ސަރުކާރުން ބުނި ގަދަބަސް ހިފައްޓަން ރައީސް ޔާމިނު ޖަލަށްލާނެ ކަމަށް ހިޔެއް ނުކުރަން: ޑރ ޖަމީލް

ކުރީގެ ރައީސް ޔާމީން އަބްދުލްގައްޔޫމު ޖަލަށް ލާނެކަމަށް މި ސަރުކާރުގެ ވެރިން ވިދާޅުވި "ގަދަބަސް" ނަގަހައްޓަން، އެމަނިކުފާނު ޖަލަށް ލުމުގެ ފުރުސަތު ޝަރުއީ ދާއިރާއިން ފަހިކޮށްދޭނެކަމަށް ކުރިން ޤަބޫލުކުރެވިފައި ވެސް ނެތްކަމަށް ރައީސް ޔާމީންގެ އިސް ޤާނޫނީ ޑރ މުހައްމަދު ޖަމީލު އަހުމަދު ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވެފައި ވަނީ މާލޭގެ އާޓިފިޝަލް ބީޗުގައި ބޭއްވި "މަވެސް ޕީޕީއެމް" ޖަލްސާގައި ވާހަކަދައްކަވަމުން ނެވެ.

ޑރ ޖަމީލު ވިދާޅުވީ ވާދަވެރި ސިޔާސީ ލީޑަރަށް ވީތީ ރައީސް ޔާމިނު ޖަލަށް ލާނެކަމަށް ސަރުކާރުގެ އިސްވެރިން ބޮޑާ ބަސް ވިދާޅުވަމުން ދިޔަކަމަށެވެ. އެގޮތުން އެމަނިކުފާނުގެ މައްޗަށް ފުލުފުލުގައި ދައުވާތައް އުފުލާ، އެމަނިކުފާނަށް ސިޔާސީ ގޮތުން އެކި ފިއްތުންތައް ކުރިމަތިކުރުވަމުން ދިޔަކަން ޑރ ޖަމީލު ފާހަގަކުރެއްވި އެވެ.

އެއާއެކު އެމަނިކުފާނު ވިދާޅުވީ ރައީސް ޔާމިނުގެ ވާދަވެރިންނާއި ސަރުކާރުގެ އިސް ވެރިން، އެމަނިކުފާނު ޖަލަށް ލާނެކަމަށް ބޮޑާ ބަސްތައް ވިދާޅުވަމުން ދިޔަ ނަމަވެސް، ގަދަބަސް ބުނެ މީހުން ޖަލަށް ލުމަކީ ރާއްޖެ ދަތުރުކުރަމުން ދާ މިސްރާބުކަމަށް އޭރު ވިސްނިފައި ނެތްކަމަށާއި، އަދި އެފަދައިން ގަދަބަސް ބުނެ ރައީސް ޔާމީން ޖަލަށް ލުމުގެ ފުރުސަތު ޝަރުއީ ދާއިރާއިން ފަހިކޮށްދޭނެކަމަށް ޤަބޫލުކުރެވިފައި ނެތްކަމަށް ޑރ ޖަމީލު ވިދާޅުވި އެވެ.

"ރައީސް އޮފީސްތެރޭގައި ޑެސްކު އަޅައިގެން ޑެސްކު ކައިރީގައި ތިބެގެން ފަޚުރުވެރިކަމާއެކު ބުނީ ސާބިތުކަމާއެކު އެބޭފުޅުން ވިދާޅުވަނީ ވަރުގަދަ ބިޔަ ބޮޑު ބަސް ބުނީ ލާހިކެއް ނޫނޭ.. ހަމަ ލާހިކެއް ނޫނޭ ހުކުން ޖަހާނަމޭ ރައީސް ޔާމިނަށް. އަބްދުއްރަހީމް އާއި އަޅުގަނޑުމެން އެންމެން ތިބީ، އަޅުގަނޑުމެން ހިޔެއް ނުކުރަން އަޅުގަނޑުމެންނަށް މިހެން އިވޭ އަޑުތަކަކީ މި މުޖުތަމައުގެ މީޒާންކަމަށް، މިއޭ އިންސާފަކީ.. މިއޭ އަދުލަކީ، އަޅުގަނޑުމެން ހަމަ ހަގީގަތުގައި ވެސް ހިޔެއް ނުކުރަން"

ޑރ މުހައްމަދު ޖަމީލް

އެމަނިކުފާނު ވިދާޅުވީ މިއަދު ގައުމު ދަތުރުކުރަމުން މިދާ މިސްރާބާއި ދޭތެރޭގައި ވިސްނާލެއްވުމުން ވަރަށް އަސަރު ކުރާކަމަށެވެ. ރަނގަޅަށް ހިނގަ ހިނގާހުރި އެތައް ނިޒާމެއް ފުނޑާލާ، އާންމު ރައްޔިތަކަށް ވެސް މިއަދު ޚިޔާލު ފާޅުކޮށްލުމުގެ މިނިވަންކަން މި ގައުމުގައި ނެތްކަމަށް ޑރ ޖަމީލު ވިދާޅުވި އެވެ.

މި ސަރުކާރުން ކުރަމުންދާ ކަންތައްތަކުން ސަރުކާރުގެ އަނިޔާވެރިކަން ފެނިގެންދާ ކަމަށާއި، މި އަނިޔާވެރިކަން އިތުރަށް ދިގުދަންމަން ރައްޔިތުން ބޭނުން ނުވާކަމަށް ޑރ ޖަމީލު ވިދާޅުވި އެވެ.

އެމަނިކުފާނު ވިދާޅުވީ މިއަދު ރާއްޖޭގެ ސިޔާސީ ރޫހު ބަދަލުވަމުން އަންނަ ގޮތަށް ބަލާއިރު ރައީސް ޔާމިނަށް ކުރަމުންދަނީ ނުހައްގު އަނިޔާތަކެއް ކަމަށް ގިނަ ބަޔަކު ގަބޫލުކުރާކަމަށެވެ. އަދި އެ ރޫހުގައި ނިކުމެ ރައްޔިތުން މި ވެރިކަން ބަދަލުކުރާނެ ކަމަށާއި، 30 ސެޕްޓެމްބަރަށް ފަހު މުލިއާގޭގައި ހުންނަވާނީ ޑރ މުއިއްޒު ކަމަށް ޑރ ޖަމީލް ވަނީ ވިދާޅުވެފަ އެވެ.