ވަކި ކޮތަޅުން ޓެކްސް ނަގަން ފެށުމާއިއެކު ޕްލާސްޓިކް ކޮތަޅު ބޮނޑީގެ އަގު އެތައް ގުނައެއް މައްޗަށް

ކުނި މެނޭޖުކުރުމުގެ ޤާނޫނަށް ގެނައި އިސްލާހުގެ ދަށުން މިއަދުން ފެށިގެން ޕްލާސްޓިކް ކޮތަޅުން 2 ރުފިޔާ ނަގަންފެށުމާއިއެކު ގަނޑުކޮށް ޕްލާސްޓިކް ކޮތަޅު ބޮނޑި ވިއްކާ އަގު އެތައް ގުނަ އަކަށް މަތިވެއްޖެއެވެ.

ކުނި މެނޭޖް ކުރުމުގެ ގާނޫނަށް ގެނެވުނު އިސްލާހާއި ގުޅިގެން މިރާއިން ކުރި ޓުވީޓެއްގައި ބުނީ، ޕްލާސްޓިކް ކޮތަޅު ބޮނޑި ގޮތަށް ވިއްކި ނަމަވެސް، ބޮނޑި އަކު އިންނަ ކޮންމެ ކޮތަޅަކުން ދެ ރުފިޔާ ނަގަން ޖެހޭ ކަމަށެވެ.

މިކަން މީރާ އިން އާންމުކޮށްފައިވާ 'ޕްލާސްޓިކް ކޮތަޅުގެ ފީ ގައިޑް'ގައި ވެސް އެ އީދާރާއިން ފާހަގަކޮށްފައިވެއެވެ.

"ޕްލާސްޓިކް ކޮތަޅު ބޮނޑިއެއް ވިއްކި ނަމަވެސް ނުވަތަ ހިލޭ ދިން ނަމަވެސް، އެ ކޮތަޅު ބޮނޑީގައި ހިމެނޭ ކޮންމެ ކޮތަޅަކަށް 2ރ.ގެ ރޭޓުން ޕްލާސްޓިކް ކޮތަޅުގެ ފީ ނަގަންވާނެ އެވެ. އަދި ޕްލާސްޓިކް ކޮތަޅު ބޮނޑި ވިއްކާ ފަރާތަކީ ޖީ.އެސް.ޓީއަށް ރަޖިސްޓަރީކޮށްފައިވާ ފަރާތެއް ނަމަ، އޭގެ އަގުން ޖީއެސްޓީ ވެސް ނަގަންވާނެ އެވެ،" ޕްލާސްޓިކް ކޮތަޅުގެ ފީ ގައިޑުގައިވާ ސުވާލެއްގެ ޖަވާބުގައި ބުނެފައިވެއެވެ.

މި އުސޫލާއި އެކު ބާޒާރުގައި ކޮތަޅު ބޮނޑީގެ އަގު ވަރަށް ބޮޑަށް ވަނީ މައްޗަށް އަރާފައެވެ.

ޕްލާސްޓިކް ކޮތަޅު ބޮނޑި ވިއްކާ އަގު

ކުދި - 220ރ. (ކުރިން 25ރ.)

މެދު - 228ރ. (ކުރިން 35ރ.)

ބޮޑު - 235ރ. (ކުރިން 48ރ.)

އެކްސްއެލް - 285ރ. (ކުރިން 115ރ.)

އެކްސްއެކްސްއެލް - 365ރ. (ކުރިން 220ރ.)

ޕްލާސްޓިކް ކޮތަޅުގެ އަގަށް އައި މި ބޮޑު ބަދަލާއި އެކު ވިޔަފާރި ވެރިންގެ އަތުން އެކަމަށްދާ ޚަރަދު އެތައް ގުނަ އަކަށް ބޮޑުވެގެން ގޮސްފައިވާއިރު އެކަމާއި ގުޅިގެން އެފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.