ވަޒީރުންނަށް ރުހުންދޭން މާދަމާ ބާއްވާ މަޖިލީހުގެ ޖަލްސާއަށް އެޖެންޑާކޮށްފި

ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ކެބިނެޓަށް އައްޔަން ކުރައްވާފައިވާ 22 ވަޒީރުންނަށް ރުހުން ދޭ މައްސަލަ މާދަމާ ބާއްވާ ރައްޔިތުންގެ މަޖިލީހުގެ ޖަލްސާއަށް އެޖެންޑާކޮށްފި އެވެ.

މިދިޔަ މަހުގެ 17 ގައި މަގާމުގެ ހުވާކުރެއްވި އައު ރައީސް ޑރ. މުހައްމަދު މުއިއްޒުގެ ކެބިނެޓަށް ރުހުން ހޯދުމަށް ރައްޔިތުންގެ މަޖިލީހަށް ފޮނުވީ ނޮވެމްބަރު މަހުގެ 20 ވަނަ ދުވަހުގައެވެ.

ރައްޔިތުންގެ މަޖިލީހުގެ ދައުރު މި މަހުގެ 18 އަށް އިތުރުކޮށްފައިވާއިރު، ރުހުން ދިނުމުގެ މައްސަލަ އެޖެންޑާނުކޮށް ފަސްކޮށްފައި ބޭއްވުމަށްފަހު އެޖެންޑާކޮށްފައި މިވަނީ މި ދައުރުގެ އެންމެ ފަހު ދުވަހަށެވެ.

ރުހުން ދިނުމުގެ މައްސަލަ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީން ދިރާސާކުރުމަށް ފަހު ނިންމާފައިވަނީ ރައީސް ޑރ މުއިއްޒުގެ ކެބިނެޓުގައި ހިމެނިވަޑައިގަންނަވާ ހުރިހާ ބޭފުޅުންގެ ވެސް ވަޒީރުކަމުގެ ޝަރުތު ހަމަވާކަމަށެވެ.

އެ ކޮމެޓީން ނިންމާފައިވަނީ ވަޒީރުންނަށް ރުހުން ދޭއިރު ކޮންމެ ވަޒީރަކަށް ވެސް ރުހުން އޮތް ތޯ ބެލުމަށް ވަކިވަކިން ވޯޓަށް އެހުމަށެވެ. އެހެން ކަމުން މާދަމާގެ ޖަލްސާގައި ވަޒީރުންނަށް ރުހުން ދިނުމުގެ ވޯޓު ނަގާނީ ވަކިވަކިންނެވެ.

މާދަމާގެ އެޖެންޑާގައި ވަޒީރުންނަށް ރުހުން ދިނުމުގެ އިތުރުން ރައިސުލްޖުމްހޫރިއްޔާ އާއި އެ މަނިކުފާނުގެ ނައިބު ވަކިކުރެވޭ ގޮތަށް އެމްޑީޕީ އާއި ޑިމޮކްރެޓްސް އިން މަޖިލީހުގެ ގަވާއިދަށް ހުށަހަޅާފައިވާ އިސްލާހުތަކާ ގުޅޭ މައްސަލަ ވެސް ވަނީ އެޖެންޑާ ކޮށްފައެވެ.

އައު ސަރުކާރުގެ ކުރީކޮޅުގައި މިފަދަ މައްސަލައެއް މިވަގުތު އިދިކޮޅު ޕާޓީގެ މެޖޯރިޓީ އޮންނަ ރައްޔިތުންގެ މަޖިލީހަށް ހުށަހެޅުމާއި ގުޅިގެން ގިނަ ބައެއްގެ ފާޑުކިޔުން އަމާޒުވެފައިވެއެވެ.

އެގޮތުން އެ އިސްލާހަކީ ރައްޔިތުންގެ ނިންމުމާއި ދެކޮޅު، ޑިމޮކްރަސީގެ އުސޫލުތަކާއި ޚިލާފު އިސްލާހެއްގެ ގޮތުގައި ސަރުކާރަށް ތާއީދުކުރައްވާ ސިޔާސީ ބޭފުޅުން ގެންދަވަނީ ވިދާޅުވަމުންނެވެ.