ބޭރުގެ އެއްވެސް ދައުލަތެއްގެ ސިފައިން ގާއިމުވެ ނުތިބޭ ބިމަކަށް މި ދިވެހި ބިން ހަމަޖެހިގެންދާނެ: ރައީސް
އިރާދަކުރެއްވިއްޔާ ބޭރުގެ އެއްވެސް ދައުލަތެއްގެ ސިފައިން ގާއިމުވެ ނުތިބޭ ބިމަކަށް ދިވެހި ބިން ހަމަޖެހިގެންދާނެކަމަށް ރައީސުލް ޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ރޭ އޮތް ހުރަވީ ޖަލްސާގައި ވާހަކަފުޅު ދައްކަވަމުންނެވެ.
ރައީސް ޑރ.މުއިއްޒު ވިދާޅުވީ އިންޑިޔާ ސިފައިން ރާއްޖޭން އަނބުރާ ގެންދިޔުމުގެ މަޝްވަރާތައް މަތީފެންވަރުގައި ދެ ދައުލަތުގެ ދެމެދުގައި ކުރިޔަށްދާ ކަމަށެވެ.
"އިންޑިޔާ ސިފައިން ރާއްޖޭން އަނބުރާ ގެންދިޔުމަށް ވެރިކަމުގެ ފުރަތަމަ ދުވަހު ދިވެހި ސަރުކާރުން އެ ދައުލަތަށް އެންގިން. އަދި އެކަމާ ބެހޭ އިންތިޒާމުތަކާ ބެހޭ ގޮތުން މަތީފެންވަރުގައި ދެ ދައުލަތުގެ ދެމެދުގައި މަޝްވަރާތައް ކުރިޔަށް އެބަދޭ. އިންޑިޔާ ސަރުކާރުން އަޅުގަނޑުމެންނަށް ދެއްވާފައިވާ ޔަޤީންކަމަކީ އިންޑިޔާ ސިފައިން އަނބުރާ ރާއްޖެއިން ގެންދާނެކަން. "
ރައީސް ޑރ.މުއިއްޒު ވިދާޅުވިއެވެ.
އިންޑިއާ ސިފައިން ރާއްޖެއިން ބޭލުމާއި އިންޑިޔާއާއި އެކު ވެފައިވާ އެއްބަސްވުން ތަކުގައި ހިމެނޭ ގައުމީ ސަލާމަތަށް ނުރައްކާވާ މާއްދާތައް އުވާލުމަކީ ރައީސް ޑރ.މުއިއްޒުގެ ހަފްތާ 14 ގައި ވަރަށް ބޮޑު އިސްކަމެއް ދީގެން ހިމަނުއްވާފައި ވާކަމެކެވެ.
މިގޮތުން ދާދި ފަހުން އިންޑިއާ ސަރުކާރުގެ އެހީގައި ރާއްޖޭގެ ކަނޑުގެ ސަރަހައްދުގައި ކުރިއަށްގެންދާ ހައިޑްރޯގްރަފީ ސަރވޭ އެއްބަސްވުން ނިންމުމަކަށް ގެނައުމަށް ސަރުކާރުން ނިންމަވާފައިވާކަން ފާހަގަކޮށްލަން ޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
