ފަޤީރުންނަށް ދޭ މާލީ އެހީގެ ގޮތުގައި މިދިޔަ މަހު 15 މިލިއަނަށްވުރެ ގިނަ ރުފިޔާ

މި އަހަރުގެ ޖަނަވަރީ މަހު ފަޤީރުންނަށް ދޭ މާލީ އެހީގެ ގޮތުގައި ޖުމުލަ 15,363,340 ރުފިޔާ ހޭދަކޮށްފައިވާކަމަށް ނެޝަނަލް ސޯޝަލް ޕްރޮޓެކްޝަން އޭޖެންސީއިން އާއްމުކުރި ތަފާސްހިސާބުތަކުން ހާމަވެއްޖެއެވެ.

އެ ހިސާބުތަކަށް ބަލާއިރު ފަޤީރު ހާލަތުގައި ދިރިއުޅޭ ފަރާތްތަކުން ކާބޯތަކެތި ގަތުމަށް ދެވޭ މާލީ އެހީގެ ގޮތުގައި 700 ފަރާތަކަށް 25،840 ރުފިޔާ ޚަރަދުކޮށްފައިވެއެވެ.

މިދިޔަ މަހު އެންމެ ބޮޑު އަދަދެއްގެ ފައިސާ ހަރަދުކޮށްފައި ވަނީ ފަޤީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިން ނުވަތަ ބަފައިންނަށް ދެވޭ މާލީ އެހީގެ ގޮތުގައެވެ. އެގޮތުން، އަލަށް ރަޖިސްޓަރ ކުރެވުނު 99 މައިން/ބަފައިން ހިމެނޭނެހެން ޖުމުލަ 2974 ފަރާތަކަށާއި، އަލަށް ރަޖިސްޓަރ ކުރެވުނު 191 ކުޑަކުދިން ހިމެނޭނެހެން، ޖުމުލަ 3066 ކުޑަކުދިންނަށް 15،150،000 ރުފިޔާގެ މާލީ އެހީ ފޯރުކޮށްދީފައިވެއެވެ.

މީގެ އިތުރުން، ފަޤީރު ހާލަތުގައި ދިރިއުޅޭ މައިންބަފައިންގެ އެހީތެރިކަމެއް ނެތި އެހެން މީހަަކު ބަލަހައްޓާ ކުދިންނަށާއި، އެކުދިން ބަލަހައްޓާ ފަރާތަށް ދެވޭ މާލީ އެހީގެ ގޮތުގައިވެސް މިދިޔަ މަހު 101 ބެލެނިވެރިންނާއި، 137 ކުޑަކުދިންނަށް ޖުމުލަ 187،500 ރުފިޔާ ސަރުކާރުން ވަނީ ހޭދަކޮށްފައެވެ.

ކޮންމެ މަހަކުވެސް ދައުލަތުގެ ބަޖެޓުން ބޮޑު ހޭދައެއް އިޖުތިމާޢީ ރައްކާތެރިކަމުގެ އެކި ސްކީމްތަކަށް ކުރެވެއެވެ. މީގެ ތެރޭގައި އެކަނިވެރި މައިންނާއި ބަަފައިންނަށްދޭ އެހީއާއި، ނުކުޅެދުންތެރިކަން ހުންނަ ފަރާތްތަކަށްދޭ އެހީގެ އިތުރުން، ކާބޯތަކެތީގެ ސަބްސިޑީ ފަދަ އެހީތައް ހިމެނެއެވެ. މި އެހީތަކަކީ މުޖުތަމަޢުގައި ތިބި އެހީތެރިކަމަށް ބޭނުންވެފައިވާ ފަރާތްތަކުގެ ދިރިއުޅުމުގެ ފެންވަރު މަތިކުރުމަށާއި، އަސާސީ ބޭނުންތައް ފުއްދުމަށް އެހީތެރިވުމުގެ ގޮތުން ސަރުކާރުން ކުރަމުން އަންނަ މުހިންމު މަސައްކަތެކެވެ.