އެވްސެކޮމްގެ މުވައްޒަފުންގެ ފަރާތުން ޕާކިސްތާން ރައްޔިތުންނަށް ބޮޑު އެހީއެއް!

‏ޙާލުގައި ޖެހިފައިވާ ޕާކިސްތާންގެ ރައްޔިތުންނަށް އޭވިއޭޝަން ސެކިޔުރިޓީ ކޮމާންޑް (އެވްސެކޮމް) ގެ މުވައްޒަފުން ހަދިޔާކުރި ފައިސާގެ އެހީ އިންޓަނޭޝަނަލް އެއިޑް ކެންޕެއިން (އައިއޭސީ) އާއި ހަވާލުކޮށްފިއެވެ.

އެވްސެކޮމް އިން ބުނީ، ޕާކިސްތާނުގެ ރައްޔިތުންނަށް އެވްސެކޮމްގެ މުވައްޒަފުން ހަދިޔާކުރި 57،709.35 ރުފިޔާ އައިއޭސީ ⁦‪ އާއި އިއްޔެ  ހަވާލުކޮއްފައިވާ ކަމަށެވެ.

އެވްސެކޮމްގެ ފަރާތުން ފޯރުކޮށްދިން މި އެހީއާއި ގުޅިގެން އައިއޭސީން ވަނީ، އެ ތަނުގެ މުވައްޒަފުން މިފަދަ މުހިއްމު ވަގުތު ތަކުގައި ދައްކަވާ ނަމޫނާއާއި، އެހީ ފޯރުކޮށްދިނުމުގައި ނަންގަވާ އިސްކަމަށް ޝުކުުުރުއަދާކޮށްފައެވެ. އަދި އެވްސެކޮމް ނަމޫނާ އަކަށް ބަލައިގަނެ އެހެނިހެން މުއައްސަސާތަކުންވެސް އައިއޭސީއާއި އެކު ހާލުގައި ޖެހިފައިވާ ފަރާތްތަކަށް އެހީ ފޯރުކޮށްދިނުމުގައި ބައިވެރިވުމަށް އައިއޭސީން ވަނީ އެދިފައެވެ.

އެވްސެކޮމްގެ މުވައްޒަފުންގެ ފަރާތުން މިފަދަ އިސްނެންގެވުމެއް ނަގާފައިވާއިރު، މީގެ ކުރިން އެހެނިހެން ތަންތަނުންވެސް ފާކިސްތާނަށް އެހީވުމަށް އައިއޭސީ އަށް ފައިސާ ވަނީ ފޯރުކޮށްދީފައެވެ. އެގޮތުން ޕާކިސްތާނުގައި ހާލުގައި ޖެހިފައިވާ ފަރާތްތަކަށް އެއްލައްކަ މީލް ޕެކް ހަދިޔާ ކުރުމަށް އައިއޭސީން ފަށާފައިވާ ކެންޕެއިނަށް ލިބުނު ބައެއް ފައިސާއިން މީލް ޕެކްތައް މިހާރު ވަނީ ޕާކިސްތާނުގެ ރައްޔިތުންނަށް ހަދިޔާ ކޮށްފައެވެ.

އެ މީލް ޕެކްތައް ހަދިޔާ ކުރުމަށް އައިއޭސީގެ ޓީމް ޕާކިސްތާނުގައި ހަރަކާތްތެރިވަމުންދާއިރު، ޕާކިސްތާނުގައި ފެންބޮޑުވުމުގެ ސަބަބުން އެންމެ ބޮޑަށް ގެއްލުންވި ސަރަހައްދަށް އެ ޓީމުގެ ހަތަރު މެންބަރުން ވަނީ ޒިޔާރަތްކޮށްފައެވެ. އަދި މިޒިޔާރަތުގައި އެއްލައްކަ ހޮޓްމީލް ޕެކް ޕާކިސްތާން އަށް ނަމުގައި ހިންގަމުންދާ ގައުމީ ހަރަކާތުގެ ބައެއް މީލް ޕެކް ތައްޔާރުކޮށް އިއްޔެ ބަހާފައިވާ ކަމަށް އައިއޭސީން ބުނެއެވެ.

އެގޮތުން އިންޓަނޭޝަނަލް އެއިޑް ކެމްޕޭންގެ ޓީމުން ޕަާކިސްތާނުގައި ހޮޓް މީލް ޕެކް ތައްޔާރުކުރުމާއި ޓެންޓްތަކަށް ބެހުމުގެ މަސައްކަތުގައި އަމަލީ ގޮތުން ވަނީ ބައިވެރިވެފައެވެ.

އެގޮތުން ބެހުނު މީލްޕެކް ގެ ތެރޭގައި، ގިޔާސުއްދީން ސްކޫލް ގެ ޕީޓީއޭ ގެ ފަރާތުން ހަދިޔާ ކުރި 1000 މީލް ޕެކާއި، ބައެއް ޖަމިއްޔާތަކުންނާއި މުއައްސަސާތަކުން ހަދިޔާ ކުރި މީލްޕެކް ހިމެނޭކަން އައިއޭސީން ވަނީ ފާހަގަކޮށްފައެވެ.