އިނގުރައިދޫގައި އުޅޭ ބުޅާތައް އެރަށުން ބޭރުކުރަނީ!

ރައްޔިތުންނަށް ބުލަލުގެ އުނދަގޫ ބޮޑުވުމާއި ގުޅިގެން އިނގުރައިދޫގައި އުޅޭ ބުޅާތައް އެރަށުން ބޭރުކުރުމަށް އެރަށު ކައުންސިލުން ނިންމައިފިއެވެ.

މިކަމާ ގުޅިގެން އިނގުރައިދޫ ކައުންސިލުން ވަނީ، ރައްކާތެރި ގޮތުގައި ބުޅާ ހިފައިދޭނޭ ފަރާތެއް ހޯދުމަށް ދިވެހި ސަރުކާރުގެ ގެޒެޓްގައި އިއުލާނުކޮށްފައެވެ. އިނގުރައިދޫ ކައުންސިލުން ކުރި އިއުލާނުގައި ބުނެފައިވަނީ، އެރަށުގައި އުޅޭ ބުޅާތައް، ރައްކާތެރިގޮތުގައި ހިފައި، ފަޅުރަށަކަށް ގެންގޮސްދޭނެ ފަރާތެއް ބޭނުންވާކަމަށެވެ. އެ ބުޅާތައް ގެންދިއުމަށް ނިންމާފައިވަނީ، އެއްވެސް ރަށެއްގެ އިހްތިސާސްގެ ތެރޭގައި ނުހިމެނޭ ފަޅުރަށަކަށެވެ.

އިނގުރައިދޫ ކައުންސިލުން ބުނީ އެރަށުގައި އުޅޭ ބުޅާތައް ހިފައި އެހެން ރަށަކަށް ގެންދިއުމަށް ނިންމީ، މިހާރަކަށް އައިސް އެރަށުގައި އާންމުންނަށް އުނދަގޫވާވަރަށް ބުޅާ ގިނަވެ، ބުޅާ މަދުކުރުމަށް ރައްޔިތުންގެ ފަރާތުން އެދިފައިވާތީކަމަށެވެ.

އިނގުރައިދޫ ކައުންސިލުން ބުނީ، މި މަސައްކަތް ކުރަންވާނީ ބުޅަލަށް އެންމެ ރައްކާތެރި ގޮތަށްކަމަށާއި، މިކަމަށް ޝައުގުވެރިވާ ފަރާތްތަކުން މިހިނގާ އޭޕްރިލްމަހުގެ 27 ވާ އާދިއްތަ ދުވަހުގެ ކުރިން އިނގުރައިދޫ ކައުންސިލް އިދާރާއަށް ކޯޓޭޝަން ހުށަހެޅުމަށް އެދޭކަމަށެވެ. އަގު ހުށަހަޅަން ޖެހޭނީ 300 ބުޅާ ހިފައިދޭ އަގަށްކަމަށްވެސް ކައުންސިލުން ބުންޏެވެ.

އާއްމުނަށް އުނދަގޫވާވަރަށް ބުޅާ ގިނަވުމުގެ މައްސަލައަކީ މިހާރު ވަރަށް ގިނަ ރަށްރަށުގެ ރައްޔިތުންގެ ޝަކުވާއަކަށް ވެފައި އޮންނަ ކަމެކެވެ. މާލޭ ސަރަހައްދުގައިވެސް ބުޅާ ގިނަވެ، ބުޅަލަށް ހާއްސަ ތަނެއްވެސް ވަނީ ހަދާފައެވެ.