ޕްލާސްޓިކު ކޮތަޅަކުން 2 ރުފިޔާ ނަގަން ފަށައިފި
ކުނި މެނޭޖުކުރުމުގެ ޤާނޫނަށް ގެނައި އިސްލާހުގެ ދަށުން މިއަދުން ފެށިގެން ޕްލާސްޓިކް ކޮތަޅުން 2 ރުފިޔާ ނަގަން ފަށައިފި އެވެ.
ޕްލާސްޓިކް ކޮޓަޅުން ނަގާ ޓެކްސް އެ ވިޔަފާރިއަކުން މީރާއަށް ދައްކަން ޖެހެއެވެ. އެފީ މީރާއަށް ދައްކަން ޖެހެނީ ޖީއެސްޓީ ދައްކާއިރު، އެއާއި އެއްކޮށެވެ.
މިއަދުން ފެށިގެން ކޮންމެ ޕްލާސްޓިކް ކޮތަޅަކުން ޓެކްސް ނަގަން ފަށާފައިވާއިރު، މި ޓެކްސް ނުނަގާ ޕްލާސްޓިކް ކޮތަޅު ދީފިނަމަ 5000 ރުފިޔާއާއި 50000 ރުފިޔާއާއި ދެމެދުގެ އަދަދަކުން ޖޫރިމަނާ ކުރެވޭނެ އެވެ.
މީރާއިން އާންމުކޮށްފައިވާ ޕްލާސްޓިކް ކޮތަޅުގެ ފީ ގައިޑު އަދި ޖީއެސްޓީއަށް ރަޖިސްޓާ ކޮށްފައިވާ ފަރާތްތަކުން ޕްލާސްޓިކް ކޮތަޅުން ފީ ނެގުމުގެ ޤަވައިދުގައި ބުނާގޮތުން ޖީއެސްޓީ ރަޖިސްޓްރީކުރުން ލާޒިމުވާ ވިޔަފާރިއަކުން ޖީއެސްޓީއަށް ރަޖިސްޓްރީ ނުކޮށް ވިއްކާ ނުވަތަ ފޯރުކޮށްދޭ ޕްލާސްޓިކް ކޮތަޅަކުން ޓެކްސް ނަގައި އެ ފައިސާ މީރާއަށް ދައްކަން ޖެހޭނެ އެވެ.
އޭގެ އިތުރުން ޖީއެސްޓީ ނުނަގާ މުދަލެއް ފޯރުކޯށްދިން ނަމަވެސް އެ މުދާ އެޅުމަށް ޕްލާސްޓިކް ކޮތަޅު ބޭނުންކުރާނަމަ ކޮތަޅުން ޓެކްސް ނަގަން ޖެހޭނެ އެވެ.
ޕްލާސްޓިކް ކޮތަޅުން ފީ އިސްތިސްނާ ވާ ހާލަތްތައް
- ޑިއުޓީ ފްރީ ފިހާރަތަކުން ވިއްކާ ނުވަތަ ފޯރުކޮށްދޭ ކޮތަޅު
- ބަންދުނުކޮށް ހުންނަ، ހުރިހާ ބާވަތެއްގެ ތާޒާ މަސް ބަންދުކުރާ ކޮތަޅު
- ކުނި މެނޭޖުކުރުމުގެ ހިދުމަތް ދޭ ފަރާތްތަކުން ނުވަތަ ކަމާ ބެހޭ އެހެން އިދާރާއަކުން ކުނި އެޅުމަށް ދޫކުރާ ނުވަތަ ވިއްކާ ޑަސްބިން ކޮތަޅު
ޕްލާސްޓިކް ކޮތަޅުން ޓެކްސް ނެގުމާ ބެހޭގޮތުން މައުލޫމާތު ދިނުމަށް މީރާއިން ވަނީ އަންނަ ބުދަ އަދި ބުރާސްފަތި ދުވަހު އޮންލައިން ސެޝަންތަކެއް ބޭއްވުމަށް ނިންމާފަ އެވެ. މެންދުރުފަހު 1:00 އިން 1:30 އަށް ބާއްވާ އެ ސެޝަންގައި ބައިވެރިވުމުގެ ފުރުސަތު މީރާއިން ވަނީ ހުޅުވާލާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
