މުސާރައިގެ މައްސަލަތައް ހައްލުކޮށްދިނުމަށް އައިޖީއެމްއެޗު މުވައްޒަފުން ރައީސަށް ދެވަނަ ޕެޓިޝަން ފޮނުވައިފި

ސިވިލް ސަރވިސްގެ އައު މުސާރައިގެ އޮނިގަނޑާ ގުޅިގެން މުސާރައާއި އިނާޔަތްތަކަށް އައި ބަދަލުތަކުގެ ސަބަބުން ހުރި ކަންބޮޑުވުންތަކަށް ޙައްލެއް ހޯއްދަވައިދެއްވުމަށް އެދި، އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގެ އިދާރީ އަދި އެހީތެރި މަސައްކަތްތައްކުރާ މުވައްޒަފުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އަލުން ޕެޓިޝަނެއް ހުށަހަޅައިފިއެވެ.

މިއީ މި މައްސަލައިގައި އެ މުވައްޒަފުން ރައީސުލްޖުމްހޫރިއްޔާއަށް ހުށަހެޅި ދެވަނަ ޕެޓިޝަނެވެ. މީގެ ކުރިން 2025 ޑިސެމްބަރު 9 ގައި މިފަދަ ޕެޓިޝަނެއް ހުށަހެޅި ނަމަވެސް، މިހާތަނަށް އެއްވެސް ޖަވާބެއް ލިބިފައިނުވާކަން އަލަށް ހުށަހެޅި ޕެޓިޝަނުގައި ވަނީ ފާހަގަކޮށްފައެވެ.

މި ޕެޓިޝަނުގައި މައިގަނޑު ހަތަރު ކަމަކަށް ޙައްލު ހޯދައިދިނުމަށް ވަނީ އެދިފައެވެ:

1. ހާޒިރީ އިނާޔަތް ހަމަހަމަކުރުން: މަޤާމުގެ ފަންތިއާއި ގްރޭޑަށް ބެލުމެއްނެތި، ހޮސްޕިޓަލުގައި މަސައްކަތްކުރާ ހުރިހާ މުވައްޒަފުންނަށް ވެސް، ޚިދުމަތަށް ނުކުންނަ ކޮންމެ ދުވަހަކަށް 200 އާއި 250 ދިވެހި ރުފިޔާއާ ދެމެދުގެ އަދަދަކުން ހާޒިރީ އިނާޔަތް ހަމަހަމަކަމާއެކު ހަމަޖައްސައިދިނުން.

2. ހޮނިހިރު ދުވަހުގެ ޚާއްޞަ އިނާޔަތް: ސަރުކާރު ބަންދު ދުވަހެއްގެ ގޮތުގައި ހޮނިހިރު ދުވަސް ކަނޑައަޅާފައި ވީނަމަވެސް، ޞިއްޙީ ޚިދުމަތުގެ މުހިންމުކަމުން އެ ދުވަހު މަސައްކަތަށް ނުކުންނަންޖެހޭ މުވައްޒަފުންނަށް، އިތުރުގަޑީގެ ފައިސާއާއި ބަންދު ދުވަހުގެ އިނާޔަތް ދިނުން.

3. ރަސްމީ ބަންދު ދުވަސްތަކުގެ އިނާޔަތް: ސަރުކާރު ބަންދު ދުވަސްތަކުގައި ޝިފްޓް އުސޫލުން ޑިއުޓީއަށް ނުކުންނަ މުވައްޒަފުންނަށް، އިންސާފުވެރި ހަމަތަކެއްގެ މަތިން ބަންދު ދުވަހުގެ އިނާޔަތް ފޯރުކޮށްދިނުން.

4. ނޭޝަނަލް ޕޭ ކޮމިޝަނުން ކަނޑައެޅި އިނާޔަތް ދިނުން: މުސާރަ އެއްހަމަކުރުމުގެ ތެރޭގައި މުވައްޒަފުންނަށް ގެއްލުނު ބައި ފޫބެއްދުމުގެ ގޮތުން، ނޭޝަނަލް ޕޭ ކޮމިޝަނުން 2026 މެއި މަހު ކަނޑައަޅާފައިވާ އިނާޔަތް ލަސްނުކޮށް ލިބޭނެ އިންތިޒާމު ހަމަޖެއްސުން.

މީގެއިތުރުން، ރިސްކް އެލަވަންސް ކަނޑާލުމާއި، ހާޒިރީ އިނާޔަތް ދިނުމުގައި ތަފާތުކުރުންތައް ގެންގުޅޭ މައްސަލައާއި، އިތުރުގަޑީގެ މަސައްކަތްކުރާ މުވައްޒަފުންގެ ޙައްޤުތައް ގެއްލެމުންދާ މައްސަލައާމެދު ވެސް މި ޕެޓިޝަނުގައި ކަންބޮޑުވުން ފާޅުކޮށްފައިވެއެވެ.

ހޮސްޕިޓަލަކީ ރައްޔިތުންގެ ފުރާނައާ ގުޅިފައިވާ ނާޒުކު ޚިދުމަތްތަކެއް ކެނޑިނޭޅި ފޯރުކޮށްދޭ އެންމެ މުހިންމު މަރުކަޒުކަން ފާހަގަކުރަމުން، އެ ތަނުގެ އެންމެ އާދައިގެ މަޤާމުތަކުން ފެށިގެން އެންމެ އިސް މަޤާމުތަކާ ހަމައަށް ހުރިހާ މުވައްޒަފުންގެ މެދުގައި ހަމަހަމަކަމާއި އިންސާފު ޤާއިމުކޮށްދިނުމަށް މި ޕެޓިޝަންގައި މުވައްޒަފުން ވަނީ އިލްތިމާސްކޮށްފައެވެ.