ތެލެސީމިއާ ކުދީންގެ އެލަވަންސްއަށް މަހަކު މިލިއަނެއް, 500 ކުދީންނަށް އެލަވަންސް

ތެލެސީމިއާގެ ހާލަތު ތަހައްމަލުކުރަމުންދާ ކުދިންނަށް ދައުލަތުން ދެމުން އަންނަ މާލީ އިނާޔަތް މަހަކު 2،000 ރުފިޔާއަށް ބޮޑުކޮށްފައިވާއިރު މިހާރު 500 އަށް ވުރެ ގިނަ ކުދިންނަށް މި އެލަވަންސް ލިބެމުންދާ ކަމަށް ސިއްހަތާއި، އާއިލާއާއި އިޖުތިމާއީ އެހީއާ ބެހޭ ވަޒީރު ގީލާ އަލީ ވިދާޅުވެއްޖެ އެވެ.

އެކަމަނާ މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގަ އެވެ.

ވަޒީރު ވިދާޅުވީ، ތެލެސީމިއާ ތަހައްމަލުކުރާ ފަރާތްތަކަށް ހާއްސަ އެލަވަންސެއް ހަމަޖައްސައިދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މުހިންމު ވަޢުދުފުޅެއް ކަމުން 1 ޖަނަވަރީ 2026 އިން ފެށިގެން ތެލެސީމިއާ ކުދީންނަށް މާލީ އިނާޔަތުގެ ގޮތުގައި 1،000 ރުފިޔާ ދޭން ފެށުނު ނަމަވެސް، ރައީސުލްޖުމްހޫރިއްޔާގެ ހާއްސަ ނިންމެވުމުގެ ދަށުން އެ އަދަދު މިހާރު ވަނީ 2،000 ރުފިޔާއަށް ބޮޑުކޮށްދެއްވާފައި ކަމަށެވެ.

އަދި މި ބަދަލާއެކު ރާއްޖޭގައި ތިބި 500 އަށް ވުރެ ގިނަ ތެލެސީމިއާ ކުދިންނަށް މި އެލަވަންސް ގަވާއިދުން ލިބެމުންދާކަން ވަޒީރު ފާހަގަކުރެއްވި އެވެ.

ތެލެސީމިއާ ކުދިންނާއި އެ ކުދިންގެ އާއިލާތަކުގެ ޙާލަތު ރަނގަޅުކޮށް، އެކުދިންނަށް އުފާވެރި ދިރިއުޅުމެއް ހޯދައިދިނުމަށް މި ސަރުކާރުން އަންނަނީ ވަރަށް ބޮޑު އިސްކަމެއް ދީގެން ފުޅާ ދާއިރާއެއްގައި މަސައްކަތް ކުރަމުން ކަމަށާ މިގޮތުން، މި ބައްޔަށް ދާއިމީ ފަރުވާއެއް ހޯދައިދިނުމުގެ ގޮތުން ޒަކާތު ފަންޑުގެ އެހީގައި މިހާތަނަށް 28 ކުއްޖަކު ވަނީ ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައި ކަމަށް ވަޒީރު ވިދާޅުވި އެވެ.

އިސްލާމިކް މިނިސްޓްރީއާއި ހެލްތު މިނިސްޓްރީއާ ދެމެދު ވެފައިވާ އެއްބަސްވުމުގެ ދަށުން، ކޮންމެ އަހަރަކު 10 ކުއްޖަކަށް ބޯންމެރޯ ހެދުމަށް ކޮންމެ ކުއްޖަކަށް އެއް މިލިއަން ރުފިޔާއަށް ވުރެ އިތުރުނުވާނެހެން އަހަރަކު ޖުމްލަ 10 މިލިއަން ރުފިޔާ ސަރުކާރުން އަންނަނީ ހަރަދުކުރަމުންނެވެ.