ޑރ. ޖަމީލު ޖޭޕީން ވަކިވެވަޑައިގެންފި

ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު، ޖުމްހޫރީ ޕާޓީން ވަކިވެވަޑައިގެންފިއެވެ.

ޖަމީލު ޖޭޕީއަށް ފޮނުއްވި ލިޔުމުގައި، ޕާޓީގެ ދަފްތަރުން ނަން އުނިކުރުމާ އެކު މަގާމްތަކުން ވެސް ވަކިކޮށްދެއްވުމަށް އެދިވަޑައިގެންފައި ވެއެވެ.

ޑރ. ޖަމީލު ވިދާޅުވީ، ޖޭޕީގެ މެމްބަރުކަމުން ވަކިވެވަޑައިގަތުމަށް ނިންމަވައި، އެކަން އިއްޔެ އެޕާޓީއަށް އަންގަވާފައިވާނެ ކަމަށެވެ.

އެގޮތުން ވިދާޅުވީ، އެމަނިކުފާނު އެގޮތަށް ނިންމެވީ، މިވަގުތު ކުރަން ބޭނުންވާ ސިޔާސީ މަސައްކަތް އެޕާޓީގައި ހުންނަވައިގެން ކުރުމުގެ ފުރުސަތު ހަނިވެފައިވާ ކަމަށް ފެނިވަޑައިގަންނަވާތީ ކަމަށެވެ.

ރާއްޖޭގެ ސިޔާސީ މަސްރަހު ބަަދަލުވެފައިވާ ގޮތާއި ސިޔާސީ ދާއިރާ އަށް އަންނަ ބަދަލުތަކަށް ބަލާއިރު އެމަނިކުފާނުގެ ސިޔާސީ ވިސްނުމާއި ދިވެހި ގައުމާ މެދު ހިތުގައި ބިންވަޅު ނެގިފައިވާ ތަސައްވަރު ފުރިހަމަކުރެއްވޭނެ ފަދަ މަސައްކަތްތަކެއް ޖުމްހޫރީ ޕާޓީގެ ތެރެއިން ކުރެއްވުމުގެ ފުރުސަތު ހަނިވެފައިވާ ކަމަށް ޑރ. ޖަމީލު ވިދާޅުވިއެވެ.

އެހެންކަމުން މިވަގުތު އެންމެ ރަނގަޅު ގޮތަކީ ޖޭޕީއާ ދުރަށް ވަޑައިގަތުން ކަމަށް ޖަމީލު ވިދާޅުވި އެވެ.

ރައީސް ޔާމީންގެ ވެރިކަމުގައި އޭރުގެ އިދިކޮޅުގައި ތިއްބެވި ބޭފުޅުންނާއި ގުޅިވަޑައިގެން ޑރ. ޖަމީލު ވަނީ ސިޔާސީ ގޮތުން ގިނަ މަސައްކަތްތަކެއް ކުރައްވައިފައެވެ. ރައީސް ޔާމީންގެ ފުރަތަމަ ނައިބު ރައީސްގެ މަގާމުގައި ހުންނަވަނިކޮށް، އެމަނިކުފާނު މަގާމުން ދުރުކުރެއްވީ ރައްޔިތުންގެ މަޖިލީހުގައި ތިއްބެވި ސަރުކާރަށް ނިސްބަތްވާ މެންބަރުން ވޯޓްދެއްވައިގެންނެވެ.

އޭގެފަހުން އިދިކޮޅާއި ގުޅިވަޑައިގެން ކުރެއްވި މަސައްކަތުން މިސަރުކާރު ވެރިކަމަށް އައިނަމަވެސް ރައްޔިތުންނަށް މަންފާހުރި އެއްވެސް ކަމެއް ނުކުރާކަމަށް ވިދާޅުވެ، ޑރ. ޖަމީލު ގެންދަވަނީ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.

ޖަމީލް ޖޭޕީއަށް ގުޅިވަޑައިގަތީ އިދިކޮޅުގައި ހުންނެވި ދުވަސްވަރު އޭރުގެ އިދިކޮޅު ފަރާތްތަކުން ޖަރުމަނުގައި ބޭއްވި ރަސްމިއްޔާތެއްގަ އެވެ.

ނަމަވެސް ފަހަކަށް އައިސް ސަރުކާރަށް ވަރަށް ބޮޑަށް ފާޑުވިދާޅުވަމުން ގެންދަވައި ޖަމީލު މިހާރު މަސައްކަތް ކުރައްވަނީ ރައީސް ޔާމީންގެ ގަނޫނީ ޓީމުގެ އެންމެ އިސް ބޭފުޅެއްގެ ގޮތުގައެވެ.