މެންޓަލް ހެލްތު ހެލްޕްލައިނަށް 2 އަހަރުތެރޭ 23،679 ކޯލް

ނަފްސާނީ އެހީތެރިކަމަށް ޚާއްޞަ ޤައުމީ ހެލްޕްލައިން "1677" މެދުވެރިކޮށް 2024 ވަނަ އަހަރުން ފެށިގެން މިހާތަނަށް ޖުމްލަ 23,679 ކޯލް ލިބިފައިވާ ކަމަށް ޞިއްޙީ ވުޒާރާއިން ހާމަކޮށްފިއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ޞިއްޙީ ވަޒީރު ގީލާ ޢަލީ ހިއްސާކުރެއްވި ތަފާސްހިސާބުތަކުން ދައްކާ ގޮތުގައި 2024 ވަނަ އަހަރު އެ ހެލްޕްލައިނަށް 2،576 ކޯލް ލިބިފައިވެއެވެ. އެ ޢަދަދު 2025 ވަނަ އަހަރު 10،821 އަށް އިތުރުވެފައިވާއިރު 2026 ވަނަ އަހަރުގެ މިހާތަނަށް 10،282 ކޯލް ލިބިފައިވެއެވެ.

ނަފްސާނީ ބަލިތަކަށް ފަރުވާ ދިނުމުގެ މަސައްކަތާ ގުޅޭ ގޮތުން ވަޒީރު ވިދާޅުވީ، މަރުކަޒީ ފަރުވާގެ ނިޒާމުގެ ތެރެއިން 201 މީހަކު ފަރުވާ ފުރިހަމަކޮށް ޢާއިލާތަކާ ހަވާލުކުރެވިފައިވާ ކަމަށެވެ. އޭގެ އިތުރުން، 64 މީހަކަށް ފަރުވާ ދީ އެ ފަރާތްތައް އަލުން މުޖުތަމަޢުގެ ޙަރަކާތްތަކުގައި ބައިވެރިކުރުމުގެ މަސައްކަތް ކުރިއަށްދާ ކަމަށް ވެސް ވިދާޅުވިއެވެ. ހަމައެއާއެކު، ޖަމިއްޔާތަކާ ގުޅިގެން ބަލިމީހުންގެ ގެތަކަށް ޒިޔާރަތްކޮށް ފަރުވާ ފޯރުކޮށްދިނުމުގެ ޚިދުމަތެއް ވެސް ތަޢާރަފުކޮށްފައިވާ ކަމަށް ވިދާޅުވިއެވެ.

ކުރިއަށް ރޭވިފައިވާ މަޝްރޫޢުތަކާ ގުޅޭ ގޮތުން ގީލާ ވިދާޅުވީ، ކުޑަކުދިންނަށް ޚާއްޞަ ނަފްސާނީ ފަރުވާގެ ނިޒާމެއް ޤާއިމުކުރުމުގެ މަސައްކަތް ހިނގަމުންދާ ކަމަށާއި ބޭސް ލިބުމުގެ ދަތިކަން ޙައްލުކުރުމަށް 9 ރަށެއްގައި ޚިދުމަތް ފެށުމަށް ތައްޔާރުވަމުންދާ ކަމަށެވެ. އަދި 80 އެނދުގެ ސައިކިއެޓްރިކް އިމަޖެންސީ ޚިދުމަތެއް ފެށުމާއި ޖިންސަށް ޚާއްޞަ ރީހެބިލިޓޭޝަން ޚިދުމަތް ފުޅާކުރުމާއި އަންހެނުންނަށް ޚާއްޞަ ނަފްސާނީ ބަލިމީހުން ބަލަހައްޓާ މަރުކަޒެއް ޤާއިމުކުރުމަށް ނިންމާފައިވާ ކަމަށް ވެސް ވިދާޅުވިއެވެ.

މީހުން ބިނާކުރުމުގެ ރޮނގުން ހޯދިފައިވާ ކާމިޔާބީތަކަށް އިޝާރާތްކުރައްވައި ވަޒީރު ވިދާޅުވީ އެމްއެޗްޖީއޭޕީ ޕްރޮގްރާމުން 193 މީހުން އަދި ސައިކޮލޮޖިކަލް ފަސްޓްއެއިޑް (ޕީއެފްއޭ) ޕްރޮގްރާމުން 164 މީހުން ތަމްރީނުކޮށްފައިވާ ކަމަށެވެ. މެންޓަލް ހެލްތު ލިޓްރަސީ ޕްރޮގްރާމް މެދުވެރިކޮށް 512 މީހަކު ހޭލުންތެރިކުރެވިފައިވާ ކަމަށް ވެސް ވިދާޅުވިއެވެ.

މި ތަފާސްހިސާބުތަކުން ދައްކާ ގޮތުގައި ނަފްސާނީ ޞިއްޙަތާ ގުޅޭ ޚިދުމަތްތައް ހޯދާ ފަރާތްތަކުގެ ޢަދަދު 2024 ވަނަ އަހަރާ އަޅައިބަލާއިރު ފާހަގަކޮށްލެވޭ މިންވަރަކަށް އިތުރުވެފައިވެއެވެ.