ޕޭޕާ ކުންފުނި ހަދައިގެން ފެނަކައިން ވައްކަން ކުރުން މި ސަރުކާރުން ވަނީ ހުއްޓުވާފަ: ޝިފާއު
ޕޭޕާ ކުންފުނި ހަދައިގެން ފެނަކައިން ވައްކަން ކުރުން މި ސަރުކާރުން ވަނީ ހުއްޓުވާފައިކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެ އެވެ.
ޝިފާއު މިފަދައިން ވިދާޅުވެފައިވަނީ ފެނަކަ ކޯޕަރޭޝަނުން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާދިނުން އަވަސް ކުރުމަށާއި، ފެނަކައިގެ ފައިނޭންސް އަދި މެނޭޖުމަންޓު އޮޑިޓެއް ހެދުމަށާއި ދަރަނި އަދާކުރާނެގޮތުގެ ޕްލޭނެއް އެކުލަވާލުމަށް ގޮވާލާ މަޖިލީހުގެ ދެވަނަ ދައުރުގެ ފުރަތަމަ ޖަލްސާއަށް ހުށައެޅި ގަރާރަށް ބަހުސް ކުރައްވަމުން ނެވެ.
ޝިފާއު ވިދާޅުވީ ފެންވަރު ރަނގަޅު ކަރަންޓުގެ ޚިދުމަތެއް ރައްޔިތުންނަށް ލިބިގެންދާނެކަމަށް މީގެ ކުރިން އެއްވެސް ރައްޔިތަކަށް ވިސްނިފައިވެސް ނެތް ކަމަށެވެ.
އެހެން ނަމަވެސް މި ސަރުކާރު އައިސް އަތޮޅުތެރޭގައި ހުރި ޓިނު އޮފީސްތައް ޒަމާނީކޮށް މުވައްޒަފުންނަށް ރަނގަޅު މުސާރައެއް ދީގެން ކަރަންޓުގެ ފެނާއި ކަރަންޓުގެ ޚިދުމަތް ފޯރުކޮށްދޭން ފެށުމުން ރައްޔިތުންނަށް އެތައް ލުއި ފަސޭހަކަމެއް ލިބިގެން ގޮސްފައިވާ ކަމަށެވެ.
"ފެނަކައިގެ ވަސީލަތްތައް ތަރައްގީކޮށްފި، ރަނގަޅުކޮށްފި، ރައްޔިތުންނަށް ދޭ ޚިދުމަތްތައް ފުރިހަމަކޮށްފި. އެއާއެކު އެތަނުގައި މަސައްކަތް ކުރާ މުވައްޒަފުންގެ މުސާރައަށް ބޮޑު ބަދަލެއް ގެނެސްފި.. އެ ހިނިތުންވުން މިއަދު ފެނަކައިގައި މަސައްކަތް ކުރާ މުވައްޒަފުންގެ މޫނުމަތިން ފެންނަމުންދޭ. އެ ހިނިތުންވުމާއެކު އެ މުވައްޒަފުން ރައްޔިތުންނަށް ފޯރުކޮށްދޭ ޚިދުމަތްތައް ރައްޔިތުންނަށް ފޯރުކޮށްދިނުމުގައި އިހަށްވުރެ މާ ރަނގަޅަށް ފޯރުކޮށްދެމުން ދާކަން ފާހަގަކުރެވޭ"
އިހަވަންދޫ ދާއިރާގެ މެމްބަރު މުހައްމަދު ޝިފާއު
އޭގެ އިތުރުން ޝިފާއު ވިދާޅުވީ ފެނަކަ ކުންފުނިން ރައްޔިތުންނަށް ޚިދުމަތް ފޯރުކޮށްދިނުމަށް ގެންގުޅޭ ސިޔާސަތު ބަދަލުކުރުމުގެ އިތުރުން ގެނައި އެންމެ ބޮޑު ބަދަލަކީ ޕޭޕާ ކުންފުނި ހަދައިގެން ފެނަކައިން ވައްކަން ކުރަމުން ދިޔަ ދިއުން ހުއްޓުވާލުން ކަމަށެވެ.
މީގެ ކުރީގެ ސަރުކާރުތަކުގައި އޮތީ އެ ފުރުސަތު ވަރަށް ބޮޑަށް ފަހިވެފައި ކަމަށާއި، އެހެން ނަމަވެސް މިހާރު އެފަދައިން ވައްކަން ކުރުމުގެ ދޮރު ބަންދުކޮށްފައިވާކަން އޭނާ ފާހަގަކުރެއްވި އެވެ.
"މީގެ ކުރީގެ ސަރުކާރުތަކުން ފެނަކައާއި ދޭތެރޭ ގެންގުޅުނު ސިޔާސަތަކީ ޕޭޕާ ކުންފުނި ހަދައިގެން ނުއަގުގައި ފެނަކައިގެ ތަންތަނަށް ތެޔޮ އަޅާ ވައްކަން ކުރުމުގެ ސިޔާސަތު. މި ސަރުކާރު އައުމަށްފަހު އެއްކަމަކަށް އެ ވައްކަން ހުއްޓުވިއްޖެ"
އިހަވަންދޫ ދާއިރާގެ މެމްބަރު މުހައްމަދު ޝިފާއު
ޝިފާއު ވިދާޅުވީ މީގެ ކުރީ ސަރުކާރުތަކަށް ރައްޔިތުންނަށް ފެނާއި ކަރަންޓުގެ ޚިދުމަތް އެކަށީގެންދާ ގޮތެއްގައި ފޯރުކޮށްދޭން ނޭނގުމަކީ، އަދި އެފަދަ ސިޔާސަތެއް އެކުލަވާލެވިފައި ނުވުމަކީ މި ސަރުކާރުގެ މައްސަލައެއް ނޫން ކަމަށެވެ.
އެހެންކަމުން އެ ކުންފުނީގެ މައްސަލަތަކެއް ހުރެގެން މަޖިލީހަށް ކުއްލި މައްސަލައެއް ހުށައަޅައި ބަހުސްކުރުމަކީ ހަގީގަތުގައި ކުރަން ޖެހޭ ވެސް ކަމެއް ނޫން ކަމަށް އޭނާ ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
