ގދ ވާދޫ ކައުންސިލް ރައީސް ފިޔަވައި، ފެނަކައިން މުސާރަ ނުހިނގާ 15 އަހަރުން މަތީގެ ބޭފުޅެއް ނެތް: ނަޝީދު
ގދ ވާދޫ ކައުންސިލް ރައީސް ފިޔަވައި، ފެނަކައިން މުސާރަ ނުހިނގާ 15 އަހަރުން މަތީގެ ބޭފުޅެއް އެ ރަށުގައި ނެތް ކަމަށް ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު އަބްދުالله (މޮސްޓާ) ވިދާޅުވެއްޖެ އެވެ.
މޮސްޓާ މިފަދައިން ވިދާޅުވެފައިވަނީ ފެނަކައިން ކުދި ވިޔަފާރިތަކަށް ދައްކަން ޖެހޭ ފައިސާ ދެއްކުމަށާއި، އެކުންފުނީގެ މެނޭޖުމަންޓު އަދި ފައިނޭންސް އޮޑިޓެއް ހެދުމަށް ގޮވާލާ މަޖިލީހަށް ހުށައެޅި ކުއްލި މައްސަލައަށް ބަހުސް ކުރައްވަމުން ނެވެ.
މޮސްޓާގެ ވާހަކައިގައި ވަނީ ފެނަކަ މެނޭޖިން ޑިރެކްޓަރު ސައީދަށް ކޮރަޕްޝަންގެ ގިނަ ތުހުމަތުތަކެއް ކުރައްވާފަ އެވެ.
އެގޮތުން ގދ. ވާދޫގައި އެރަށުގެ ކައުންސިލް ރައީސް ފިޔަވައި ފެނަކައިން މުސާރަ ނުހިނގާ 15 އަހަރުން މަތީގެ އެއްވެސް ބޭފުޅެއް ނެތް ކަމަށް މޮސްޓާ ވަނީ ތުހުމަތު ކުރައްވާފަ އެވެ.
"ގދ. ވާދޫގައި މިއަދު ނެތޭ 15 އަހަރުން މަތީގެ ގދ. ވާދޫގެ ކައުންސިލް ރައީސް ފިޔަވައި އެއްވެސް ބޭފުޅަކު ފެެނަކައިން މުސާރަ ނުހިނގާ. ރަށެއްގެ އާބާދީ އެއްކޮށް ފެނަކަ. މިއީ ފެނަކަ ސައީދުގެ އަމިއްލަ ތަނެއްބާ؟" މޮސްްޓޯ ވިދާޅުވިއެވެ.
މިއާއިއެކު ބައުންޑްރީ ނެތް ތަން ތަނުގައި ސެކިއުރިޓީ ޕޯސްޓް ހެދުމަށްފަހު ސެކިއުރިޓީ ބަހައްޓާފައި ތިބިކަމަށާއި، 25 ހާސް ރުފިޔާގެ މުސާރަ ލިބޭ 4 ސުޕަވައިޒަރުން ތިބިއިރު މި ސުޕަވައިޒަރުންނަށް އިތުރު 2 ސީނިއާ ސުޕަވައިޒަރުން ތިބޭ ކަމަށް މޮސްޓާ ވިދާޅުވިއެވެ.
މީގެ އިތުރުން ވާދޫގައި ފެނަކައިގެ އެމްޑީ ސައީދުގެ އަމިއްލަ ގެކޮޅު ގަނޑުވަރެއް ފެންވަރަށް ހަދާފައިވާ ކަމަށާއި، އޭގެ އިތުރުން ސްރީލަންކާގައިވެސް ގެއެއް ހަދާފައިވާކަމަށް މޮސްޓާ ވިދާޅުވި އެވެ. އަދި ހަމައެހެންމެ އެ މަގާމުގައި ހުންނަވައިގެން މިހާރު ސައީދު ގެންދަވަނީ ރިސޯޓެއް ތަރައްގީކުރުމުގެ މަސައްކަތް ވެސް ކުރައްވަމުން ކަމަށް މޮސްޓާ ވިދާޅުވި އެވެ.
މި ހުރިހާ ޚަރަދެއް ކުރައްވަމުންދާއިރު، ފެނަކައަށް ފިނޭންސްއިން ފައިސާ ނުލިބޭކަމަށް ބުނެ ވިޔަފާރިވެރިން ލައްވާ މުޒާހަރާ ކުރުވުމަކީ ދެކޮޅު ޖެހޭ ކަމެއް ނޫންކަމަށް މޮސްޓާ ވަނީ ފާހަގަކޮށްފައެވެ.
މިއާއިއެކު ވައްކަމާއި ކޮރަޕްޝަނާއި ދެކޮޅުކަމަށް ބުނެ އައި ސަރުކާރު މިއަދު ކޮރަޕްޝަންގެ ހާއްޔަކަށް ބަދަލުވެފައިވާ މިންވަރު ހަމައެކަނި ފެނަކަ ކުންފުންޏަށް ބަލާލުމުން ހާމަވެގެންދާކަމަށް މޮސްޓާ ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
