މަޝްއަރު އުމުރާ ގުރޫޕުން ސައުދީ އެއާލައިނަށް 90000 ޑޮލަރު ނުދައްކާ އޮތްކަން ހާމަކޮށްފި!

138 މީހުން މި ރޯދަމަހު އުމުރާއަށް ގެންދިއުމަށް ފްލައިޓު ޗާޓަރު ކުރި އަލް މަޝްއަރު ހައްޖު އެންޑް އުމްރާ ގުރޫޕުގެ ދެ ޗެކު ބައުންސްވެފައި ވަނިކޮށް އެ ގުރޫޕުން ސައުދީ އެއާލައިންސްގައި ގެންދިޔަ މީހުންގެ ޓިކެޓަށްވާ ފައިސާ ނުދައްކާ އޮތް މައްސަލައެއް އިސްލާމިކް މިނިސްޓްރީން ހާމަކޮށްފިއެވެ.

އަލް މަޝްއަރު ގުރޫޕުގެ ހަވާލުގައި އެހެން އެއާލައިނެއް މެދުވެރިކޮށް ދެ ބުރެއްގެ މަތިން 138 މީހަކު އުމްރާ އަށް ގެންދިޔަ އެވެ. އެކަމަކު، ފްލައިޓް ޗާޓަރު ކުރުމާއި ޓިކެޓްގެ ފައިސާގެ އަދަދަށް ވާ ދެ ޗެކް ބައުންސް ވުމުން، ފްލައިޓް ޗާޓަރު ކޮށްދިން ދިވެހި ކުންފުނިން ވަނީ އެ މައްސަލަ އިސްލާމިކް މިނިސްޓްރީ އަށް ހުށަހަޅައިފަ އެވެ.

އަލް މަޝްއަރު އުމުރާ ގުރޫޕުން "ޓްރެވެލް 2 މޯލްޑިވްސް" ކިޔާ ކުންފުންޏެއް މެދުވެރިކޮށް ފްލައިޓް ޗާޓަރު ކުރުމާއި ޓިކެޓް ނެގުމުގެ ހަރަދަށް 141،450 ޑޮލަރު އަރާފައި ވެ އެވެ.

ފައިސާ ފަހުން ދައްކާނެ ކަމަށް ބުނެ އަލް މަޝްއަރު އުމްރާ ގުރޫޕުުން ދޫކުރީ ދެ ޗެކުވެސް ބައުންސް ވެފައިވާއިރު، އެކަން އިސްލާމިކް މިނިސްޓްރީގެ ސަމާލުކަމަށް އައި ހިސާބުން އެ މިނިސްޓްރީން ވަނީ އެ ގުރޫޕާއި ގުޅޭ އިތުރު މައްސަލަތަކެއްވެސް ހާމަކޮށްފަ އެވެ.

އެގޮތުން އިސްލާމިކް މިނިސްޓަރު ޑރ އަހުމަދު ޒާހިރު އަލީ ވިދާޅުވީ ސައޫދީ އެއާލައިންސްގެ ފްލައިޓެއްގައި އެ ގުރޫޕުން ގެންދިޔަ 70 ވަރަކަށް މީހުންގެ ރިޓާން ޓިކެޓްގެ ފައިސާ ނުދައްކާ ކަން މިހާރު އެނގިވަޑައިގެންފައިވާ ކަމަށެވެ.

އެނގިފައިވާ ގޮތުގައި ސައޫދީ އެއާލައިންސަށް މަޝްރައު އުމްރާ ގުރޫޕުން 90،000 ޑޮލަރު ދައްކަން ޖެހެ އެވެ.

އިސްލާމިކް މިނިސްޓަރު ވިދާޅުވީ އެ ފައިސާ އެއާލައިނަށް ދެއްކުމަށް މަޝްރައު އުމުރާ ގުރޫޕަށް އިސްލާމިކް މިނިސްޓްރީން ބާރު އަޅަމުން އަންނަ ކަމަށެވެ.

"ޓްރެވެލް 2 މޯލްޑިވްސް" އިން ޗާޓަރު ކޮށްދިން ފްލައިޓްގައި އުމްރާ އަށް ގެންދިޔަ 138 މީހުން މި މަހުގެ 27 ގައި ރާއްޖެ ގެންނަން ތާވަލު ކޮށްފައިވާއިރު، ބައުންސްވި ދެ ޗެކަށް އަދިވެސް އަލް މަޝްއަރު ގުރޫޕުން ފައިސާ ނުދައްކާ ކަމަށް އިސްލާމިކް މިނިސްޓަރު ޑރ. ޒާހިރު ވިދާޅުވި އެވެ.

އޭގެ އިތުރުން އަލް މަޝްއަރު ގުރޫޕްގެ ހަވާލުގައި ގެންދިޔަ 200 އަށް ވުރެ ގިނަ އުމްރާވެރިން ރާއްޖެ ގެނައުމުގައި ތާށިތަކެއް އުޅެފާނެތީ އެކަމާ އިންތިހާ އަށް ކަންބޮޑުވެޑައިގަންނަވާ ކަމަށް ޑރ ޒާހިރު ވަނީ ވިދާޅުވެފަ އެވެ.