ޑިސެމްބަރުމަހު ތެރަޕީ ފަރުވާގެ ހަރަދަށް 7.5 މިލިއަން ރުފިޔާ ހޭދަވި: އެންސްޕާ

ހުސްވި ޑިސެމްބަރުމަހު ތެރަޕިއުޓިކް ފަރުވާގެ ހިދުމަތްތަކަށް އެކަނިވެސް 7.5 މިލިއަން ރުފިޔާ ހޭދަވެފައިވާކަމަށް ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ގެ ތަފާސްހިސާބުތަކުން ދައްކައިފިއެވެ.

އެންސްޕާއިން އާއްމުކުރި ތަފާސްހިސާބުތަކަށް ބަލާއިރު، ޑިސެމްބަރުމަހުގެ ތެރޭގައި 521 ކުއްޖަކަށް ވަނީ ތެރަޕީނެގުމަށް މާލީ އެހީތެރިކަން ހަމަޖައްސައިދީފައެވެ. މި އެހީ ހަމަޖައްސައިދީފައިވަނީ، ނުކުޅެދުންތެރިކަން ހުންނަ މީހުންނަށް ތެރަޕިއުޓިކް ފަރުވާ ހަމަޖައްސައި ދިނުމުގެ ޕްރޮގްރާމުގެ ތެރެއިންނެވެ.

އެންސްޕާގެ ތަފާސްހިސާބުތަކަށް ބަލާއިރު، ބޭސްފަރުވާގެ އެހީގެ ޕްރޮގްރާމުގެ ދަށުން ތެރަޕިއުޓިކް ފަރުވާއަށް 54 ފަރާތަކަށް ވަނީ އެހީތެރިކަން ފޯރުކޮށްދީފައެވެ. އެފަރާތްތަކަށް ކުރި ހޭދަ އުޅެނީ 357،500 ރުފިޔާގައެވެ.

އެންސްޕާގެ ހިސާބުތަކަށް ބަލާއިރު އެންމެބޮޑު ހޭދައެއްކޮށްފައިވަނީ ބިހޭވިއަރ ތެރަޕީއަށެވެ. އެއަށްފަހު ދެން އެންމެބޮޑު ހޭދައެއް ކޮށްފައިވަނީ، އޮކިއުޕޭޝަނަލް ތެރަޕީ، ސްޕީޗް ތެރަޕީ އަދި އެޑިއުކޭޝަނަލް ތެރަޕީދިނުމަށެވެ.

ޑިސެމްބަރުމަހު 521 ފަރާތަކަށް ތެރަޕިއުޓިކް ފަރުވާއަށް ހަރަދުތައް ހަމަޖައްސައިދިންއިރު، އޭގެ ތެރެއިން އެންމެ ގިނައީ ފިރިހެން ކުދިންނެވެ. ތެރަޕީ ފަރުވާ އެންމެގިނައިން ނަގަމުންދަނީ، 18 އަހަރުން ދަށުގެ ކުދިންނެވެ.

ރާއްޖޭގައި ތެރަޕިއުޓިކް ފަރުވާ ނަގަމުން އަންނަ ކުދިންގެ އަދަދު މަހަކަށްވުރެ މަހެއް އިތުރުވަމުން އަންނަކަމަށް އެންސްޕާގެ ތަފާސްހިސާބުތަކުން ދައްކައެވެ. ނުކުޅެދުންތެރިކަން ހުންނަ ކުދިންގެ އެކި ހަރަދުތަކަށް ދައުލަތުން ހޭދަކުރާ އަދަދުގެ ބޮޑުބައެއް ހޭދަވާ އެއް ދާއިރާއަކީ ތެރަޕިއުޓިކް ފަރުވާއެވެ.