80 ދުވަހުގެ ބަންދަކަށްފަހު، ޣައްޒާއަށް ވެއްދުމަށް ހުއްދަދިނީ އެންމެ 90 އެހީގެ ޓްރަކަށް

ޣައްޒާގެ ރައްޔިތުން ބަނޑުހައިހޫނުކަމާއި ބޮޑެތި ދަތިތަކާ ކުރިމަތިލަމުންދާއިރު، 80 ދުވަހަށްފަހު އިއްޔެ ރޭ އެ ސަރަޙައްދަށް އެހީގެ 90 ޓްރަކް ވެއްދުމަށް ހުއްދަ ދީފިއެވެ.

މިއީ އޮކްޓޯބަރު 7، 2023 ގެ ކުރިން ދުވާލަކު ވައްދަމުން އައި 500 އިން 600 އަށް ޓްރަކާ އަޅާބަލާއިރު ވަރަށް ކުޑަ އަދަދެކެވެ.

ޔޫ.އެން ގެ އިންސާނީ ކަންކަމާބެހޭ އޭޖެންސީއާއި ސަރަޙައްދުގެ އޮފިޝަލުން މަޢުލޫމާތު ދީފައިވާ ގޮތުގައި، ބުދަ ދުވަހުގެ ރޭގެ ވަގުތެއްގައި ކެރެމް ޝަލޯމް ކްރޮސިންގ މެދުވެރިކޮށް ފުށާއި، ކުޑަކުދިންގެ ކާނާ އަދި ނިއުޓްރިޝަނަލް ސަޕްލިމެންޓްސް އުފުލައިގެން 90 ޓްރަކް ވަނީ ޣައްޒާއަށް ވަދެފައެވެ.

މިއީ ދެ މަސް ދުވަހަށްވުރެ ގިނަ ދުވަހުގެ މުއްދަތަކަށްފަހު އެ ސަރަޙައްދަށް ވެއްދުނު ފުރަތަމަ އެހީގެ ބެޗެވެ.

ޔޫ.އެން ގެ ސްޕޯކްސްޕަރސަން ސްޓެފާން ޑުޖާރިކް ވިދާޅުވި ގޮތުގައި، އިޒްރޭލުން އެންމެ މަގަކުން އެހީ ފޯރުކޮށްދިނުމަށް ހުއްދަދީފައިވުމުން މި އެހީ ފޯރުކޮށްދިނުމަށް ދަތުތަކާ ކުރިމަތިވެއެވެ. އަދި ހުއްދަ ދިން އެ މަގަކީ ވަރަށް ބޮޑަށް ތޮއްޖެހި، ރައްކާތެރިކަން ކުޑަ އަދި ވައްކަންކުރުމުގެ ފުރުސަތު ބޮޑު މަގެއްކަމަށް ޔޫ.އެން އިން ދެކޭކަމަށް އޭނާ ވިދާޅުވިއެވެ.

11 ހަފްތާގެ ބަންދަށްފަހު، ޣައްޒާއަށް ކާބޯތަކެތި ވައްދަން ހުއްދަ ދިނީ، ޣައްޒާގައި ބޮޑު ބަނޑުހައިހޫނުކަމެއް އުފެދިދާނެކަމަށް ކަންބޮޑުވާ އެކުވެރި ޤައުމުތަކުގެ ޝަކުވާތަކާ ގުޅިގެން މަޖުބޫރުވެގެން ކަމަށް އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ ވަނީ ބުނެފައެވެ. ނަމަވެސް ހުއްދަދޭނީ ކުޑަ މިންވަރެއްގެ ކާބޯތަކެތި ޣައްޒާއަށް ވެއްދުމަށް ކަމަށް އޭރު އޭނާ ބުންޏެވެ.

ކަމާބެހޭ އިދާރާތަކުން ބުނާ ގޮތުގައި 2 މިލިއަނަށްވުރެ ގިނަ މީހުން ދިރިއުޅޭ ޣައްޒާގައި ބަނޑުހައިހޫނުކަމުގެ ނުރައްކާ ވަރަށް ބޮޑެވެ.

"ދިރިހުރުމަށްޓަކައި ކޮންމެ އެއްޗެއް ވެސް ކާނަން. ހަފްތާއެއްވަންދެން ރޮށި ކައިފައެއް ނެތް. ކުރިން އަޅުގަނޑުމެން ބަރޯސާވަމުން އައީ އެހީއަށް. އެކަމަކު މިހާރު އެހީއެއް ނެތް. އަޅުގަނޑުމެން ކިހިނެއް ހަދާނީ؟ ކޮންތާކަށް ދާނީ؟ ކާކު ކައިރީ އެހީއަށް އެދޭނީ ؟" މިހެންނެވެ.

އިޒްރޭލުން އެހީ ޖަމްޢިއްޔާތަކަށް އަންގާފައިވަނީ ހޯމަ ދުވަހުން ފެށިގެން ހުކުރު ދުވަހާ ހަމައަށް، ފަސް ދުވަހުގެ މުއްދަތަކަށް ދުވާލަކު 100 ޓްރަކް ދެކުނު ޣައްޒާގައި ހުންނަ ކެރެމް ޝަލޯމް ކްރޮސިންގ މެދުވެރިކޮށް ވެއްދުމަށް ހުއްދަދޭނެ ކަމަށެވެ. ނަމަވެސް އެހީގެ މަސައްކަތްތެރިން ބުނާ ގޮތުގައި މި އާބާދީއަށް ދުވާލަކު މަދުވެގެން 500 ޓްރަކުގެ އެހީ ބޭނުންވެއެވެ.