ނެށުމަށް ދެކޮޅު ހެދި ޓީޗަރުން ސަސްޕެންޑްކުރުން: އެޑިއުކޭޝަނުން ސްކޫލް ނިންމުން ދިފާއުކޮށްފި

އއ. އުކުޅަހު ސުކޫލު ޓީޗަރުން ސަސްޕެންޑު ކުރީ ސުކޫލުގެ އެންގުމާއި (ޓީޗަރުން ކޮނެސްޓްގައި ނެށުމަށް) ދެކޮޅު ހެދުމުންކަމަށް އެޑިޔުކޭޝަން މިނިސްޓްރީން ބުނެފިއެވެ.

އުކުޅަހު ސުކޫލުގެ ޕްރީ ސުކޫލުގެ ދަރިވަރުންނަށް ބޭއްވުމަށް ހަމަޖެހިފައިވާ ކޮންސާޓެއްގައި މިއުޒިކާއި އެކު ދަރިވަރުން ނެށުވުމަށް އިންކާރު ކުރި ތިން ޓީޗަރުން ސަސްޕެންޑް ކުރުމާއި ގުޅިގެން ގިނަ ބައެއްގެ ނުރުހުން އެ ސުކޫލު ޕްރިންސިޕަލަށާއި މިނިސްޓްރީ އަށް އަމާޒު ވަމުންދަނިކޮށް އެ ޓީޗަރުން ސަސްޕެންޑްކުރި ސަބަބު ހާމަކޮށް މިނިސްޓްރީން މިއަދު ބުނީ، މުދައްރިސެއްގެ ވަޒީފާގެ މައިގަނޑު މަސްޢޫލިއްޔަތަކީ އަދި ޒިންމާއަކީ ޤައުމީ މަންޙަޖާ އެއްގޮތަށް ޙަވާލުކުރެވޭ ކީސްޓޭޖެއްގެ/ގްރޭޑެއްގެ ދަރިވަރުންނަށް ޤައުމީ މަންހަޖުގައި ބަޔާންކުރާ ލަނޑުދަނޑިތައް ހާޞިލްވާނެހެން ކުރަންޖެހޭ އެންމެހާ ކަންކަން ކުރުންކަމަށެވެ.

އަދި އެކަންކަން ހާޞިލްކުރުމަށް ދަރިވަރުންނަށް ރާވައި ހިންގޭ ހަރަކާތްތަކުގެ ތެރެއިން ބައެއްކަންކަމަށް ފާޅުގައި ދެކޮޅުހަދައި އެކަންކަން ކުރުމަށް އިންކާރުކޮށް، އެކަމުގައި ސްކޫލުން އަންގާ އެންގުންތަކަށް ނުކިޔަމަންތެރިވެފައިވާތީ، އެ މައްސަލައިގެ އިދާރީ ތަޙުޤީޤު ހިންގުމަށްޓަކައި، 17 ނޮވެންބަރު 2022 އިން ފެށިގެން 7 ދުވަހުގެ މުއްދަތަށް، އުކުޅަހު ސުކޫލުގެ 3 މުދައްރިސަކަށް އޮފީހަށް ނިކުތުން މަނާކުރެވިފައިވާ ކަމަށް މިނިސްޓްރީން ބުނެއެވެ.

އެޑިޔުކޭޝަން މިނިސްޓްރީން އެފަދައިން ބުނެފައިވާއިރު، ފައުންޑޭޝަން ސްޓޭޖް ދަރިވަރުންނަށް ކުރިއަށް ގެންދިއުމަށް ހަމަޖެހިފައިވާ ކޮންސާރޓް ގައި ދަރިވަރުންނަށް ޑާންސް ޕްރެކްޓިކްސް ކުރިއަށް ގެންދިއުމަށް އެ ޓީޗަރުން ދެކޮޅު ހަދާފައިވަނީ، އެއީ ކީރިތި ޤުރުއާނާއި، ރަސޫލާ ޞޢވ ގެ ހަދީޘްއާއި، ތަފްސީރީ އިލްމުވެރިންގެ ބަސްފުޅުތަކާއި، ސަހާބީންނާއި ތާބީންގެ ފަތުވާތަކާއި، 4 މަޒްހަބުގެ އިމާމުންނާއި، އެ މަޒްހަބުތަކުގެ އިލްމުވެރިންނާއި، ސައުދީ އަރަބިއާގެ ފަތުވާ ކޮމިޓީއާއި، ސައުދީ އަރަބިއާގެ ކުރިއާއި މިހާރުގެ މުފްތީއާއި، އަދި ދިވެހި ރާއްޖޭގެ އެތައް ސަތޭކަ އިލްމުވެރިންނެއް މިއުޒިކްއަކީ ހުއްދަ އެއްޗެއް ނޫންކަމުގައި ބުނެފައިވާތީ އާއި އަދި އިސްލާމްދީނުގައި މިއުޒިކާއި ނެށުމަކީ ޙަރާމް ކަމެއްކަމަށް އެތައް ޢިލްމްވެރިންނެއްވަނީ އިއްތިފާގުވެފައި ވާތީ ކަމަށް އެ ޓީޗަރުން ބުނެއެވެ.

ކަން މިހެން ހުރި އިރު، މިއުޒިކާއި އެކު ދަރިވަރުން ނަށަން އެއްބަސްވެ އެކުދިން ލައްވައި އެފަދައިން ކަން ކުރާނަމަ، އެ ޓީޗަރުންނަށް ކަން ކުރެވޭނީ ނެޝަނަލް ކަރިކިއުލަމް ފްރޭމް ވޯކް ގެ ޤާބިލިއްޔަތުގެ ތެރެއިން ފުރަތަމަ ޤާބިލިއްޔަތުގައި ބުނާ "އިސްލާމްދީނާ އެއްގޮތަށް ޢަމަލު ކުރުން" މި ޤާބިލިއްޔަތާ ދެކޮޅަށެވެ.

އަދި މީގެ އިތުރުން ފައުންޑޭޝަން ސްޓޭޖުގެ ސިލަބަސްގެ ދަށުން އަންނަ މާއްދާތަކުގެ ތެރެއިން އުފެއްދުންތެރި ފަންނު ގައި ބަޔާންކުރާ ސްޓްރޭންޑް 2 (މިއުޒިކް) ގެ ދަށުން އަންނަ 1 ވަނަ ސަބް ސްޓްރޭންޑްގެ ދަށުން 3 ވަނަ އިންޑިކޭޓަރގައި ބަޔާންކޮށްފައިވާ ގޮތުގައި މިއުޒިކް އަކީ ކުލާހުގައި ހުންނަ ތަކެއްޗާއި ހަށިގަނޑުގެ ގުނަވަނެއް ނުވަތަ ގުނަވަންތަކެއް ބޭނުންކޮށްގެން ރާގެއް އުފެއްދުމެވެ.

އަދި ހަމަ އެހެންމެ، ނޭޝަނަލް ކަރިކިއުލަމްގެ ގާނޫނުގައި މިއުޒިކްއަކީ މަޖުބޫރު އެއްޗެއް ނޫނެވެ. އެއަކީ އިޚްރިޔާރު ދީފައިވާ ކަމެކެވެ. އަދު ރާއްޖޭގެ އިސްލާމް މާއްދާގެ މުގައްރަރާއި އިސްލާމް ދީނުގައި މިއުޒިކްއަކީ ހުއްދަ އެއްޗެއް ނޫންކަމަށް ބުނެފައިވެއެވެ. އަދި މިއުޒިކް އައިޓަމްތަކުގައި ބައިވެރިވުން ހުއްދަނޫންކަމަށްވެސް ބުނެފައިވެއެވެ.

ކަން މިހެން ހުރުމުން، މިއުޒިކާއި އެކު ދަރިވަރުން ނަށަން ދެކޮޅު ހަދާ ޓީޗަރުންނަކީ ގައުމީ މަންހަޖާއި ޚިލާފްވެ އެކަމަށް ދެކޮޅު ހަދާ ޓީޗަރުންކަން މިނިސްޓްރީން އެ ބުނާ ބުނުމަކީ އެއްގޮތަކަށްވެސް ދެކޮޅުޖެހޭ ކަމެއް ނޫންކަން ފާހަގަކޮށްލަންޖެހެއެވެ.