"މިހާރު މަޖިލީހުން ކުރަމުންދާ ކަންކަމަށް ވިސްނާލި ނަމަވެސް އަންނަ މަޖިލީހުގެ މެޖޯރިޓީ ސަރުކާރަށް ލިބެން ޖެހޭ"

އެމްޑީޕީ މެޖޯރިޓީ އޮތް ރައްޔިތުންގެ މަޖިލީހުން މިހާރު ކުރަމުންދާ ކަންކަމުން އެކަނިވެސް ކުރިއަށް އޮތް މަޖިލީހުގެ މެޖޯރިޓީ ސަރުކާރަށް ލިބެންޖެހޭ ކަން އެނގޭ ކަމަށް ޕީޕީއެމް/ޕީއެންސީގެ ޓިކެޓްގައި މާލެ ސިޓީ ކައުންސިލްގެ މޭޔަރު ކަމަށް ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު ވިދާޅުވެއްޖެއެވެ.

ރޭ ހުޅުމާލޭގައި ހުންނަ ބްރައިޓްވޭ ސްކޫލުގައި ބޭއްވުނު ކެންޕެއިން ޖަލްސާއެއްގައި ވާހަކަ ދައްކަވަމުން ޢާޒިމާ ވިދާޅުވީ، އަދުގެ ސަރުކާރަކީ ބުރަ މަސައްކަތް ގެނެވުނު ވެރިކަމެއް ކަމަށާ، އެހެންކަމުން އެ ވެރިކަން ދެމެހެއްޓުމަކީ ވަރަށް މުހިންމު ކަމެއް ކަމަށެވެ. އަދި އެ މަސައްކަތަކީ ފަސޭހަ ކަމެއް ނޫން ކަމަށާ، އެއީ ވަރަށް ބުރަ މަސައްކަތެއް ކަމަށް އޭނާ ވިދާޅުވި އެވެ.

މިއާއެކު ޢާޒިމާ ވިދާޅުވީ، ވެރިކަން ދެމެހެއްޓުމަށްޓަކައި އެންމެ މުހިންމު އެއް ކަމަކީ ރައްޔިތުންގެ މަޖިލީހުގެ މެޖޯރިޓީ ސަރުކާރަށް ލިބުން ކަމަށެވެ. އަދި މިހާރު އިދިކޮޅު އެމްޑީޕީ މެޖޯރިޓީ އޮތް 19 ވަނަ މަޖިލީހުން ކުރަމުން އަންނަ ކަންކަމުން އެކަނިވެސް މަޖިލީހުގެ މެޖޯރިޓީ ސަރުކާރަށް ލިބެންޖެހޭ ކަން އެނގިގެދާ ކަން ޢާޒިމާ ފާހަގަކުރެއްވި އެވެ.

ބުރަމަސައްކަތުން ގެނައި ސަރުކާރު ދެމެހެއްޓުމުގެ އެންމެ ބޮޑު ޒިންމާ އެޅޭ އެއްބަޔަކީ ރައްޔިތުންގެ މަޖިލީސް. މިހާރު މަޖިލީހުން ކުރަމުން އެގެންދާ ކަންކަމަށް އެކަނި ވިސްނާލި ނަމަވެސް އަންނަ މަޖިލީހުގެ މެޖޯރިޓީ ސަރުކާރަށް ލިބެން ޖެހޭ.

ޢާއިޝަތު ޢާޒިމާ ޝަކޫރު

މިއާއެކު ޢާޒިމާ ވަނީ، މިދިޔަ ބުރާސްފަތި ދުވަހު މަޖިލީހުގެ ޢާއްމު ކޮމިޓީން، ރައީސުލްޖުމުހޫރިއްޔާ އަޒުލު ކުރުން ހަމައެކަނި އެމްޑީޕީ މެންބަރުންނަށްވެސް ކުރެވޭ ގޮތަށް ނިންމި ނިންމުމަށް ފާޑުވިދާޅުވެފައެވެ.

އެގޮތުން ވިދާޅުވީ، ރައީސުލްޖުމްހޫރިއްޔާ އަޒުލުކުރުމަށް މިޖިލީހުގެ ތެރެއިން މިހާރު ކުރަމުންގެދާ މަސައްކަތަކީ ކަނޑައެޅިގެން ގާނޫނު އަސާސީ އާ ޚިލާފަށް ކުރަމުންގެންދާ ކަމެއް ކަމަށެވެ. އަދި އެކަން ކުރަމުން އެގެންދަނީ ދިވެހިރާއްޖޭގެ ރައްޔިތުންގެ ހިތުގައި ބިރުވެރިކަން އުފައްދައި ސިޔާސީ މަސްރަހު ހޫނުކުރުމަށްޓަކައި ކަމަށްވެސް ޢާޒިމާ ވިދާޅުވި އެވެ.

"ގައުމު ބަނގުރޫޓު ވަމުން ދިޔައިރުވެސް އަނގައި ނުބުނެ ތިބެފައި އަލަށް ހޮވުނު ރައީސުލްޖުމްހޫރިއްޔާ ހުވާ ކުރެއްވިތާ އެއްމަސް ނުވަނީސް އަޒުލު ކުރުމުގެ މަސައްކަތަކީ ދުސްތޫރީ ނިޒާމް ދަންނަ ވެސް ކަމެއް ނޫން."

ޢާއިޝަތު ޢާޒިމާ ޝަކޫރު

ޢާޒިމާ އިތުރަށް ވިދާޅުވީ ސިޓީކައުންސިލްގެ މޭޔަރު ކަމާއި މަޖިލީހުގެ މެޖޯރިޓީ އަކީ މި ސަރުކާރުން ރައްޔިތުންނަށް ވެފައިވާ ވައުދުތައް ފުއްދުމަށްޓަކައި ވަރަށް މުހިންމު ކަމެއް ކަމަށެވެ.