ކުރިއަށް އޮތް 6 މަސްތެރޭ ދެ ބޯޓު ގެނެސް އައު މަންޒިލުތަކަށް ދަތުރުތައް ފެށޭނެ: އަމީނު

ކުރިއަށް އޮތް 6 މަސް ދުވަސްތެރޭ ޤައުމީ އެއާލައިން މޯލްޑިވިއަނަށް ވައިޑް ބޮޑީ ދެ އެއާކްރާފްޓް ގެނެސް، އައު މަންޒިލްތަކަށް ރާއްޖެއިން ދަތުރުތައް ފެށިގެންދާނެ ކަމަށް ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވެއްޖެ އެވެ.

އަމީނު މިފަދައިން ވިދާޅުވެފައިވަނީ ޤައުމީ އެއާލައިނުން ވައިޑް ބޮޑީ އެއާކްރާފްޓުގެ އޮޕަރޭޝަންތައް ފެށުމަށް ދެ ބޯޓެއް ގެނައުމަށް ބޭނުންވާ ފައިސާ ފިނޭންސް މިނިސްޓްރީން އެ ކުންފުންޏަށް ހަމަޖައްސައިދިނުމަށް ވަޒީރުންގެ މަޖިލީހުގެ މިއަދުގެ ބައްދަލުވުމުުގައި އެ މަޖިލީހުގެ ލަފާގެ މަތިން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ނިންމަވާފައިވަނިކޮށެވެ.

އެގޮތުން މިނިސްޓަރު އަމީން ވިދާޅުވީ، ކެބިނެޓުގެ އެ ނިންމެވުމާއެކު، ބޯޓުތައް ގެނައުމުގެ މަސައްކަތް ވަރަށް ބާރު ސްޕީޑުގައި ކުރައްވަމުން ގެންދަވާނެ ކަމަށެވެ.

ކުރިއަށް އޮތް 6 މަސް ދުވަހުގެތެރޭ އެ ބޯޓުތައް ގެނެސް އެންމެ ފުރަތަމަ ފަށާ ދަތުރުތައް ޗައިނާގެ ތިން މަންޒަލަކަށް ކުރުމަށް މަސައްކަތް ފަށާފައިވާކަން ވެސް މިނިސްޓަރު އަމީނު ފާހަގަކުރެއްވި އެވެ.

އޭގެ އިތުރުން ޔޫރަޕުގެ ދަތުރުތައް ކުރާނީ ކޮން ސިޓީތަކަކަށްތޯ ކަނޑައެޅުމުގެ މަސައްކަތް ވެސް މިހާރު ޓްރާންސްޕޯޓު މިނިސްޓްރީން ކުރަމުން ގެންދާކަމަށް މިނިސްޓަރު އަމީނު ވިދާޅުވި އެވެ.

ކެބިނެޓުގެ ނިންމުމާއި ގުޅޭ ތަފްސީލުތައް ދިނުމަށް ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ސީފް ސްޕޯކްސް ޕާސަން މުހައްމަދު ޝަހީބު ވިދާޅުވީ ދިވެހިރާއްޖޭގެ ފަތުރުވެރިކަން ފުޅާކުރުމަށްޓަކައި ފަތުރުވެރިން ރާއްޖެއަށް ޒިޔާރަތްކުރާ މަންޒިލުތަކަށް ސީދާ ދަތުރުތައް ކުރުމަށް ނިންމާފައިވާ ކަމަށެވެ.

"ވައިޑް-ބޮޑީ އެއާކްރާފްޓުތަކުން މި އޮޕަރޭޝަންތައް ފެށުމަށް އިންވެސްޓް ކުރަން ޖެހޭ ފައިސާގެ އަދަދު ފިނޭންސަށް ލިބިފައިވާ ފައިނޭންސިން ފެސިލިޓީތަކުގެ ތެރެއިން އައިލޭންޑް އޭވިއޭޝަނަށް ލިބޭނެ އިންތިޒާމް ވަނީ ހަމަޖައްސަން ނިންމައިފައި"

ރައީސް އޮފީހުގެ ތަރުޖަމާނު ޝަހީބު

ވައިޑް-ބޮޑީ އެއާކްރާފްޓުގައި އެއްފަހަރާ 275 ފަސިންޖަރުންނާއެކު ދުރު ރާސްތާއަށް ދަތުރުކުރެވޭނެ އެވެ. މި ދަތުރުތައް ފެށުމާއެކު ފަތުރުވެރިކަމުގެ ސިނާއަތަށް ހެޔޮ ބަދަލުތަކެއް އަންނާނެ ކަމަށް ލަފާކުރެވޭއިރު، މަންޒިލްތަކަށް ކުރާ ދަތުރުތަކާ ބެހޭ އިންތިޒާމްތައް ފޮރިން މިނިސްޓްރީ މެދުވެރިކޮށް ހަމަޖެއްސުމަށް ވެސް ބުރާސްފަތު ދުވަހު ބޭއްވި ކެބިނެޓު ބައްދަލުވުމުގައި ވަނީ ނިންމަވާފަ އެވެ.