ޕޮއިސްޑް މަޝްރޫޢާއެކު އަހަރަކު 3.13 މިލިއަން ލީޓަރުގެ ޑީސަލް ސަލާމަތްކުރެވޭނެ: ފެނަކަ
ރ. އަތޮޅާއި ބ. އަތޮޅުގައި ޕޮއިސްޑް މަޝްރޫޢުގެ ދަށުން ސޯލާ ޕީވީ އަދި ބެޓަރީ ސްޓޯރޭޖް ނިޒާމުތައް ޤާއިމުކޮށް ނިމުމާ ގުޅިގެން ކޮންމެ އަހަރަކު 3.13 މިލިއަން ލީޓަރުގެ ޑީސަލް ސަލާމަތްކުރެވޭނެ ކަމަށް ފެނަކަ ކޯޕަރޭޝަނުން ބުނެފިއެވެ.
ޕްރިޕެއަރިން އައުޓަ އައިލެންޑްސް ފޯ ސަސްޓެއިނަބަލް އެނާޖީ ޑިވެލޮޕްމަންޓް (ޕޮއިސްޑް) ގެ ނަމުގައި ހިންގި މި މަޝްރޫޢުގެ ޒަރީޢާއިން ތެލަށް ކުރާ ޚަރަދު ވަރަށް ބޮޑު ތަނުން ދަށްވެގެންދާނެ ކަމަށް ފެނަކައިން ބުނެފައިވެއެވެ. އެ ކުންފުނިން ސިފަކުރާ ގޮތުގައި ތެލުގެ ބޭނުން ކުޑަކުރުމާ އެކު އިއާދަކުރަނިވި ހަކަތައިގެ ރޮނގުން ރާއްޖެ ހޯދި މި ކާމިޔާބީއަކީ ފާހަގަކޮށްލެވޭ ކުރިއެރުމެކެވެ.
ތިމާވެށީގެ ނަޒަރުން ބަލާއިރު މި ނިޒާމުތައް ބޭނުންކުރަން ފެށުމުން ޖައްވަށް ބޭރުކުރާ ކާބަންގެ މިންވަރުން އަހަރެއްގެ ތެރޭގައި 8,400 ޓަނު މަދުކުރެވޭނެ ކަމަށް ފެނަކައިން އަންދާޒާ ކޮށްފައިވެއެވެ. މޫސުމީ ބަދަލުތަކާ ކުރިމަތިލުމަށް ރާއްޖެއިން ކުރާ މަސައްކަތަށް މިއީ ލިބިގެންދިޔަ ވަރަށް ބޮޑު ބާރެއް ކަމުގައި ވެސް އެ ކުންފުނިން ފާހަގަކޮށްފައިވެއެވެ.
ފެނަކައިން ދެކޭ ގޮތުގައި މިފަދަ މަޝްރޫޢުތައް ކުރިއަށް ގެންދިއުމުގެ ނަތީޖާއެއްގެ ގޮތުން ރަށްރަށުގެ ހަކަތައިގެ ނިޒާމު ހަރުދަނާވެ ތިމާވެށްޓާ ރައްޓެހި ގޮތެއްގައި ކަރަންޓު އުފައްދައިދޭ މަގު ފުޅާވެގެންދާނެއެވެ. ޕޮއިސްޑް މަޝްރޫޢަކީ ރާއްޖޭގެ ދެމެހެއްޓެނިވި ތަރައްޤީއާއި ތިމާވެށީގެ ރައްކާތެރިކަން ކުރިއެރުވުމަށް އެޅުނު މުހިންމު ފިޔަވަޅެއް ކަމުގައި އެ ކުންފުނިން ބަލައިގަނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
