ދެން ވެރިކަމަށް އަޔަސް އިންޑިއާ އާއި ބާއްވާނީ ގާތް ގުޅުމެއް: ރައީސް ޔާމީން

އިންޑިއާ އާއި އެއްވެސް ޒާތީ ކަމެއް ނެތް ކަމަށާ، ދެން ވެރިކަމަށް ވަޑައިގެންނެވި ނަމަވެސް އެގައުމާއި އެކު ބާއްވަވާނީ ގާތް ގުޅުމެއް ކަމަށް ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން ބޮޑުތިލަދުންމައްޗަށް މިހާރު ކުރައްވަމުންދާ ދަތުރުފުޅުގެ ތެރެއިން ތުރާކުނު ރައްޔިތުންނާއި ބައްދަލު ކުރައްވައި ވާހަކަދައްކަވަމުން އެމަނިކުފާނު ވަނީ އެމަނިކުފާނުގެ ވެރިކަމެއްގައި އިންޑިއާ އާއި އެކު ބާއްވަވާނެ ގުޅުމާއި ބެހޭގޮތުން ވާހަކަ ދައްކަވާފައެވެ.

އެގޮތުން ޔާމީން ވިދާޅުވީ، ރާއްޖޭގައި އެއްވެސް ގައުމެއްގެ އަސްކަރިއްޔާއަށް ގާއިމުވެ ނުތިބޭނެ ކަމަށެވެ. އެހެން ނަމަވެސް މިހާރުވެސް އިންޑިއާ ސިފައިން ރާއްޖޭގައި އެބަތިބި ކަމަށާ އެގައުމުގެ ނުފޫޒުވެސް ދިވެހީންނާއި ދިވެހި ގައުމުގެ މައްޗަށް އެބައޮތް ކަމަށެވެ.

މިއާއެކު ރައީސް ޔާމީން ވަނީ، އިންޑިއާ އަސްކަރިއްޔާ ރާއްޖޭގައި ތިބުމާއި ދެކޮޅަށް ވާހަކަ ދައްކަވަނީ، ވަކި ގައުމަކާ ދެކޮޅު ވެގެން ނޫން ކަމަށްވެސް ވިދާޅުވެފައެވެ. އަދި އެ ވާހަކަ ދައްކަވަނީ ޒާތީ ކަމެއް އޮވެގެން ނޫން ކަމަށާއި އެ ވާހަތައް ދައްކަވަނީ ދިވެހި ގައުމާއި މުސްތަގުބަލަށްޓަކައި ދައްކަން ޖެހޭ ވާހަކައަކަށްވާތީ އަދި އެ ނުފޫޒުން ދިވެހީން ސަލާމަތް ކުރަން ޖެހޭތީ ކަމަށްވެސް ޔާމީން ވިދާޅުވި އެވެ.

"އަޅުގަނޑާ އިންޑިއާ ދޭތެރެއަކު ޒާތީ އެއްވެސް މައްސަލައެއް ނެތް. ހަމަ އެއްވެސް ކަމެއް ނެތް! އަދިވެސް އަޅުގަނޑުމެންގެ ވެރިކަމެއްގައި އިންޑިއާ ވާނީ އަޅުގަނޑުމެންގެ ރަހުމަތްތެރިއަކަށް،" ރައީސް ޔާމީން ވިދާޅުވި އެވެ.

ނަމަވެސް އިންޑިއާއަކީ ރަހުމަތްތެރިއެއް ކަމަށް ބެލެވޭނީ ރާއްޖޭގެ މިނިވަން ކަމާއި އިސްތިގުލާލަށް އިހްތިރާމް ކުރާ ނަމަ ކަމަށާ، ކޮންމެ ކަމެއް ކުުރުމުގެ ކުރީން އިންޑިއާގެ ހުއްދަ ހޯދަން ޖެހޭ ހިސާބަށް ކަންކަން ގެންގޮސްފިނަަމަ އެއީ އެކުވެރި ގައުމެއްގެ ގޮތުގައި ނުބެލެވޭނެ ކަމަށްވެސް ޔާމީން ވިދާޅުވިއެވެ.

"އެކަމަކު ދިވެހިރާއްޖެއަކީ މިނިވަން ގައުމެއް ކަމާއި ދިވެހިރާއްޖެއަކީ އިހްތިރާމް ލިބިގެންވާ ގައުމެއް ކަމަށް ގަބޫލު ކޮށްގެން އެ ބީދައިން އަޅުގަނޑުމެންނާއި މުއާމަލާތު ކުރަން ވާނީ. އަޅުގަނޑުމެންނަކީ ދެވަނަ ދަރަޖައިގެ ގައުމެއް ކަމަށް، އަޅުގަނޑުމެންނަކީ އެ މީހުން ބުނާ ކޮންމެ ކަމެއް ކުރަން ޖެހޭނެ ބައެއް ކަަމަށް، އަދި އަޅުގަނޑުމެން ކުރާ ކޮންމެ ކަމެއް ކުރަންވާނީ އިންޑިއާއިން ކަމަށް ގަބޫލު ކޮށްގެން ކުރާ ކަމަށް ވަންޏާ އަޅުގަނޑުމެންނަށް އެ ގުޅުން ނުބޭއްވޭނެ. އެކަމަކު އެހެން ނޫން ކަމަށް ވަންޏާ އަޅުގަނޑުމެންނާއެކު މަސައްކަތް ކުރެވޭނެ،" ޔާމީން ވިދާޅުވި އެވެ.