"‏ވ.އަންބަރާ މައްސަލާގައި ގެއްލުންވީވެސް ރައްޔިތުންނަށް, ބަދަލުދޭން ވެސް ޖެހެނީ ރައްޔިތުން"

ވ.އަންބަރާ ކަނޑޫފާ ނައްތާލާ، އެތަނުގައި ރިޒޯޓެއް ތަރައްޤީކުރަންދިން މުއްދަތުގައި އެއްވެސް މަސައްކަތެއް ނުކުރުމުގެ ސަބަބުން އެކަމުގެ ގެއްލުން ވ. އަތޮޅުގެ ރައްޔިތުންނަށް ވެފައިވާއިރު، އޭގެ ބަދަލު ހޯދަން އެދުމުން އެ ބަދަލުވެސް ދޭން ޖެހުނީ ރައްޔިތުންނަށް ކަމަށް ވ. އަތޮޅު ކައުންސިލްގެ ރައީސް ޝުޖާއު އަލީ ވިދާޅުވެއްޖެއެވެ.

އަންބާރާ މައްސަލައާއި ގުޅިގެން ވ. އަތޮޅު ކައުންސިލުން ޓޫރިޒަމް މިނިސްޓްރީއަށް ފޮނުވި ސިޓީ އާއި އޭގެ ޖަވާބުގައި މިނިސްޓްރީން ފޮނުވި ސިޓީގެ ފޮޓޯއެއް ހިއްސާކުރައްވައި ޝުޖާއު ކުރެއްވި ޓުވީޓެއްގައި ވިދާޅުވީ، އަންބަރާ ކަނޑޫފާ ނައްތާލާ، ތަރައްޤީކުރަންދިން މުއްދަތުގައި އެއްވެސް މަސައްކަތެއްނުކުރާތީ، ރަށަށް ދިންގެއްލުން ބަލައި، އޭގެ ބަދަލު ހޯދައި، އެއްބަސްވުން ބާތިލުކުރުމަށް މިނިސްޓްރީން އެދުމުން އެ މައްސަލާގައި ކުށްވެރިވީ ވ. އަތޮޅު ކައުންސިލް ކަމަށެވެ.

"ބަދަލު ދޭންޖެހެނީވެސް ވ.އަތޮޅު ރައްޔިތުން. ހަމަ ރަގަޅަށް ކޮސްވެއްޖެ!" ޝުޖާއު ވިދާޅުވިއެވެ.

ވ. އަންބަރާގެ އެއްބަސްވުންތައް ބާތިލުކޮށް، އެރަށަކީ ވ. އަތޮޅުގެ ރައްޔިތުންގެ ބޭނުމަށް އެ އަތޮޅު ކައުންސިލުންގެ ބެލުމުގެ ދަށުގައިވާ ރަށެއްގެ ގޮތުގައި ހަމަޖައްސައިދިނުމަށް އެ ކައުންސިލުން ޓޫރިޒަމް މިނިސްޓްރީއަށް ފޮނުވި ސިޓީގެ ޖަވާބުގައި އެ މިނިސްޓްރީން ބުނީ، އަންބާރާ އަކީ ހަނދުވަރު އޯޝަން ހޮލިޑޭސް ޕްރައިވެޓް ލިމިޓެޑާއި ރިޒޯޓެއް ތަރައްގީ ކުރުމަށް ކުއްޔަށް ދޫކޮށްފައިވާ ރަށެއް ކަމަށެވެ.

ވުމާއެކު، އެ ރަށް އެގްރީމެންޓް ކޮށްފައިވާ ފަރާތް ފިޔަވައި އެހެން ފަރާތަކާއި ހަވާލު ކުރެވޭނީ، މަޝްވަރާކޮށް، އެ އެގްރީމަންޓް ބާތިލްކޮށް، އޭގެ ސަބަބުން ދައުލަތުން އެއްވެސް ބަދަލެއް ދޭން ޖެހޭ ނަމަ، އެ ބަދަލު ވ. އަތޮޅު ކައުންސިލުން ހަމަ ޖައްސައިދިނުމުން ކަމަށް އެސިޓީގައިވެއެވެ.

އަންބާރާ އަކީ ރިޒޯޓެއް ޔަރައްގީ ކުރުމަށް ހަނދުވަރު އޯޝަން ޕްރައިވެޓް ލިމިޓެޑަށް 50 އަހަރުގެ މުއްދަތަށް ދޫކޮށްފައިވާ ރަށެކެވެ. އެހެން ނަމަވެސް، ރިސޯޓް ތަރައްގީ ކުރުމަށް ސަރުކާރުން ދީފައިވާ މުއްދަތު ހަމަވެ, އޭގެ ފަހުންވެސް އިތުރު ފުރުސަތު ދީފައިވާ އިރުވެސް އެދެވޭ މަސައްކަތްތަކެއް އެތަނުގައި ނުކުރެވޭ ކަމަށް ވ. އަތޮޅު ކައުންސިލުން ބުނެއެވެ.