ހެންވޭރުކޮޅުގައި އާންމުންނަށް އުނދަގޫކުރަމުންދިޔަ މީހަކު ފުލުހުންގެ ބެލުމުގެ ދަށަށް

ހެންވޭރު ކަށިމާ ހިނގުމާއި ދޫހިމެރި މަގުގައި އާންމުންނަށް ބޮޑެތި އުނދަގޫތަކެއް ކުރަމުންދިޔަ މީހަކު އެންމެފަހުން ފުލުހުންގެ ބެލުމުގެ ދަށަށް މިއަދު ގެންގޮސްފިއެވެ. ފުލުހުންގެ ބެލުމުގެ ދަށަށް ގެންގޮސްފައިވަނީ އަޙްމަދު ފައިރިޝް ނަމަކަށް ކިޔާ މީހެކެވެ. މިކަން ފުލުހުންގެ އިދާރާއިން ވަނީ މީޑިއާއަށް ކަށަވަރުކޮށްދީފައެވެ.

އެ ސަރަހައްދުގައި ދިރިއުޅޭ ރައްޔިތުންނަށާއި މަގުން ހިނގާބިނގާވެ އުޅޭ ފަރާތްތަކަށް އެކި ގޮތްގޮތުން އުނދަގޫކުރަމުންދާ މި މީހާގެ މައްސަލަ މީގެކުރިންވެސް އެތައް ފަހަރަކު ފުލުހަށް ހުށަހަޅާފައިވާއިރު، ސޯޝަލް މީޑިއާގައިވެސް ގިނަ ބަޔަކު ވަނީ އެ ކަންބޮޑުވުންތައް ހިއްސާކޮށްފައެވެ. މިއަދުވެސް އޭނާ ފުލުހުންގެ ބެލުމުގެ ދަށަށް ގެންގޮސްފައިވަނީ ފުލުހުންނަށް ހުށަހެޅުނު ޝަކުވާއަކާ ގުޅިގެންނެވެ.

މި މައްސަލަ ހޫނުވެގެން ގޮސްފައިވަނީ، އެމީހާގެ އުނދަގޫ އިންތިހާއަށް ބޮޑުވެ، އެ ސަރަހައްދުގައި ދިރިއުޅޭ ޒިންމާދާރު މަގާމެއް އަދާކުރައްވާ ބޭފުޅެއް ކަމަށްވާ މުޙައްމަދު ސައީދު، ހެންވޭރު ޕޮލިސް ސްޓޭޝަނުގައި ބަނޑުހައިހޫނުކަމުގެ ހަޅުތާލެއް ފެށްޓެވުމާ ގުޅިގެންނެވެ.

މިކަމާ ގުޅިގެން ސައީދު ފޭސްބުކްގައި ކުރެއްވި ޕޯސްޓެއްގައި ބުނެފައިވަނީ ވޭތުވެދިޔަ ދޮޅު އަހަރެއްހާ ދުވަހު މަސްތުވާތަކެތީގެ ވަބާގައި ޖެހިފައިވާ ފައިރިޝްގެ ފަރާތުން ކަށިމާ ހިނގުމާއި ދޫހިމެރި މަގުގައި އާންމުންނަށް އިންތިހާއަށް އުނދަގޫތަކާ ކުރިމަތިލާން ޖެހިފައިވާ ކަމަށެވެ. އަދި އޭނާގެ މި އަމަލުތަކުގެ ސަބަބުން އާއިލާތަކަށާއި، އަވަށްޓެރިންނަށާއި، އެ މަގު ބޭނުންކުރާ އެންމެހައި ފަރާތްތަކުގެ ރައްކާތެރިކަން ގެއްލިފައިވާ ކަމަށްވެސް އޭނާ ފާހަގަކުރެއްވިއެވެ.

އޭނާގެ ފަރާތުން އާންމުނަށް ކުރިމަތިވާ ބައެއް އުނދަގޫތަކުގެ ތެރޭގައި:

• މަގުން ހިނގާބިނގާވެ އުޅޭ މީހުންނާ ދިމާލަށް ހުތުރު ބަހުން ހަޅޭއްލެވުން.

• މަގުމައްޗަށް ސައިކަލު ނެރުމާއި، ބަންދު ބޯޑުތައް ދަމާފައި މަގު ބަންދުކޮށް ޓްރެފިކަށް ހުރަސްއެޅުން.

• މީހުން ދިރިއުޅޭ ގެތަކަށް ކުނި އުކުން

• އޭނާ ދިރިއުޅޭ އިމާރާތުގެ ބެލްކަނީން މަގުމަތީގައި ތިބޭ މީހުންގެ ގަޔަށް ތެލާއި ފެން އުކުން

މި މައްސަލަތައް ވީޑިއޯ ހެއްކާއެކު މީގެކުރިން ތަކުރާރުކޮށް މުއައްސަސާތަކަށް ހުށަހެޅި ނަމަވެސް، ވޭތުވެދިޔަ ދޮޅު އަހަރު ދުވަހުގެ ތެރޭގައި އެދެވޭ އެއްވެސް ހައްލެއް ލިބިފައިނުވާ ކަމަށް ސައީދު ވަނީ ޕޯސްޓްގައި ބުނެފައެވެ. އަދި އާއިލާގެ ރައްކާތެރިކަމަށްޓަކައި ހަޅުތާލު ފަށަން މަޖުބޫރުވީ ދައުލަތުގެ މުއައްސަސާތަކުން ރައްޔިތުން ހިމާޔަތްކުރުމުގައި ނުކުޅެދިފައިވާތީ ކަމަށާއި، މިކަމަށް ދާއިމީ ހައްލެއް ނުލިބެނީސް ހަޅުތާލު ހުއްޓާނުލާނެ ކަމަށްވެސް އޭނާ ބުންޏެވެ.