އަމީނީ މަގުގެ މަސައްކަތާއި ގުޅިގެން ބަންދު ކުރި ޢިއްޒުއްދީން މަގު ޢާންމުނަށް ހުޅުވައިލައިފި

އަމީނީމަގުގެ މަސައްކަތާއި ގުޅިގެން ބަންދުކުރި ޢިއްޒުއްދީން މަގު ޢާންމުނަށް ހުޅުވައިލައިފިއެވެ.

އަމީނީމަގުގެ މަސައްކަތް ކުރަމުންދާ ރޯޑް ޑިވަލޮޕްމެންޓް ކޮމްޕެނީ އިން ބުނެފައިވަނީ އަމީނީމަގާއި ޢިއްޒުއްދީންމަގު ގުޅޭ ކަންމަތީގައި ކޮނެގެން ކުރަންޖެހޭ މަސައްކަތްތައް ނިމުމުން، އެމަގު މިހާރުވަނީ އާންމުންނަށް ހުޅުވާލެވިފައިކަމަށެވެ.

އެމަގު ހުޅުވާލި ނަމަވެސް އަމީނީމަގުގައި މިއަދުވެސް ސްޓޯރމް ވޯޓަރ މައި ހޮޅި އެޅުމާއި ސްޓޯރމް ވޯޓަރ އައުޓްފޯލް ހޮޅިއެޅުމުގެ އިތުރުން ނަރުދަމާގެ އޯވަރ ފްލޯގެ މަސައްކަތް އަދި ގޭބިސީތަކަށް ގުޅާލާ ފެންހޮޅިތަކުގެ ޕްރެޝަރ ޓެސްޓް ކުރުމާއި ކާރބް ސްޓޯން ޖެހުމުގެ މަސައްކަތް ކުރިއަށްދާނެކަމަށް ވެސް އާރްޑީސީ އިން ބުނެފައިވެއެވެ.

އަމީނީމަގު ޒަމާނީ ފެންވަރަށް ތަރައްޤީކުރުމުގެ މަސައްކަތުގެ ނުނިމިހުރި މަސައްކަތުގެ ތެރެއިން ފަހު ސެގްމަންޓުގެ މަސައްކަތްތައް ފަށައިފައިވަނީ މިމަހުގެ 9ވަނަ ދުވަހުއެވެ.

އެ މަސައްކަތް އާރުޑީސީއާއި ހަވާލުކޮށްފައިވަނީ ސިޓީ ކައުންސިލުން އެ މަސައްކަތް ކުރަން ނިންމި އަގަށްވުރެ ތިން ގުނަ އަގުބޮޑުކޮށް 84 މިލިއަން ރުފިޔާއަށެވެ. އަދި އެއީ 10 މަސްތެރޭ ނިންމުމަށް ކޮންޓްރެކްޓު ކުރެވުނު މަޝްރޫއެވެ.

1.7 ކިލޯމިޓަރު ތާރުއަޅައިގެން ޒަމާނީ ފެންވަރަށް ތަރައްޤީކުރުމަށް އާރުޑީސީއާއި އަމީނީމަގުގެ މަސައްކަތް ހަވާލުކުރެވުނު ނަމަވެސް، މުއްދަތަށް އެ މަސައްކަތް ނިންމާލެވިފައެއް ނުވެއެވެ.

މިދިޔަ ސަރުކާރުގައި އަމީނީމަގުގެ މަސައްކަތް ފެށި ނަމަވެސް ސަރުކާރުގެ ނިމުމާއި ހަމައަށް އައިރުވެސް އެމަސައްކަތް ނިމިފައެއް ނުވެއެވެ.

އާރުޑީސީން އަމީނީ މަގުގެ ނުނިމި އޮތް ދެ ސެގްމަންޓު 12 އަދި 13 ނިންމުމުގެ މަސައްކަތް ފަށައިފައިވާއިރު ސަރުކާރުން ބުނެފައިވަނީ

ވީހާވެސް އަވަހަށް އެ މަސައްކަތް ނިންމާ ލައި ޢާންމުނަށް ހުޅުވައިލާނެ ކަމަށެވެ.