ކޯޓުތަކުގެ އިދާރީ ހިންގުން ޖޭއެސްސީގެ ދަށަށް ގެންދިޔައީ ޤާނޫނުއަސާސީއާ ޚިލާފަށް: ހައިލަމް

ކޯޓުތަކުގެ އިދާރީ ހިންގުން ޖޭއެސްސީގެ ދަށަށް ގެންގޮސްފައިވަނީ ޤާނޫނުއަސާސީއާއި ޚިލާފަށް ޖުޑީޝަލް ސަރވިސް ކޮމިޝަނުގެ ޤާނޫނު އިޞްލާޙުކޮށްގެން ކަމަށް، ކްރިމިނަލް ކޯޓުގެ ކުރީގެ އިސް ގާޒީ އަހުމަދު ހައިލަމް ވިދާޅުވެއްޖެއެވެ.

އެންމެފަހުން ޖޭއެސްސީގެ ގާނޫނަށް ގެނައި ބަދަލާ އެކު ސްޕްރީމް ކޯޓުގެ ދަށުން ހިންގަމުން އައި ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) ވަނީ ޖޭއެސްސީގެ ދަށަށް ގެންގޮސްފަ އެވެ. އެއާއެކު ކޯޓުތަކުގެ އިދާރީ ހިންގުމުގެ ކަންކަން ވެސް މިހާރު ކުރިއަށް ދަނީ ޖޭއެސްސީގެ ބެލުމުގެ ދަށުންނެވެ.

އެކަމާއި ގުޅިގެން ހައިލަމް ކުރެއްވި ޓްވީޓެއްގައި ވިދާޅުވީ، ކޯޓުތަކުގެ އިދާރީ ހިންގުން ޖޭއެސްސީގެ ދަށަށް ގެންގޮސްފައިވަނީ ޤާނޫނުއަސާސީގެ 156 އަދި 159 ވަނަ މާއްދާއާ ޚިލާފަށް ޖުޑީޝަލް ސަރވިސް ކޮމިޝަނުގެ ޤާނޫނު އިޞްލާޙުކޮށްގެން ކަމަށެވެ.

ހައިލަމް ވިދާޅުވީ، އެ އިޞްލާޙުުތައް ޤާނޫނުއަސާސީއާ ޚިލާފުކަމަށް ސުޕްރީމް ކޯޓުން ކަނޑއަޅުއްވައި ދެއްވައި ކޯޓުތަކުގެ އިދާރީ ހިންގުން މިނިވަންކޮށްދޭން ޖެހޭ ކަމަށެވެ.

ހައިލަމް މިފަދައިން ވިދާޅުވެފައިވާއިރު، ކޯޓުތަކުގެ އިދާރީ ކަންކަން ހިންގުން ޖޭއެސްސީގެ ދަށަށް ގެންގޮސްފައިވާއިރު، ޖޭއެސްސީއަށް އެ ޒިންމާ އަދާ ނުކުރެވޭނީ ސްޕްރީމް ކޯޓުގެ ފަނޑިޔާރު ހުސްނުއްސުޢޫދު ވެސް މިއަދު ވަނީ ވަރަށް ބޮޑަށް ނުރުހުން ފާޅުކުރައްވާފައެވެ.

އެގޮތުން ކޯޓުތަކުން ވަކިކުރި 10 އެޑްމިނިސްޓްރޭޓަރުންނަށް އަލުން ވަޒީފާ ދޭން އެންގި މައްސަލަ ޖުޑިޝަލް ސާވިސް ކޮމިޝަން (ޖޭއެސްސީ) އިން ސުޕްރީމް ކޯޓުގައި އިސްތިއުނާފުކުރި މައްސަލާގައި މިއަދު އޮތް އަޑުއެހުމުގެ ތެރެއިން ޖޭއެސްސީއަށް ރައްދުކުރައްވައި ފަނޑިޔާރު ސުޢޫދު ވަނީ ގިނަ ސުވާލު ތަކެއް ކުރައްވައި، ސްޕްރީމް ކޯޓަށް އިދާރީ މުވައްޒަފުން ނުނަގާތީ އޮތް ނުރުހުމާއި އުދާސްތައް ބަންޑުންކޮށްލައްވާފައެވެ.

"އަޅުގަނޑުގެ ސުވާލަކީ، ދޮޅު އަހަރު، ދެ އަހަރު ވެގެންދާއިރު, ސްޕްރީމް ކޯޓަށް ސެކެރެޓަރީ ޖެނެރަލް އަކު އައްޔަން ނުކުރެވޭ ކަމަށް ވަންޏާ، އިދާރީ މުވައްޒަފަކު އައްޔަން ނުކުރެވޭ ކަމަށް ވަންޏާ، ކިހިނެއްތޯ ކޯޓުގެ އިންޑެޕެންޑެންސް؟ އެކަން ސްޕްރީމް ކޯޓަށް އަމިއްލައަށް ނުކުރެވޭ. ކޮންބައެއްތޯ އެކަމާ ޒިންމާ އުފުލާނީ. ދޮޅު އަހަރު ދެ އަހަރު މިވަނީ ސްޕްރީމް ކޯޓަށް ސެކެރެޓަރީ ޖެނަރަލް އަކު އައްޔަންކޮށްދޭތޯ އާދޭސްކުރާތާ. މިހެން އާދޭސްކުރާގޮތަށް މިކަން ބޭއްވުންތޯ އެއީ ގާނޫނު އަސާސީ ދެކޭ ގޮތަކީ. ކޮން ނުފޫޒެއްގެ ދަށުގައިތޯ އަޅުގަނޑުމެން މި ތިބީ؟ ދެން ކޮން ވާހަކައެއް ތި ދައްކަނީ؟ މިއީ ކޮން ކަމެއްތޯ،" ސުޢޫދު ވިދާޅުވި އެވެ.

ސުއޫދު ވިދާޅުވީ ރަނގަޅަށް އިދާރީ ގޮތުން ހިންގި، ކޯޓުތަކަށް މުވައްޒަފުންނަށް ގަވައިދުން ޑީޖޭއޭއަށް އައްޔަން ކުރެވޭނެ ނަމަ ބާރުތައް ނަންގަވައިގެން ތިބެން ރަނގަޅު ކަމަށާއި ނަަމަވެސް އެކަން ނުވާ ކަމަށެވެ.

"ޖޭއެސްސީ އަށް ޖުޑިޝަރީ ހިންގޭ ނަމަ ރަނގަޅު. އެކަމެއް ނުކުރެވޭ. މިތަނަށް މުވައްޒަފެއް ލެވެނީއެއް ނޫން. ދެން މި ތަނަށް އައިސް ތިބުނަނީ ތިމަންނަމެންނޭ ހިންގަނީ. ހަތް ފަނޑިޔާރުން ނޫން ބަޔަކު މިތާ ނެތް. ދެން ތިބުނަނީ ތިމަންނަމެންނޭ ޖުޑިޝަރީ ހިންގަނީ، ހިންގާނީ. އަޅުގަނޑު މެންނަކަށް ނޭނގެ" ވަރަށް ކޯފާ އިސްކުރައްވައި ސުޢޫދު ވިދާޅުވި އެވެ.

"...މި ތަން މި އޮތީ ހަމަ ހުއްޓިފައި. ހިންގުން އެއްކޮށް ހުއްޓިފައި. ދިވެހިރާއްޖޭގެ ސުޕްރީމް ކޯޓު މިއީ. ކޮން އިރަކުންތޯ މިއަށް އަޅުގަނޑުމެންނަށް ފަރުވާއެއް ލިބެނީ. ވިދާޅުވެދެއްވަބަލަ؟ މި ތަން ހިންގާނީ ކިހިނެއްްތޯ؟ އިދާރީ ގޮތުން މި ކޯޓު ހިންގޭކަށް، އިދާރީ ގޮތުން މި ކޯޓަށް މިނިވަންކަމެއް ނެތް މުވައްޒަފުން ލާކަށް." ފަނޑިޔާރު ސުޢޫދު ވިދާޅުވި އެވެ.