4 އަހަރު ތެރޭ ސިއްހީ ދާއިރާ: ނިޒާމު ލާމަރުކަޒު ކުރެވި އުންމީދީ ބަދަލުތަކާއި ދިމާލަށް!

ރައީސް އިބްރާހިމް މުހައްމަދު ސޯލިހުގެ ވެރިކަމަށް ހަތަރު އަހަރު ފުރިފައިވާއިރު ސަރުކާރުން އެންމެ ފުރަތަމަ ދުވަހުއްސުރެ ގެންގުޅޭ އަމާޒަކީ ލާމަރުކަޒީ ނިޒާމެއްގެ ތެރެއިން ރައްޔިތުންނަށް ޚިދުމަތް ދިނުމުގެ އަމާޒެވެ.

ސިއްހީ ނިޒާމު ހަރުދަނާ ކުރުމަށްވެސް ސަރުކާރުގެ ވިސްނުން ހުރީ ސިއްހީ ނިޒާމު ލާމަރުކަޒީކޮށް ސިއްހީ ފަރުވާ ހޯދުމަށް މާލެއަށް ކުރަން ޖެހޭ ދަތުރުތަކަށް ނިނުމެއް ގެނައުމެވެ.

އެގޮތުން އަތޮޅުތެރޭގެ ސިއްހީ ޚިދުމަތް ހަރުދަނާ ކުރުމަށް ފާއިތުވި ހަތަރު އަހަރު ދުވަހުގެ ތެރޭގައި މުހިންމު މަސައްކަތްތަކެއް ކޮށްފައިވާކަން ފާހަގަކޮށްލެވެއެވެ.

ސިއްހީ މަރުކަޒުތަކާއި ހޮސްޕިޓަލުތައް އަޕްގްރޭޑްކުރުން

ރާއްޖޭގައި ސިއްހީ ހިދުމަތްދޭ 164 ތަނެއް ސަރުކާރުން އަންނަނީ ހިންގަމުންނެވެ. މާލޭގެ މައި ހޮސްޕިޓަލުން ލިބޭ ހިދުމަތްތައް އަތޮޅުތަކުން ނުލިބޭތީ ކޮންމެ އަހަރަކު ވެސް އެތައް ބަޔަކު ޑޮކްޓަރަށް ދެއްކުމަށް މާލެ އާދެ އެވެ. އެކަމަށް ހައްލެއް ހޯދުމަށް އަމާޒުކޮށް މި ސަރުކާރުން އަންނަނީ ފަސް ސަރަހައްދެއްގައި ޓާޝަރީ ފެންވަރުގެ ހޮސްޕިޓަލްތައް ގާއިމްކުރުމުގެ މަސައްކަތް ކުރަމުންނެވެ.

ހދ. ހަނިމާދޫ، ށ. މިލަންދޫ، ނ. ވެލިދޫ، ކ. ތުލުސްދޫ، އދ. މާމިގިލި، ވ. ފެލިދޫގެ އިތުރުން ތ. ވިލުފުށީގައި ހޮސްޕިޓަލް އަޅަން ވެސް ސަރުކާރުން ވަނީ އިއުލާނުކޮށްފަ އެވެ.

އޭގެ ތެރެއިން ބޮޑު ރަށްރަށުގައި އަޅާނީ 50 އެނދުގެ ހޮސްޕިޓަލެވެ. އަދި، ކުދި ރަށްތަކުގައި އަޅާނީ 30 އެނދުގެ ހޮސްޕިޓަލެވެ. އޭގެ އިތުރުން، ހދ. ކުޅުދުއްފުއްޓާއި ގދ. ތިނަދޫގައި 100 އެނދުގެ ހޮސްޕިޓަލް އަޅާނެ އެވެ.

އޭގެ އިތުރުން ރަށްރަށުގައި ގާއިމް ކުރެވިފައިވާ ސިއްހީ މަރުކަޒުން ލިބެން ހުރި ސިއްހީ ޚިދުމަތްތައް އަޕްގްރޭޑް ކުރުމުގެ މަސައްކަތަށްވެސް ސަރުކާރުން ހޭދަތަކެއް ކުރަމުން ދެއެވެ. އާދައިގެ ކުދި ޓެސްޓުތައް ހެދުމަށް ފުރައިގެން ކައިރި ހޮސްޕިޓަލުތަކަށް ދާން ޖެހޭ ޖެހުމަށް މިހާރު ނިނުމެއް ގެނެވިފައިވާކަމަށް ހެލްތު މިނިސްޓަރު ނަޝީމު ވަނީ ވިދާޅުވެފައެވެ.

ތިނަދޫ ޓާޝަރީ ހޮސްޕިޓަލް އެޅުމަށް މި ސަރުކާރުން ތައްޔާރު ވަމުން އަންނައިރު، ތިނަދޫގައި މިހާރު ހުރި ހޮސްޕިޓަލް ޒަމާނީ ފެންވަރަށް ތަރައްޤީ ކުރުމުގެ މަސައްކަތްވެސް ސަރުކާރުން ގެންދަވަނީ ކުރަށްވަމުންނެވެ.

އެގޮތުން އެ ހޮސްޕިޓަލްގައި ސީޓީ އާއި މެމޯގްރަފީ މެޝިން ބެހެއްޓުމަށް ބޭނުންވާ ޢިމާރާތް ނިންމާފައިވާއިރު، ވޯޑުތައް އެއަރކޮންޑިޝަންކޮށް ނިންމައި ޕެރެމެޑިކް އެންބިއުލަންސް މިހާރު ވަނީ ތިނަދޫ އަށް ގެންގޮސްފައެވެ.

މީގެ އިތުރުން މި ސަރުކާރުން އެ ހޮސްޕިޓަލަށް މުޅިން އަލަށް ޑިޖިޓަލް އެކްސްރޭ މެޝިނަކާއި، އީ.އެންޓީ. މެޝިނަރީޒް ގެނެސްފައިވާއިރު، އަލްޓްރާ ސައުންޑް ސްކޭން މެޝިނާއި، އޯތޯޕެޑިކް ސާރޖަރީ ސެޓް ވަނީ ގެނެސްފައެވެ. ހަމައެއާއެކު ނިއޮނޭޓަލް ވެންޓިލޭޓަރާއި، ފިޒިއޯތެރަޕީއަށް ބޭނުންވާ ހުރިހާ އިކުއިޕްމަންޓެއް މިވަގުތު އެ ހޮސްޕިޓަލްގައި އެބަހުއްޓެވެ.

އައްޑޫ ސިޓީގެ ހޮސްޕިޓަލަށް ބަލާލި ނަމަވެސް ގިނަ ޚިދުމަތްތަކެއް އަޕްގްރޭޑް ކުރެވިފައިވާކަން ފާހަގަކޮށްލެވެއެވެ. އެގޮތުން އައްޑޫ ސިޓީގެ ހޮސްޕިޓަަލަށް އެމް.އާރު.އައި މެޝިނާއި، އެކްސް-ރޭ މެޝިންގެ އިތުރުން ސީޓީ ސްކޭން މެޝިނާއި، އީ.އެން.ޓީ އިކުއިޕްމެންޓާއި، އެންޑަސްކޯޕާއި، ކޮލޮނަސްކޯޕް ގެނެސްފައިވެއެވެ.

އުނގޫފާރު ރީޖަނަލް ހޮސްޕިޓަލަށް ބަލާލާއިރު އެ ހޮސްޕިޓަލްގައި 6 ޕްރައިވެޓް ރޫމް ޢިމާރާތްކޮށް ޚިދުމަތްދޭން ފަށާފައި ވާއިރު، އާ އިކުއެޕްމަންޓާއެކު އީއެންޓީ ކްލިނިކެއް ގާއިމްކޮށް ރިޖިޑް އެންޑަސްކޯޕީ، މައިނާރ އޯރަލް ސާޖަރީ އަދި އޮޓޯ އެންޑަސްކޯޕީފަދަ އާ ހިދުމަތްތައް ވަނީ ތައާރަފްކޮށްފައެވެ.

އޭގެ އިތުރުން ބަލި މީހުން އަވަސް ފަރުވާއާއި ހަމަޔަށް ގެންދިއުމަށް ބޭނުންވާ އެމްބިއުލަންސްތައް ރަށްރަށަށް ހަމަޖެއްސުމުގެ މަސައްކަތްވެސް ޚާއްސަ އަހަންމިއްޔަތެއް ދީގެން މި ސަރުކާރުން ކޮށްފައިވެއެވެ.

ރާއްޖޭގައި ހޮސްޕިޓަލްތައް މީގެކުރިން ހިންގަމުން ދިޔައީ ސީދާ ސަރުކާރުގެ ބެލުމުގެ ދަށުންނެވެ. އެހެން ނަމަވެސް މި ސަރުކާރުން ވަނީ އަމިއްލަ ބޯޑެއްގެ ދަށުން ހޮސްޕިޓަލްތައް ހިންގުމުގެ ބާރުތައް ދީފައެވެ.

ކެންސަރު ހޮސްޕިޓަލް ގެ މަސައްކަތް ކުރިއަށް

މި ސަރުކާރުން ލ އަތޮޅުގައި އެޅުމަށް އިއުލާނުކުރި ކެންސަރު ހޮސްޕިޓަލަކީ އަނެއްކާވެސް ކެންސަރަށް ފަރުވާ ހޯދުމަށް މާލެއަށް ޖަވާވުން ނިމުމަކަށް ގެނައުމުގެ ތަސައްވަރެކެވެ.

ލ.ގަމުގައި ތަރައްޤީކުރާ ކެންސަރު ހޮސްޕިޓަލުގެ ޢަމަލީ މަސައްކަތް މިއަހަރު ފެށޭނެކަމަށް ރައީސް މީގެ ކުރިން ވަނީ ވިދާޅުވެފައެވެ.

އިންޑިއާގެ އެގްޒިމް ބޭންކުގެ އެހީގައި ތަރައްޤީކުރާ މިހޮސްޕިޓަލްގެ ޑީޓެއިލް ޕްރޮޖެކްޓްގެ މަސައްކަތާއި ހޮސްޕިޓަލާއި ގުޅޭގޮތުން ހަދަންޖެހޭ ސަރވޭތައް ހެދުމުގެ މަސައްކަތް ކުރިއަށްދާ ކަމަށް އެގްޒިމް ބޭންކުން ބުނެއެވެ.

މިހާތަނަށް މިމަޝްރޫޢުގެ ދަށުން ގަމުގައި ކެންސަރ ހޮސްޕިޓަލް އަޅާ ސަރަޙައްދު ކަނޑައަޅާ އެސަރަޙައްދުގެ ސޮއިލް ޓެސްޓުކޮށްވަނީ ނިމިފައެވެ. އަދި ހޮސްޕިޓަލް ހިމެނޭ ސަރަޙައްދުގެ ވަށައިގެންވާ މަގުތައް ހެދުމުގެ މަސައްކަތްވެސް ކުރިއަށް ގެންގޮސްފައިވާ ކަމަށް ގަމު ހޮސްޕިޓަލުން ވިދާޅުވެއެވެ.

ނަފްސާނީ ދުޅަހެޔޮކަމަށް ޚާއްސަ އަހަންމިއްޔަތެއް ދިން

ވަށާ ޖެހޭ ސިއްހީ ނިޒާމެއްގެ ތެރެއިން ރައްޔިތުންގެ ދުޅަހެޔޮކަން ކަށަވަރުކޮށްދިނުމަކީ ސަރުކާރުން ޚާއްސަ އަހަންމިއްޔަތެއް ދޭ ކަމެއްގެ ގޮތުގައި އަބަދުވެސް ފާހަގަކުރެއެވެ. އެގޮތުން ނަފްސާނީ ދުޅަހެޔޮކަން ތަރައްގީކުރުމަށް ސަރުކާރުން އިސްކަން ދެމުންދާކަން ސަރުކާރުގެ ސިޔާސަތުތަކުން ޔަގީން ކުރެވެއެވެ.

އެގޮތުންވެސް އެންމެ ފާހަގަކޮށްލެވޭ ކަމަކީ އިންދިރާ ގާންދީ މެމޯރިއަލް ހޮސްޕިޓަލުގައި ނަފްސާނީ ދުޅަހެޔޮކަމަށް ޚާއްސަ ވޯޑެއް ހުޅުވިގެން ދިއުމެވެ.

މިއީ އައިޖީއެމްއެޗްގެ ސެންޓަ ފޯރ މެންޓަލް ހެލްތުގެ ދަށުން އެނދުމަތިކޮށްގެން ފަރުވާދޭ މީހުންނަށް ޚާއްސަ 9 އެނދަކާއި އެކު ހުޅުވުނު ވޯޑެކެވެ.

މިވޯޑުގައި ޑީއެސްކެލޭޝަން ކޮޓަރިއަކާއި ބޭރަށް ނިކުމެވޭ ގޮތަށް ތައްޔާރުކޮށްފައިވާ ޓެރަސްއެއް ހިމެނެއެވެ. އަދި ބަލިމީހުން ދުޅެހެޔޮ ސިއްހަތެއްގައި ތިބުމަށް ކަސްރަތުކުރާ މެޝިންތަކެއްވެސް ހިމެނެއެވެ.

ނަފްސާނީ ބަލީގެ މީހުންނަށް ދެވޭ ފަރުވާގެ ފެންވަރު ރަނގަޅުކުރުމަށް ސަރުކާރުން މަސައްކަތް ކުރާއިރު، މި ވެރިކަމުގެ ކުރީކޮޅު 2019 ވަނަ އަހަރު އައިޖީއެމްއެޗްގައި ޑިޕާރޓްމަންޓް ފޯރ މެންޓަލް ހެލްތް ކެއަރ، ސެންޓަރ ފޯރ މެންޓަލް ހެލްތު ވަނީ ހުޅުވާ ޚިދުމަތް ދޭން ފަށާފައެވެ.

މަސްތުވާތަކެތިން ސަލާމަތް މުޖުތަމައެއް ބިނާކުރުމަށް ފިޅަވަޅުތަކެއް!

މަސްތުވާތަކެއްޗަކީ ރާއްޖެއަށް މިއަދު ދިމާވެފައިވާ އެންމެ ބޮޑު އިޖްތިމާއީ އެއް މައްސަލައެވެ. މިއީ ސިއްހީ ދާއިރާއަށްވެސް އޮތް ވަރަށް ބޮޑު ގޮންޖެހުމެކެވެ. މިވަބާގައި ޖެހިގެން ދާ ޒުވާނުން ޚާއްސަ ފަރުވާއެއްގެ ތެރެއިން އަނބުރާ މުޖުތަމައަށް ގެނައުމަކީ ސަރުކާރުން ވަރަށް ބޮޑު އަހަންމިއްޔަތެއް ދޭ ކަމެކެވެ.

ސަރުކާރުގެ މި އަމާޒަށް ވާސިލްވުމަށް މަސްތުވާތަކެއްޗާއި ދެކޮޅަށް މަސައްކަތް ކުރާނެ ޕްލޭނެއް ވަނީ އެކުލަވާލެވިފައެވެ.

ސ. ހުޅުމީދޫގައި ހުޅުވި 60 މީހުންގެ ޖާގައިގެ "ވިލުނު" ސެންޓަރަކީ ވެސް މަސްތުވާތަކެއްޗާ ދެކޮޅަށް ކުރާ މަސައްކަތަށް ލިބިގެންދިޔަ ކުރިއެރުމެކެވެ. އެ ސެންޓަރުގައި ޑިޓޮކްސިފިކޭޝަން، ޓްރީޓްމެންޓު، ރެސިޑެންޝަލް ޓްރީޓްމެންޓް، ކޮމިއުނިޓީ ރިހެބިލިޓޭޝަން އަދި ރީއިންޓެގްރޭޝަނާ ގުޅޭ ފަރުވާގެ ޕްރޮގްރާމްތައް ކުރިޔަށްގެންދާނެ އެވެ.

އޭގެ އިތުރުން ހދ. ހަނިމާދޫގައި ޑްރަގް ޑިޓޮކްސިފިކޭޝަން އެންޑް ކޮމިއުނިޓީ ރިހެބިލިޓޭޝަން ސެންޓަރެއް ވަނީ ހުޅުވާފައެވެ. އެ ސެންޓަރު ހުޅުވާފައިވަނީ ފަރުވާދޭން ބޭނުންވާ ހުރިހާ ވަސީލަތްތަކާއި އެކުގައެވެ.

މާލެއިން ބޭރުން ރާއްޖޭގެ ތިން ސަރަހައްދެއްގައި ޑްރަގް ރިހެބިލިޓޭޝަން ސެންޓަރ ޤާއިމް ކުރުމަކީ މި ސަރުކާރުގެ ފުރަތަމަ ސަތޭކަ ދުވަހުގެ ވައުދުތަކުގެ ތެރޭގައި ހިމެނޭ ކަމެކެވެ.

ކަންމިހެން އޮތް ނަމަވެސް މަސްތުވާތަކެތީގެ ވަބާއިން މުޖުތަމައު ސަލާމަތް ކުރުމުގެ މަސައްކަތަކީ ހަމައެކަނި ހެލްތު މިނިސްޓްރީއަށް ނުވަތަ ސަރުކާރަށް ކުރެވޭނެ ކަމެއް ނޫނެވެ. އެކަމަށްޓަކައި މުޖުތަމައުގެ ހުރިހާ ފަރުދުންގެ އެހީތެރިކަން އިންތިހާއަށް ބޭނުންވެއެވެ.

މަސްތުވާތެކެތީގެ ވެށިން މީހަކު ނެރެ މުޖުތަމައާއި ގުޅާލެވޭނީ އެމީހުން ބަލައިގަނެ، އަނބުރާ މުޖުތަމައުގެ ބައެއްގެ ގޮތުގައި ގަބޫލުކުރުން މުހިންމެވެ.

ސިއްހީ ދާއިރާ ތަރައްގީ ކުރުމަށް ބޮޑު ތަސައްވަރެއް!

ސިއްހީ ދާއިރާއަކީ ސީދާ ރައްޔިތުންނާއި ގުޅިފައިވާ ދާއިރާއެކެވެ. ރައްޔިތުންގެ ދުޅަހެޔޮކަން ކަށވަރުކުރުމަށް އެންމެ މުހިންމީ ސިއްހީ ދާއިރާ ހަރުދަނާ ކުރުންކަމަށް ސަރުކާރުން ގަބޫލުކުރެއެވެ.

ކަންއެެހެން އޮތް އިރު، ސިއްހީ ދާއިރާ ފުރާ ފުރިހަމަ ކުރުމަށް އަންނަ އަހަރުގެ ބަޖެޓުގައިވެސް މުހިންމު ކަންތައްތަކެއް ވަނީ ހިމަނާފައެވެ.

ކުރިއަށް އޮތް އަހަރަށް ސަރުކާރުން ހުށައެޅި ބަޖެޓުގައި ސިއްހީ ދާއިރާގެ ތަރައްގީއަށް 5 ބިލިއަން ރުފިޔާވަނީ ކަނޑައަޅާފައެވެ. އަހަރުގެ ބަޖެޓުގައި ރާއްޖޭގެ 136 ރަށެއްގެ ހޮސްޕިޓަލް ނުވަތަ ސިއްހީ މަރުކަޒު އަޕްގްރޭޑްކުރުމަށް ހިމަނާފައިވެއެވެ.

ސިއްހީ ދާއިރާއަށް ބޭނުންވާ އުމްރާނީ ތަރައްގީ ގެނައުމާއި، ވަސީލަތްތައް މުއްސަނދިކޮށް ޚިދުމަތްތައް ފުޅާކުރުމުގެ އިތުރުން ފެންވަރު ރަނގަޅުކުރުމަށްވެސް ހިމަނާފައިވެއެވެ.

މި ހުރިހާ ކަމަކަށްވުރެ އެންމެ އިސްކަމެއް ބަޖެޓުގައި ހިމަނާފައިވަނީ ސިއްހީ ދާއިރާގެ މުވައްޒަފުންގެ މުސާރަ ބޮޑު ކުރުމަށެވެ. އެގޮތުން އަންނަ އަހަރުގެ ބަޖެޓުގައި ސިއްހީ ޚިދުމަތްތެރިންގެ އަދަދު އިތުރުކުރުމަށް 40.1 މިލިއަން ރުފިޔާ ހިމަނާފައިވެއެވެ.

މި ސަރުކާރުގެ ވިސްނުމަކީ ޖުމުލަ ގޮތެއްގައި މިދާއިރާއަށް ކުރާ ހޭދަ އިގުތިސާދީ ހާލަތު ތަންދޭ މިންވަރަކުން އިތުރުކުރަމުން ދިއުމެވެ.

މި ސަރުކާރުން ވަނީ ދުނިޔެއަށް ކުރިމަތިވި ސިއްހީ ބޮޑު ކާރިސާ "ކޯވިޑް-19" ގާތުން ތަޖުރިބާކޮށްފައެވެ. ސިއްހީ ކުއްލި ނުރައްކަލުގެ އެ ހާލަތުގައި ސަރުކާރުން އެޅި ފިޔަވަޅުތަކުގެ ސަބަބުން ރައްޔިތުންގެ ދުޅަހެޔޮކަން ކަށަވަރުކުރެވި، ސިއްހީ ނިޒާމު ފުނޑިގެން ނުގޮސް ނެގެހެއްޓުނުކަމަށް ސަރުކާރުން ގަބޫލުކުރާއިރު، ސިއްހީ ދާއިރާ ތަރައްގީކުރުމަށް ސަރުކާރުން އެހާ މުހިންމު އަހަންމިއްޔަތެއް ދެނީ ކޯވިޑްގެ ވަބާ ދަސްކޮށްދީން ފިލާވަޅުތަކުގެ ސަބަބުންނެވެ.

ސަރުކާރުން އަމާޒު ހިފާފައި ހުރީ އަމިއްލަ ރަށުގައި ތިބެގެން ސިއްހީ ފަރުވާ ހޯދޭނެ މަގު ކޮންމެ ރައްޔިތަކަށްވެސް ފަހިކޮށްދިނުމަށެވެ. ހިއްސީ ޚިދުމަތަކީ އަސާސީ ހައްގަކަށް ވާއިރު، ތަކުލީފުތައް އުފުލަން ނުހެޖި ރަށުގައި ހުރެގެން ރަނގަޅު ފެންވަރުގެ ސިއްހީ ޚިދުމަތް ލިބޭނެ އިންތިޒާމުތައް ގާއިމުކުރުމަކީ ފާއިތުވި ހަރަތު އަހަރު ސަރުކާރުން ގެންގުޅުނު ތަސައްވަރެވެ.

އެ ތަސައްވުރުގައި ކުލަ ޖެހެމުންދާކަން ސަރުކާރުން މިއަދު ފާހަގަކުރެއެވެ.