ކޮރަޕްޝަންގެ ތުހުމަތުކުރެވޭ ސީޕްލޭން ޓާމިނަލްގެ މައްސަލައިގެ ރިޕޯޓް ނަޝީދު ސިއްރުކުރަން ނިންމައިފި

ވެލާނާ އިންޓަނޭޝަނަލް އެއާޕޯޓްގައި، މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ހަދާ ސީޕްލޭން ޓާމިނަލް، ޓްރާންސް މޯލްޑިވިއަން އެއާވޭސް (ޓީއެމްއޭ) އަށް ދޫކޮށްލަން އުޅޭ މައްސަލާގައި، އެންޓި ކޮރަޕްޝަން ކޮމިޝަން (އޭސީސީ) އިން އެކުލަވާލި ރިޕޯޓް ރައްޔިތުންގެ މަޖިލީހުން ސިއްރުކޮށްފިއެެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ، ސީޕްލޭން ޓާމިނަލްގެ މައްސަލާގައި އޭސީސީން އެކުލަވާލި ރިޕޯޓް، ސިއްރު ރިޕޯޓެއްގެ ގޮތުގައި މިދިޔަ ބުރާސްފަތި ދުވަހު މަޖިލީހަށް ލިބިފައިވާ ކަމަށެވެ. އެހެންވެ އެރިޕޯޓު ސިއްރު ކުރަން ކަނޑައަޅާފައިވާކަމަށް ނަޝީދު ވިދާޅުވިއެވެ.

ނަޝީދު ވިދާޅުވީ، އެރިޕޯޓު ކޮމެޓީއާ ހިއްސާކޮށްފައިވާ ކަމަށާއި ރިޕޯޓަކީ ސިއްރު ރިޕޯޓެއްގެ ގޮތުގައި މެންބަރުންނާ ހިއްސާ ކުރައްވާނެ ކަމަށެވެ.

ސީޕްލޭން ޓާމިނަލް ކުއްްޔަށް ދޫކުރުމުގައި ވަކި އޮޕަރޭޓަރަކަށް ނުވަތަ އޮޕަރޭޓަރުންތަކަކަށް ނާޖައިޒު ފައިދާ ހޯދައިދޭން މަސައްކަތް ކޮށްފައިވާ ކަމަށް ތުހުމަތު ކުރެވޭތީ އެ މައްސަލައިގެ ޖިނާއީ ތަހުގީގު ފަށާފައިވާ ކަމަށް އޭސީސީން މީގެ ކުރިން ވަނީ ބުނެފަ އެވެ.

ޓާމިނަލް ޓީއެމްއޭ އަށް ކުއްޔަށް ދޭނެ ކަމަށް، އެމްއޭސީއެލުން ވެފައި އޮތް އެއްބަސްވުމެއް ކަމަށް، ޓީއެމްއޭއިން ގަބޫލުކުރާ ކަން ދޭހަވާ ފަދަ މޭރުމަކުން ވާހަކަ ދައްކަނީ އެމްސީއެލުން ދީފައިވާ ސިޓީއެއްގެ މައްޗަށް ބިނާކޮށެވެ.

އެކަމަކު އެ ސިޓީގައިވަނީ، އާ ޓާމިނަލް ކުއްޔަށް ދިނުމާ ބެހޭ ގޮތުން ދެ ފަރާތުގެ މެދުގައި ހަދާ އެގްރިމެންޓްގައި ޓީއެމްއޭ އިން އެއްބަސްވުމަކަށް ނާދެވޭ ކަންކަމުގައި، އެމްއޭސީއެލުން ދެކޭ ގޮތެވެ.

އެ ސިޓީގައިވާ ގޮތުން މާކެޓް ރޭޓަށް ވުރެ ކުޑަ އަގެއް ކަމަށްވާ އަކަމީޓަރަކަށް 10.35 ޑޮލަރު އެމްއޭސީއެލުން ހުށައެޅުމުން ޓީއެމްއޭއިން ބޭނުންވީ އަކަމީޓަރެއް ހަތް ޑޮލަރަށް ކުއްޔަށް ހިފަން ށެވެ.

ބޯޑުގެ ނިންމުމާ އެކު އެމްއޭސީއެލް އާއި ޓީއެމްއޭއާ ދެމެދު ވާހަކަ ދެކެވެމުން ދިޔައީ އާ ޓާމިނަލުން 31،000 އަކަމީޓަރު 15 އަހަރަށް، ޓީއެމްއޭ އަށް ކުއްޔަށް ދިނުމާ މެދުގަ އެވެ. ފުރަތަމަ ތިން އަހަރު އަކަމީޓަރަކަށް 10.35 ޑޮލަރު ނަގާ އިރު، ފުރާ ކޮންމެ ފަސެންޖަރެއްގެ އަތުން ފަސް ޑޮލަރު ނަގަން، އެމްއޭސީއެލުން ހުށައެޅި އެވެ.