިކޮޅު ކޯލިޝަން ހިންގެވުމާއި ވަގުތީގޮތުން ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް ވިދާޅުވެއްޖެ އެވެ.

އަބްދުއްރަހީމް މިފަދައިން ވިދާޅުވެފައިވަނީ ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ދ އަތޮޅަށް ކުރައްވާ ކެމްޕޭނު ދަތުރުފުޅުގައި ދ މީދޫއަށް ވަޑައިގެން ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.

އަބްދުއްރަހީމް ވިދާޅުވީ މިއަހަރުގެ ސެޕްޓެމްބަހުގެ 9ގައި ލާ ވޯޓަކީ ގައުމީ މަސްލަހަތު އިސްކޮށް، ރައްޔިތުންގެ ތަރައްގީއާއި ދޭތެރޭ ވިސްނަވާ ލައްވާ ވޯޓަކަށް ހެއްދެވުމަށް އެދިވަޑައިގަންނަވާ ކަމަށެވެ. މި އިންތިޚާބަކީ ފަހަރެއްގައި ވެސް ޓެސްޓުކުރަން، ނުވަތަ ރަނގަޅު މީހަކަށް ވެދާނެކަމަށް ބަލާ ވޯޓުދެއްވާ ފަހަރަކަށް ހައްދައިގެން ނުވާނެ ކަމަށެވެ.

ރިޔާސީ އިންތިޚާބުގައި ވޯޓުދޭއިރު، ރިޔާސީ ކެންޑިޑޭޓުންގެ ތައުލީމާއި ތަޖުރިބާއާއި އިޚްލާސްތެރިކަމާއި މެދު ރައްޔިތުން ފުންކޮށް ވިސްނަން ޖެހޭކަމަށް އަބްދުއްރަހީމް ވިދާޅުވި އެވެ.

އެއާއި ގުޅުވާ އަބްދުއްރަހީމް ވިދާޅުވީ މިއަހަރުގެ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންނަށް ބަލާއިރު، ތައުލީމީ ގޮތުން ބެލިޔަސް، ތަޖުރިބާގެ ގޮތުން ބެލި ނަމަވެސް އަދި އިޚްލާސްތެރިކަމަށް ބެލި ނަމަވެސް ޑރ މުއިއްޒާއި ވާދަކޮށްލެވޭނެ ބޭފުޅަކު ފެންނަން ވެސް ނެތްކަމަށެވެ.

ޑރ މުއިއްޒުއަކީ ރައީސް ޔާމިނުގެ ސިޔާސަތުތައް ރަނގަޅަށް އެނގިވަޑައިގަންނަވާ ބޭފުޅެއް ކަމަށާއި، އެމަނިކުފާނުގެ ސިޔާސަތުގެ ތެރެއިން އެންމެ އިސްކުރައްވާ އިސްލާމްދީނާއި، ދިވެހިރާއްޖޭގެ މިނިވަންކަން ރައްކާތެރިކުރުމުގެ ސިޔާސަތު ޑރ މުއިއްޒު ތަންފީޒުކުރައްވާނެ ކަމުގެ ފުރިހަމަ ޔަގީންކަން އޮތްކަމަށް އަބްދުއްރަހީމް ވިދާޅުވި އެވެ.

އެއާއެކު އަބްދުއްރަހީމް ވިދާޅުވީ ޑރ މުއިއްޒަކީ ރައީސް ޔާމީންގެ ފުރިހަމަ ތާއީދާއި އިތުބާރު ލިބިވަޑައިގެން ހުންނެވި ބޭފުޅެއް ކަމަށެވެ.

އެހެންކަމުން މި އިންތިޚާބުގައި، މި ކަންކަމާއި ދޭތެރޭ ރައްޔިތުން ފުންކޮށް ވިސްނަވާ މި އިންތިޚާބަކީ ގައުމާއި ރައްޔިތުންނަށްޓަކައި ދޭ ވޯޓަކަށް ހެއްދެވުމަށް އަބްދުއްރަހީމް ވަނީ އިލްތިމާސްކުރައްވާފަ އެވެ.