އަރަބިއްޔާ ސްކޫލްގެ ބޮޑުބައި ނިމިއްޖެ، މިހާރު ކުރިއަށްދަނީ ފިނިޝިން މަސައްކަތް: އާރުސީސީ

ރަޝީދު ކާޕެންޓްރީ އެންޑް ކޮންސްޓްރަކްޝަން (އާރްސީސީ) އާ ހަވާލުކޮށްގެން ސަރުކާރުން ތަރައްގީކުރަމުން އަންނަ އަރަބިއްޔާ ސްކޫލުގެ 10 ފަންގިފިލާގެ އައު އިމާރާތުގެ 77 އިންސައްތަ މަސައްކަތް ނިމި، ފިނިޝިންގެ އެކި މަރުހަލާތައް ބާރަށް ކުރިއަށްދާ ކަމަށް އެ ކުންފުނިން ބުނެފިއެވެ.

އާރްސީސީން ހާމަކޮށްފައިވާ ގޮތުގައި، ކޮންކްރީޓް މަސައްކަތުގެ 95 އިންސައްތަ މިހާރު ވަނީ ނިމިފައެވެ. ރާނައި ސިމެންތި ޖެހުމާއި، ވޯޓާޕްރޫފިންއާއި، ކުލަ ލުމާއި، ދަގަނޑުގެ މަސައްކަތްތަކާއި، މެކޭނިކަލް، އިލެކްޓްރިކަލް އެންޑް ޕްލަމްބިން އަދި އޭސީ ސިސްޓަމްގެ މަސައްކަތްތައް ވެސް ތަފާތު މަރުހަލާތަކުގައި ކުރިއަށް ގެންދާ ކަމަށް އެ ކުންފުނިން ބުނެފައިވެއެވެ.

ކުރިއަށް އޮތް ތަނުގައި އެންމެ އަވަހަށް ފެށުމަށް ރާވާފައި އޮތީ މުށި ޖެހުމާއި، ދޮރާއި ކުޑަދޮރު ހަރުކުރުމާއި، ސޯލާ ޕެނަލް ހަރުކުރުމުގެ މަސައްކަތެވެ. އޭގެ އިތުރުން، އަލިފާން ނިއްވާ ނިޒާމާއި ލިފްޓާއި ބޭރު ފާރުތަކުގެ ކްލެޑިން ހަރުކުރުމަށް ވެސް ތައްޔާރުވަމުން އަންނަ ކަމަށް އާރްސީސީން ބުނެފައިވެއެވެ.

މި އިމާރާތުގައި 42 ކްލާސް ރޫމާއި، މަލްޓިޕާޕަސް ހޯލަކާއި، ހަތަރު ލިފްޓު ހުންނާނެ ކަމަށާއި ސްކޫލެއްގައި ފުރިހަމަވެފައި ހުންނަންޖެހޭ އެންމެހައި ވަސީލަތްތައް ގާއިމުކޮށްފައި ހުންނާނެ ކަމަށް އެޑިއުކޭޝަން މިނިސްޓްރީން ވަނީ ބުނެފައެވެ. މި ސްކޫލަކީ އަންޑަރ ގްރައުންޑް ޕާކިންއާ އެކު ތަރައްގީކުރާ ފުރަތަމަ ސްކޫލް ކަމަށް ވާއިރު، ޕާކިން ބައިގެ މަސައްކަތް ނިމި 200 އަށް ވުރެ ގިނަ ސައިކަލު ޕާކުކުރެވޭ ޖާގަ ލިބޭނޭކަމަށް މިނިސްޓްރީން ވަނީ ބުނެފައެވެ.

އެޑިއުކޭޝަން މިނިސްޓަރު ކުރިން ބުނެފައިވަނީ، ދެ ދަންފަޅިއަށް ކިޔަވައިދެމުން ދިޔަ ނަމަވެސް، ދަރިވަރުންގެ ނިސްބަތަށް ބެލުމަށް ފަހު އައު އިމާރާތުގައި އެއް ދަންފަޅިއަށް ބަދަލުކުރުމަކީ އަމާޒެއް ކަމަށެވެ. ނަމަވެސް، ގިނަ ކުދިންތަކެއް ވަންނަ ނަމަ ދެ ދަންފަޅިއަށް ބަދަލުކުރަން ޖެހިދާނެ ކަމަށާއި، އެ ކަމާ މެދު ވަކި ގޮތެއް ނިންމޭނީ އަންނަ މަހު ކަމަށެވެ.

އަރަބިއްޔާ ސްކޫލްގެ ކުރީގެ އިމާރާތް ބޮޑަށް ރެނދުލައި ދަރިވަރުން ކިޔަވަން އެކަށީގެން ނުވާ ހާލަތަށް ދިއުމުން، ކުރިން ފޮރިން މިނިސްޓްރީ ހިންގި އިމާރާތަށް ވަގުތީ ގޮތުން ބަދަލުކުރި ނަމަވެސް، ޖާގައިގެ ދަތިކަމާ ހެދި މިހާރު ދަރިވަރުން ކިޔަވަމުން ގެންދަނީ ކުރީގެ ދަރުމަވަންތަ ސްކޫލް ހުރި އިމާރާތުގައެވެ. ކުރީ ސަރުކާރުން ފުރަތަމަ ރޭވީ ކުރީގެ ބައު ޖަމާލުއްދީން ސްކޫލް ހުރި ބިމުގައި އެޅުމަށް ކަމުގައި ވީ ނަމަވެސް، އެ ބިމުން ބައެއް ޖަމާލުއްދީން ސްކޫލަށް ދީ ދެ ސްކޫލް އެއް ސަރަހައްދުގައި ހެދުމުން ތޮއްޖެހޭނެތީ މި ސަރުކާރުން ނިންމީ ގިޔާސުއްދީން ސްކޫލްގެ ބިތްދޮށުގައި އޮންނަ 381 ނަންބަރުކޮށީގެ ބިމުގައި އެ ސްކޫލް އެޅުމަށެވެ.

ކުރިން ހަވާލުކުރި ކޮންޓްރެކްޓަރުގެ އަގަށް ވުރެ 83 މިލިޔަން ރުފިޔާ ކުޑަ އަގެއްގައި އާރްސީސީއާ މަސައްކަތް ހަވާލުކޮށް މި މަޝްރޫއުގެ ބިންގާ އެޅީ މިދިޔަ ނޮވެމްބަރު މަހުގެ ތެރޭގައެވެ.

ޑިސެމްބަރު މަހަށް މަސައްކަތް ނިންމައި އަންނަ ދިރާސީ އަހަރަށް އައު އިމާރާތުގައި ކިޔަވައިދޭން ފެށުމަކީ އަމާޒެއް ކަމަށް ވާއިރު، މި ސްކޫލް ވެގެންދާނީ މާލެ ސަރަހައްދުގައި ހުރި އެންމެ ބޮޑު ސްކޫލަށެވެ.