ދިވެހިން އެކަތިގަނޑަކަށްވެ ޑރ. މުޢިއްޒު ވެރިކަމަށް އިންތިޚާބު ކުރަން ރައީސް ޔާމީންގެ އިލްތިމާސެއް!

ހުރިހާ ދިވެހި ރައްޔިތުންވެސް އެކަތިގަނޑަކަށްވެ، ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވެރިކަމަށް އިންތިޚާބު ކުރެއްވުމަށް ޕީޕީއެމްގެ ލީޑަރ އަދި ކުރީގެ ރައީސް އަބްދުالله ޔާމީން އަބްދުލްގައްޔޫމް އިލްތިމާސް ކުރައްވައިފިއެވެ.

އިދިކޮޅު ޕްރޮގްރެސިވް ކޮންގްރެސް ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި އެކޯލިޝަންގެ ރިޔާސީ ކެންޑިޑޭޓް ޑރ.މުއިއްޒުގެ ތަރުޖަމާނު އަދި ޕީޕީއެމްގެ ސެކެޓްރީ ޖެނެރަލް މުހައްމަދު ތޮލާލް ވަނީ، މުއިއްޒުއަށް ރައީސް ޔާމީނާއި ޕީޕީއެމްގެ ތާއީދު ނެތް ކަމަށް ވެރިކަންކުރާ މައި ޕާޓީ، އެމްޑީޕީީ ގެ ރިޔާސީ ކެންޑިޑޭޓް ގެ ކެންޕެއިން ތަރުޖަމާނު، ޑިފެންސް މިނިސްޓަރު މާރިޔާ އަހުމަދު ދީދީ، ވިދާޅުވަމުންދާ ވިދާޅުވުމަށް ރައްދު ދެއްވާފައެވެ.

އެގޮތުން، ޑރ. މުއިއްޒުއަކީ ޕީއެންސީ އަދި ޖަމިއްޔަތުއް ސަލަފްގެ ކެންޑިޑޭޓެއް ކަމަށާ، އޭނާއަށް ވެރިކަން ހޯދައިދޭން ޕީޕީއެމާއި ރައީސް ޔާމީންވެސް ބޭނުން ނުވާ ކަމަށާ، ޕީޕީއެމުން އެކަމަށް މާ ބޮޑު މަސައްކަތެއް ނުކުރާ ކަމަށް މާރިޔާ ވިދާޅުވަމުންދާ ވިދާޅުވުމަށް ރައްދު ދެއްވަމުން ތޮލާލް ވިދާޅުވީ، ޑރ.މުއިއްޒުއަކީ ޕީޕީއެމް، ޕީއެންސީގެ ކެންޑިޑޭޓް ކަމަށެވެ.

އަދި ޕީއެސްސީންގެ ޓިކެޓްގައި ޑރ.މުއިއްޒު ނިކުންނެވީ ޕީޕީއެމްގެ ރައީސް، ރައީސް ޔާމީންގެ ފުރިހަމަ ތާއީދާއި އެކުގައިކަމަށާ، ޕީޕީއެމާއި ޕީއެންސީ ގުޅިގެން އެކަތިގަނޑެއްގެ ގޮތުގައި މަސައްކަތް ކުރަމުންދަނީ މުޢިއްޒު ވެރިކަމަށް އިންތިޚާބު ކުރުމަށް ކަަމަށް ތޮލާލް ވިދާޅުވި އެވެ.

މިއާއެކު ތޮލާލް ވިދާޅުވީ، ރައީސް ޔާމީންގެވެސް އިލްތިމާސްއަކީ ދިވެހި ރައްޔިތުން ރައްޔިތުންގެ ކެންޑިޑޭޓް ޑރ.މުއިއްޒު އަށް ހުރިހާ ދިވެހިންވެސް ވޯޓު ދެއްވުން ކަމަށެވެ.

ރައީސް ޔާމީންގެ ފުރިހަމަ ތައީދު ޑޜ.މުއިއްޒަށް އޮންނާނެ. އެމަނިކުފާނު ތާއީދާއިއެކު ޑރ.މުއިއްޒު މަސައްކަތް ކުރައްވަނީ. ރައީސް ޔާމީންގެ އިލްތިމާސަކީ ދިވެހި ހުރިހާ ރައްޔިތުން އެކަތިގަނޑަކަށްވެ ޑރ.މުއިއްޒު ހޮއްވަވައި ދެއްވުން.

ޑރ. މުއިއްޒުގެ ތަރުޖަމާނު މުހައްމަދު ތޮލާލް

އެހެންކަމުން، އެމްޑީޕީން ޕީޕީއެމް ބައިބައިކުރުމަށް ދައްކަމުންދާ ވާހަކަތަކުގައި ނުޖެހުމަށް ޕީޕީއެމްގެ އެންމެހާ އާއްމު މެންބަރުންނަށް ތޮލާލް ވަނީ އިލްތިމާސްކުރައްވާފައެވެ.

މިއަދުގެ ބައްދަލުވުމުގައި ތޮލާލް ވަނީ ޑރ. މުއިއްޒުގެ ސިޔާސަތުތައް ބައްޓަން ކުރައްވާނެ ގޮތުގެވެސް ކުރު ޚުލާސާއެއް ދެއްވާފައެވެ. އެގޮތުން ޑރ.މުއިއްޒު ކުރައްވާ ވެރިކަމަކީ މުޅި ދިވެހި ރައްޔިތުންނަށް އެއްވެސް ތަފާތު ކުރުމެއްނެތި ކުރައްވާނެ ވެރިކަމެއް ކަމަށާ، އެވާނީ ވަށާޖެހޭ ސިޔާސަތެއް ކަމަށް އޭނާ ވިދާޅުވި އެވެ.

އަދި ކެންޕެއިނަށް ލިބުނު ކުޑަ ވަގުތުކޮޅުގެ ތެރޭގައި ޑރ. މުއިއްޒު އާއި ރަނިންމޭޓް ހުސައިން މުހައްމަދު ލަތީފް އަށް ރާއްޖޭގެ ހުރިހާ ރަށަކަށް ވަޑައިނުގެންނެވުނު ނަމަވެސް، ރަށްރަށުގައި ތިއްބަވާ ޕީޕީއެމްގެ މެންބަރުން މެދުވެރިކޮށް އެ ރަށްރަށަށް ބޭނުންވާ ކަންކަން އޮޅުން ފިލުއްވާނެ ކަމަށް ތޮލާލް ވިދާޅުވި އެވެ.