ނުކުޅެދުންތެރިކަން ހުންނަ މީހުންނަށް ފަސޭހަވާނެ ގޮތަށް އޮފީސްތައް ބިނާކޮށް، ވަޒީފާގެ ފުރުސަތު ހުޅުވާލަން ނިންމައިފި!
ނުކުޅެދުންތެރިކަން ހުންނަ މީހުންނަށް ވަޒީފާ ދިނުމަށް ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވެވަޑައިގެންފައިވާ ވަޢުދާއި އެއްގޮތަށް އެފަރާތްތަކަށް ވަޒީފާގެ ފުރުސަތު ތައް ހުޅުވާލުމަށް ސަރުކާރުން ނިންމައިފިއެވެ.
ރައީސުލްޖުމްހޫރިއްޔާގެ ކެބިނެޓުން މިއަދު ނިންމެވި ނިންމުންތަކާއި ގުޅޭ ގޮތުން ނޫސްވެރިންނަށް މަޢުލޫމާތުދެއްވަމުން ރައީސް އޮފީހުގެ ޗީފް ސްޕޯކްސްޕާސަން މުހައްމަދު ޝަހީބު ވިދާޅުވީ، އެ ބައްދަލުވުމުގައި ނުކުޅެދުންތެރިކަން ހުންނަ މީހުންނަށް ވަޒީފާގެ ފުރުޞަތު ފަހިކޮށްދެއްވުމުގެ ސިޔާސަތު ކަނޑައަޅުއްވާފައިވާ ތާވަލާ އެއްގޮތަށް ތަންފީޒުކުރައްވަން ފަށްޓަވަން ނިންމަވާފައިވާ ކަމަށެވެ.
އަދި، އެކަމާއި ގުޅޭ މަސައްކަތްތައް، ސަރުކާރުގެ އޮފީސްތަކާއި ވުޒާރާ ތަކުން ކުރިއަށް އޮތް ތަނުގައި ކުރިއަށް ގެންދަވާނެ ކަމަށް ވެސް ޝަހީބު ވިދާޅުވި އެވެ.
އަދި އެ މަސައްކަތަކީ ވަރަށް ފުޅާދާއިރާއެއްގައި ކުރެވޭނެ މަސައްކަތެއް ކަމަށް ވުމާއިއެކު، ކަމާއި ގުޅޭ އެހެނިހެން މިނިސްޓްރީތަކުގެ މަޝްވަރާއާއި ލަފާގެ މަތިން މި ސިޔާސަތަށް އިތުރު ކުރައްވަން ޖެހޭ ބައިތައް މިއަދު ކެބިނެޓް ބައްދަލުވުމުގައި އިތުރު ކުރައްވާފައިވާ ކަން ވެސް ޝަހީބް ފާހަގަކުރެއްވި އެވެ.
އެގޮތުން، އެފަދަ ފަރާތްތަކަށް ފަހިވާނެ ގޮތަށް، ޕްލޭނިންގ އަދި ކޮންސްޓަރަކްޝަންއާ ގުޅޭ ގަވާއިދަށް ގެންނަންޖެހޭ ބައެއް ބަދަލުތައް ވޭހާވެސް އަވަހަށް ގެނައުމަށް ނިންމާފައިވާ ކަމަށް އޭނާ ވިދާޅުވި އެވެ.
މިދެންނެވީ ބައެއް އޮފީސް ތަކުގައި އެބަހުރި، އަރާފޭބުމާއި، މިކަހަލަ ކަންތައްތައް. ފޮރޮޅުލީ ގޮނޑިތަކަށް ފަސޭހަކަމާއިއެކު ނުވަދެވޭ ގޮތަށް އެބަހުރި. އެހެންވީމާ އަވަސް މުސްތަގުބަލެއްގައި މިކަންތައް ތަކަށްވެސް، އިތުރު ފަސޭހަކަމެއް ގެނައުމަށް މިވަނީ ނިންމާފައި. އަދި އެ ގަވާއިދު ތަކާއި އެއްގޮތަށް މިހާރު ހުރި އިމާރާތްތަކަށް ގެނެވޭނެ ބަދަލުތައް ބަލައި، ގެންނަންޖެހޭ ބަދަލު ތައް ގެނައުމާއެކު، ކުރިއަށް އޮތް ތަނުގައި އިމާރާތްކުރާ ތަންތަނުގައި، އެގަވާއިދުތަކާއި އެއްގޮތަށް އިމާރާތް ކުރަންވެސް މިއަދު މިވަނީ ނިންމާފައި.
ރައީސް އޮފީހުގެ ޗީފް ސްޕޯކްސްޕާސަން މުހައްމަދު ޝަހީބު
ރިޔާސީ އިންތިހާބުގެ ކެމްޕެއިންގެ ތެރެއިން، އދ މަހިބަދޫ އަށާއި، ބ.ކަމަދޫ އަށް ރައީސް ޑރ. މުހައްމަދު މުޢިއްޒު ކުރެއްވި ދަތުރުފުޅުގެ ތެރެއިން އެމަނިކުފާނު ވަނީ، އެމަނިކުފާނު އެކުލަވާލައްވާ ސަރުކާރުގައި ނުކުޅެދުންތެރިކަން ހުންނަ ފަރާތްތަކަށް ވަޒީފާ އަދާކުރުމަށް ފުރުސަތު ހުޅުވާލާނެ ކަމަށް ވަޢުދުވެވަޑައިގެންފައެވެ.
އެ ފަރާތްތަކަށް އެންމެ ފުޅާ ދާއިރާއެއްގައި ވަޒީފާ ދެވެން ފެށުނީ ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައެވެ. އެމަނިކުފާނުގެ ވެރިކަމުގައި ސަރުކާރުގެ ކުންފުނިތަކުން އެފަދަ މީހުންނަށް ވަޒީފާދެއްވާފައި ވެއެވެ.
ނަމަވެސް، ރައީސުލްޖުމުހޫރިއްޔާ އިބްރާޙީމް މުހައްމަދު ޞާލިހުގެ ސަރުކާރު އައުމާއިއެކު އެކަން ވަނީ މަޑުޖެހިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
